تصنيع اسطمبات العبوات البلاستيك بجميع مقاستها من شركة المهندس منسي

العميل : سلام عليكم

مهندس منسي : عليكم السلام ورحمة الله وبركاته

العميل : شركة المهندس منسي للتغليف

مهندس منسي : أيوه

العميل : أيوه يا فندم كنت بسأل بس على عبوات بلاستيك 4 لتر

مهندس منسي : آه…

العميل : موجودة عند حضرتك

مهندس منسي : هوه إنت عايز كمية أد إيه؟

العميل : أنا عاوز مثلاً من ألف ـ ألفين جركن

مهندس منسي : موجود عندنا 5 لتر

العميل : طب الـ 4 لتر ده هيبقى متوافر قريب

مهندس منسي : ممكن يكون الـ 4 لتر، إنت بس المادة اللي حضرتك بتعبيها إيه؟

مهندس منسي : أنا هبعتلك تليفون المبيعات دلوقتي روح بص على الـ 4 أو 5 اللتر اللي عندهم

العميل : طيب ماشي هو في أكتر من… طب أنا حابب لون معين؟

مهندس منسي : لأ هوه اللي عندنا بس أبيض

العميل : لا أنا عايز لون معين، لو حضرتك تقدر تدلني على مكان تاني، بص باختصار طيارات، فطبعاً الزيوت بتجيلي في براميل، فطبعاً مش هينفع أدخل للمستهلك في برميل، فلازم أحطهاله في عبوة بلاستيك يكون شكلها كويس

مهندس منسي : آه…

العميل : فعايز واحد يكون شريكي يعتبر، شريكي إزاي، مش هاخد منه فلوس ولا حاجة، إن هوه يكون شغال معايا في العبوات البلاستيك، لأني أنا طبعاً مش عارف الاستهلاك هيبقى أد إيه، ممكن يكون الاستهلاك ألف جركن في الشهر، ممكن يبقى ألفين، ممكن يبقى 3، ممكن يبقى 100 جركن، الله أعلم بالجو هيبقى إزاي، إنت عارف ظروف البلد دلوقتي

فأنا عايز واحد أكون طالب منه حاجة ألاقي الحاجة دي متوفرة عندي دايماً أطلب أي كمية ألاقيها

مهندس منسي : خد اسطمبة

العميل : الاسطمبة دي تتكلف كام طيب

مهندس منسي : تتكلف في 4 لتر هتتكلف في حدود 2000

العميل : طب الاسطمبة دي لو عملتها يا فندم

مهندس منسي : هتبقى اسطمبتك بتاعتك، تعمل كما تشاء، تعمل اللون اللي إنت عايزه، تعمل كل حاجة

العميل : طيب لو أنا مثلاً عايز اسطمبة تكون جاهزة مثلاً أشتريها على طول، يعني تكون مستعملة وخلاص موديلها قدم ولا حاجة

مهندس منسي : المشكلة الشكل ممكن ما يعجبكش، إنت عارف إنت بتتكلم في كام شكل؟؟ إنت بتتكلم دلوقتي في أكتر من 3 مليون شكل، فممكن الشكل ما يعجبكش، وبعدين ما هو كل حاجة ليها أصول، إزاي هوه أنا لما آجي أبني عمارة أقول أنا عايز عمارة تكون متأسسة وخلاص ، طب ما أنا هدفع أكتر وأكتر، وأقعد أدور….

العميل : طب كويس جداً لو أنا عملت الاسطمبة دي تكلفة الجركن تقف عليا بكام؟

مهندس منسي : نفس التكلفة ولكن الجركن هنا إنت بتتحكم فيه، جركنك بتاعك، محفور عليه اللوجو بتاعك ما حدش يضربلك منتجك، نفس التكلفة، ولكن إنت جركنك إنت بتتحكم فيه، فهمتني إزاي، وبتغير لونك براحتك، بتغير مقاسك براحتك، بتعمل كل حاجة براحتك، جركن بتاعك، بيتك، تقدر توضب فيه، غير مثلاً لو واخد بيت إيجار ما تقدرش تعمل فيه أي حاجة

العميل : آه… طب مين بيعمل الحاجات دي طيب؟

مهندس منسي : إحنا

العميل : إنت بتعمل اسطمبات أساساً؟

مهندس منسي : آه إحنا بنعمل اسطمبات وبننفخها، وعندنا مكن تعبئة وتغليف، وخامات تعبئة وتغليف، والاسطمبات العبوات، ولو عايز مكنة نفخ العبوات كمان نعملك مكنة نفخ، موجودة بضاعة حاضرة اشتريها

العميل : لما نشوف مكنة نفخ…

مهندس منسي : لا ده إحنا شركة عالمية مش شركة على أد مصر بس

العميل : إن شاء الله أجيلك بس أشوف الشريك اللي معايا حضرتك موقعك فين بس

مهندس منسي : إحنا عندنا حدائق القبة، مدينة نصر، باب الشعرية، العبور، برج العرب

العميل : خلاص يعني جنب مننا، ماشي.. ماشي.. شكراً يا باشا مع السلامة

مهندس منسي : مع السلامة