خامات الأكياس البلاستيك بالسوستة من شركة المهندس منسي

العميل : سلام عليكم

مهندس منسي : عليكم السلام ورحمة الله وبركاته

العميل : شركة إم تو باك

مهندس منسي : أيوه

العميل : لو سمحت كنت عايز أسأل على عارف حضرتك السوسته اللي بتعمل في الكيس اللي هي بتفتح وتقفل

مهندس منسي : آه..

العميل : اللي هي بتتغط عليها تروح قافله وفاتحها…

مهندس منسي : عايز السوسته بس ولا الكيس بالسوسته؟

العميل : لأ السوسته بس

مهندس منسي : ماشي حاضر

العميل : حضرتك بتبيعها؟

مهندس منسي : إن شاء الله

العميل : عامله كام البكرة ولا….

مهندس منسي : ابعتلنا بس السايز اللي إنت عايز مقاسه لأنه في 5 مللي و 7 و 12 و 20 و30…. مقاسات كتيرة قوي، فابعتلنا سايز

العميل : العرض بتاعها 5 مللي

مهندس منسي : آه العرض بتاعها 5 ـ 6 ـ 10 ـ 12… اللي إنت عايزه أد إيه؟

العميل : تمام… خلاص أوكيه ماشي

مهندس منسي : والكمية المطلوبة إيه

العميل : خلاص أوكيه ماشي حالاً، بس أنا كنت عايز عينة الأول أجربها وكده الأول

مهندس منسي : آه… هوه إحنا معندناش، إحنا بنجيبها بالطلب

العميل : يعني حضرتك مافيش عندك جاهز؟

مهندس منسي : لأ في حاجات مطلوبة وفي حاجات موجودة وفي حاجات مش موجودة، لأنه مقاساتها كتير، إحنا بنتكلم مثلاً في 120 مقاس

العميل : آه… تمام

مهندس منسي : فاستحالة أقدر أوفر الـ 120 مقاس

العميل : تمام… طب المقاسات المتوفرة عند حضرتك أنهي مقاسات وكده؟

مهندس منسي : صدقني مش فاكر، ده بقى مع المخازن مش معايا أنا

العميل : تمام

مهندس منسي : إنت بس شوف طلبك إيه، وابعتلي طلب استفسار بيه على الإيميل وإحنا هنرد عليك على طول

العميل : هوه عامة عارف حضرتك كيس البن

مهندس منسي : آه

العميل : هوه نفس كيس البن

مهندس منسي : ما هو أنا عارف كل الأكياس، وعارف كل الأنواع، بس هوه طول النهار الناس واحد بتاع مستحضرات تجميل يقولي عارف العبوة بتاعت كذا ، وواحد يقولك عارف عبوة الدوا…. ما أنا لو عرفت كل العبوات اللي في العالم ده أنا كده محتاج بقى أفتح مدينة ونحط فيها كل……

العميل : هوه حضرتك عارف بن معبود…

مهندس منسي : انا بشرب حضرتك فنجان قهوة طول النهار…

العميل : أصل مافيش حد ما بيشربش قهوة يعني، هوه نفس السوستة

مهندس منسي : هوه فنجان واحد بشربه طول النهار ودي علاقتي بالبن، إنما عملت لناس كتيرة جداً للبن، عملت لناس كتيرة ومقاسات كتيرة وأشكال كتيرة للبن

العميل : آه.. تمام

مهندس منسي : ولكن بعد ما تخلص المهمة بتتقطع علاقتي بالمنتج، لأن إحنا عملنا منتجات كتيرة جداً، لأن إحنا مش في قطاع واحد، إحنا في عدة قطاعات، يعني في مستحضرات تجميل، مواد غذائية، منظفات، أدوية، مواد زراعية، المبيدات، المنتجات البترولية…. حاجات كتيرة جداً، كل ده مواد تعبئة وتغليف

العميل : تمام.. خلاص أوكيه طب مكان حضرتك فين؟

مهندس منسي : إحنا عندنا حدائق القبة، مدينة نصر، باب الشعرية، 6 أكتوبر

العميل : فيه في باب الشعرية؟

مهندس منسي : آه

العميل : تمام.. خلاص لو كده يبقى آجي باب الشعرية أفضل يعني

مهندس منسي : ماشي هبعتلك العنوان دلوقتي حالاً

العميل : ماشي ما اتشرفتش باسم حضرتك؟

مهندس منسي : المهندس منسي

العميل : ماشي يا باش مهندس، خلاص أوكيه، ماشي حالاً، ما أتحرمش منك، كل سنة وحضرتك طيب

مهندس منسي : مع السلامة

العميل : سلام