اكياس تعبئة مبيدات زراعية من شركة المهندس منسي

العميل : السلام عليكم

المهندس منسي : عليكم السلام ورحمة الله وبركاته

العميل : باش مهندس

المهندس منسي : أهلاً بيك

العميل : أخبار حضرتك يا فندم

المهندس منسي : الحمد لله

العميل : المهندس أحمد السويدي مع حضرتك

المهندس منسي : أهلاً وسهلاً

العميل : أهلاً وسهلاً بحضرتك والله أنا حد دلني على اسم الشركة فأنا بحثت عنه كده كنت محتاج أكياس وحاجات زي كده بعبي فيها مبيدات حاجات زراعية، فكنت عايز أسأل حضرتك هوه في موجود أكياس ولا موجود مكن ولا موجود إيه عند حضرتك؟

المهندس منسي : كله موجود

العميل : يعني لو أنا عايز أكياس مطبوعة حاجات تشيل 400 جرام وحاجات زي كده أسعارها إيه؟ ولو أنا عايز أشتري مكنة مثلاً بتعمل حاجات دي برده أسعارها إيه؟

المهندس منسي : هوه إحنا عندنا المكن اللي يعبي الأكياس هنبدأ نشوف الديزاين بتاع حضرتك، هنعرف الكمية بتاعت حضرتك أد إيه، بناء على الكمية والديزاين والخامة والطول والعرض والحاجات دي هنبدأ نحدد سعر الكيس

العميل : هوه تقريباً لو هعمل مثلاً 400 جرام الكيس، الخامة محترمة أعمل أد إيه؟

المهندس منسي : وحد الله كل الخامات محترمة، الحاجات بتاعت الأكياس بالذات لازم حضرتك تيجي تشرفنا، يعني إنت لو قلتلي دلوقتي مكنة التعبئة هقولك بكذا مش هخاف من حاجة، إنما خامات التعبئة بالذات لازم حضرتك تيجي تشرفنا

العميل : هوه المكان فين حضرتك؟

المهندس منسي : إحنا عندنا حدائق القبة، مدينة نصر، باب الشعرية، 6 أكتوبر

العميل : فين في أكتوبر فين، أو المقر الرئيسي موجود فين لو كده آجي أقابل حضرتك؟

المهندس منسي : مش قصة كلها تعتبر مقرات رئيسية، مافيش مقر رئيسي وفروع كلها زي بعضها

العميل : طب أكتوبر فين؟

المهندس منسي : في مجمع الأمل، هبعتلك العنوان بتاعه في رسالة دلوقتي حالاً

العميل : طيب ماشي، طب أستأذن حضرتك لو في لستة بالماكينات.. إحنا لسه بنعمل مصنع جديد تمام فدخلت في المكان كده إحنا عايزين مثلاً نصنع ونشتغل فيه، فلو كده أنا عايز برده عروض أسعار للماكينات ممكن أستخدمها أشتغل بيها، أنا كنت اتعاملت قبل كده مع مصنع تاني في شغل تاني في شركة القاضي، بس كنت بجيب حاجات اللي هوه مكن اللحام والخياطة، ما أعرفش حضرتك تسمع عنها شركة القاضي ولا لأ، بعد كده فأنا بكلم أنا واحد بتاع مطبعة قلتله والله أنا عايز كذا كذا كذا، قالي والله لو عايز الحاجات الفويل والحاجات اللي زي كده فقالي شركة المنسي، فأنا بحثت عنها دلوقتي فقلت أكلم حضرتك يعني عشان شفت إن حضرتك عندك دراية بالموضوع يعني

المهندس منسي : إن شاء الله

العميل : تمام.. فإحنا هنشوف هنعوز كميات ولو كده يبقى المكن أوفر يبقى نجيب مكن أو نشوف الدنيا فيها إيه

المهندس منسي : لا تحت الأمر

العميل : خلاص.. ماشي يا فندم، أنا هرن على حضرتك تاني من الرقم التاني عشان خاطر اللي عليه الواتس وعليه الحاجة عشان لو حضرتك أي حاجة نتابع مع بعض إن شاء الله

المهندس منسي : ييسر ربنا

العميل : تمام.. حالاً دلوقتي، شكراً