اكياس تعبئة البن من شركة المهندس منسي

العميل : السلام عليكم

المهندس منسي : السلام عليكم

العميل : باش مهندس منسي

المهندس منسي : أيوه

العميل : مع حضرتك احمد يا باشا

المهندس منسي : أهلاً بيك

العميل : لو سمحت كنت عايز أعرف أكياس البن

المهندس منسي : إيه؟؟؟

العميل : عبوات البن

المهندس منسي : آه

العميل : موجودة عند حضرتك منها إيه؟

المهندس منسي : عندنا كل العبوات بنعملها

العميل : عند حضرتك في التمن والربع والنص وفي إيه تاني؟

المهندس منسي : هوه كل المقاسات بنقدر نصنعها

العميل : تمام… طب لو أنا لو عايز أطلب طلبية في خلال أد إيه ممكن أستلمها؟

المهندس منسي : يعني ممكن 4-5 أيام بكتيره قوي

العميل : تمام.. طب الأسعار عامله إزاي أو أنا بتحاسب على إيه؟

المهندس منسي : بتتحاسب الأول على سعر الخامة، وبعد كده بتتحاسب على سعر التفصيل، ولو إنت أخدت الخامة ممكن تاخد الخامة والمكنة وإحنا نعرفك إزاي تشتغل وممكن تفصلهم بنفسك، أما لو عايز إحنا نعملها نعملها لك مافيش مشكلة

العميل : هي المكنة دي بتصمم أي مقاس؟

المهندس منسي : أي مقاس إزاي؟؟

العميل : يعني ممكن أعمل عليها تمن، ممكن أعمل عليها..

المهندس منسي : براحتك.. براحتك خالص

العميل : تمام.. طب هي المكنة دي عامله كام؟

المهندس منسي : بتعمل يعني 3600 جنيه مصري

العميل : تمام… طب والخامات؟

المهندس منسي : الخامات بقى مش كله، ده بيبقى بالكيلو، حضرتك بتبص على الخامة بتنقي الخامة، بناء على الخامة نقدر نقولك سعر، أما إن أنا أقعد أقولك قائمة الأسعار ده هيبقى صعب

العميل : تمام… طب رينج أسعار الخامات إيه؟

المهندس منسي : ما هو هقولك إيه ولا إيه ولا إيه؟؟؟

العميل : لأ.. متوسط..

المهندس منسي : يعني مثلاً لما آجي أقولك من 28 لغاية 150، ما هو كأني ما قلتش حاجة

المهندس منسي : أنا أقصد لو أنا مثلاً الكيس الألومنيوم بتاع البن خامته لا تقيلة قوي ولا خفيفة برده

ما هو التكهنات ديت صدقني هيبقى صعب عليا إن أنا أرد عليك، أما حضرتك تيجي تشرفنا بالزيارة تنقي الخامة بتاعتك…

العميل : مافيش مشكلة إن أنا آجي لحضرتك

المهندس منسي : آه وتقول كمياتك إيه بناء عليها نبدأ نحددلك سعر

العميل : يعني هوه السعر هيفرق في الكميات؟

المهندس منسي : أكيد، الكمية والخامة ولو إنت هتطبع ولا عايزها سادة

العميل : تمام… طيب دلوقتي في ميني مام للطلبية؟

المهندس منسي : لو سادة مافيش ميني مام، لو مطبوع أقل كمية في حدود ربع طن

العميل : تمام… يعني لو سادة مافيش ميني مام

المهندس منسي : يعني خد الكمية اللي إنت عايزها قليل كتير مش هتفرق

العميل : إن شاء الله تمام.. بس أنا كنت كلمت حد تقريباً على الرقم ده وقالي إن سعر الكيلو تقريباً 80 جنيه

المهندس منسي : ما هو لإيه؟؟؟ اللي وصفلك وصفلك خطأ، ما هو كيلو إيه لإيه؟ فهمتني ولا ما فهمتنيش، ما هو في سادة، في مطبوع، في سادة خفيف، في نوع ماتلايز بولي إيثيلين، في نوع بولي إستر ماتلايز بولي إيثيلين، في نوع ورق ألومنيوم بولي إيثيلين، في نوع ورق ألومنيوم ميتالايز بولي إيثيلين، في نوع ورق بولي إستر ألومنيوم بولي إيثلين…. لو قعدت أعدلك خامات… يعني

العميل : تمام.. أنا فاهم حضرتك مافيش مشكلة لينا قاعدة مع بعض مافيش مشكلة

المهندس منسي : إن شاء الله

العميل : هوه حضرتك أنا ممكن آجي الشركة إمتى ولا من إمتى لإمتى؟

المهندس منسي : من 11-9

العميل : تمام يا باشا، هوه المكان اللي هوه خلف رئاسة حي باب الشعرية دوت

المهندس منسي : آه… هبعتلك رسالة دلوقتي فيها الداتا بتاعتهم

العميل : ما هو الرسالة معايا

المهندس منسي : ماشي… تابع بقى مع التليفونات دي

العميل : خلاص ماشي، يعني أتابع مع التليفونات ولا مع حضرتك علي الواتس؟

المهندس منسي : لأ ما هو أنا كده دوري انتهى، أنا استشاري

العميل : ماشي هكلمكهم ع الواتس.. تمام، ماشي يا باشا شكراً

المهندس منسي : شوف الأكتيف مين واشتغل معاه

العميل : تمام يا باشا أزعجت حضرتك معايا

المهندس منسي : ولا يهمك يا غالي

العميل : ماشي يا باشا، السلام عليكم