الرولات الفويل من شركة المهندس منسي
العميل: سلام عليكم
المهندس منسي: عليكم السلام ورحمة الله وبركاته
العميل: أخبار حضرتك إيه
المهندس منسي: الحمد لله
العميل: كنت عايز أسأل على الرولات بتاعت الفويل
المهندس منسي: آه…
العميل: يعني طنها عامل كام؟ ولو حبينا ناخد من حضرتك ولا تجيبلنا من الصين ولا أي حاجة؟
المهندس منسي: الطن عامل
العميل: يعني × 8.5 يعمله كام 28000 يعني
المهندس منسي: آه في الحدود دي آه
العميل: طب أنا محتاج مقاس خاص ليا
المهندس منسي: عادي نعملهولك آه
العميل: أنا محتاج 50 ميكرون ده بالنسبة للسمك، وعرض 38 سم
المهندس منسي: هتستخدمه إيه؟
العميل: بعمل أطباق كفتة في المنوفية، اللي هوه الطبق… مش عارف حضرتك عارفه ولا لأ… المهم هوه طبق بنستخدمه في الرز بلبن الفرن كده
المهندس منسي: آه.. آه.. حضرتك عندك مكابس وبتصنعه؟
العميل: عندي مكبس آه، عندي في المنوفية
المهندس منسي: ماشي يا غالي
العميل: طيب قولي أنا لو احتجت إيه الحد الأدنى اللي ممكن تجيبهولي، والوقت اللي حضرتك من ساعة ما نبتدي…
المهندس منسي: نص طن
العميل: النص طن ده حضرتك تجيبهولي في أد إيه؟ يعني أنا أطلبه قبلها بأد إيه؟
المهندس منسي: موجود بضاعة حاضرة، ولكن إحنا هنقصهولك بس، هوه وقت القص أسبوع
العميل: أكيد يعني
المهندس منسي: آه
العميل: يعني أنا لو احتجت في أي وقت، أنا عندي 20 طن كنت جايبهم من الصين، كان حد جايبهوملي لحسابي، كويس
المهندس منسي: آه…
العميل: مكتب استيراد وتصدير في القناطر، مش شغال في القصة يعني، لكن كلمنا الناس بره وجابهم وخد عمولته يعني
المهندس منسي: حسبلك الطن بكام بقى؟
العميل: بحوالي 5
المهندس منسي: اللي عندنا أوروبي، ألماني.. إيطالي
العميل: أنا يهمني السعر، لأن حضرتك عارف التكلفة عالية جداً وأنا مش عارف ألمها
المهندس منسي: لأ حاضر
العميل: فلو السعر هيفضل كده فأنا مش هقدر أكمل لأن في الأول وفي الآخر الطبق الألف تكلفته واصله معايا لـ 175 جنيه، والشركات التانية بيبعوا بـ 160 جنيه
المهندس منسي: عشان بيشتغلوا استوكات وياخده الهالك بيعيدوا تصنيعوا
العميل: طب والهالك ينفع يتصنع
المهندس منسي: بيعيدوا تصنيعوا بس مش عارف بيعيدوا تصنيعوا فين، زي ما تقول كنت في الحوار ده من بدري وبعد كده بطلته
العميل: هوه اللي معايا مين باش مهندس منسي؟
المهندس منسي: المهندس منسي مع حضرتك آه
العميل: على فكرة إحنا اتقابلنا مرة قبل كده، في باب الشعرية بس الكلام ده من فترة
المهندس منسي: آه…
العميل: طيب ممكن حضرتك تخدمنا في القصة دي تتدورلنا عليها بالنسبة للهالك بدل ما إحنا بنبيع الطن بتاعه بـ 11 أو 10 آلاف
المهندس منسي: والله أنا مش عارف بيعيدوا تصنيعها فين
العميل: ده غير القصة اللي إحنا بنتكلم فيها بالنسبة للخام، طب أنا ممكن تديني مثلاً.. مثلاً.. مثلاً 100 كيلو تجربة كده؟
المهندس منسي: 100 كيلو هيبقى صعب عليا إن أنا أفكلك 100 كيلو
العميل: أنا بتكلم إن أنا أجربهم على المكبس
المهندس منسي: مش فاهمني، البكرة النهاردة بتعملها نص طن أو تلت تربع طن، فأفكلك 100 كيلو ده بالنسبة لي عذاب
العميل: خلاص أوكيه أنا ممكن أبقى أشوفها على الصفحة
المهندس منسي: ما تيجي تتفرج عليها على الطبيعة
العميل: هي متزيتة يا باش مهندس؟
المهندس منسي: آه متزيتة وعليها لاتر كمان
العميل: 100 % طب السؤال بقى الأهم والأخطر
المهندس منسي: اتفضل
العميل: هل أنا في استمرارية يعني أنا….
المهندس منسي: أتمنى من ربنا يديني ويديك طولت العمر يعني
العميل: ما أقصدش، أقصد ممكن آجي في وقت أبقى واقف على خامة وبتاع وحضرتك لسه هتجيب
المهندس منسي: يا سيدي الفاضل، أنا بقالي دلوقتي 8 سنين الحمد لله شغال
العميل: تمام يا فندم.. خلاص أوكيه يبقى أنا كده كده لينا زيارة مع حضرتك ونتفق ونسيب لحضرتك عربون ونبدأ تعامل مع بعض، ونخلص الدفعة اللي عندنا دي ونبدأ ومش هنجيب تاني
المهندس منسي: لما تيجي إن شاء الله تاخد عينة وإنت ماشي، خدلك بكره ولا حاجة
العميل: من غير ما ناخدها، أصل إحنا نعرفها، وفي نفس الوقت لو جينا ناخد بكرة نجربها، نشتغل بكره على بعضها
المهندس منسي: آه… إحنا ما يرضيناش الضرر مش مهم عندنا نبيع….
العميل: لأ ندفع تمنها يا فندم ربنا يخليك، إحنا يهمنا إن أنا عايز أشتغل، أنا بكسب من القصة دي، وحابب إن حضرتك تشتغل، يعني كلنا باب رزق يعني أصلاً، واخد بالك، فإنت حضرتك يهمك إن إحنا نشتغل، وزي ما أنا بالضبط يهمني إن حضرتك برده تكسب عشان يبقى في استمرارية
المهندس منسي: إن شاء الله
العميل: فأنا متشكر وفرصة سعيدة ده واتس حضرتك؟
المهندس منسي: آه
العميل: في رقم واتس تاني غيره
المهندس منسي: لأ مافيش
العميل: أوكيه يا فندم متشكر خالص، يعني أنا لو احتجت حضرتك في أي وقت هبعتلك على الرقم ده
المهندس منسي: إن شاء الله
العميل: متشكر يا فندم.. متشكر جداً، أنا عاجز عن الشكر.. اتفضل يا فندم
المهندس منسي: مع السلامة
