خامات الومنيوم مقدمة من شركة المهندس منسي

العميل : سلام عليكم

المهندس منسي : عليكم السلام ورحمة الله وبركاته

العميل : أستأذن حضرتك بس هوه طن الألومنيوم عامل كام اللي هوه عرض 35 سم

المهندس منسي : هتستخدمه في إيه؟

العميل : هلصق بيه علب زي خورشيد

المهندس منسي : آه.. آه.. هيعمل في حدود 48

العميل : ده سعر البكرة ولا سعر القطاعي؟

المهندس منسي : سعر الكيلو

العميل : سواء في البكرة أو قطاعي

المهندس منسي : قطاعي إزاي مش فاهم؟

العميل : يعني لو عايز مثلاً 20 كيلو ـ 50 كيلو

المهندس منسي : لأ كل ما قلت الكمية كل ما زاد السعر

العميل : يعني الكمية لو قلت عن كام كده يبقى زيادة عن 48

المهندس منسي : يعني على الأقل خالص 100-150 كيلو يعني ها يا مسهل يا رب نبدأ نشتغل، إنما أقل من كده ندورك على بكرة ونشوف وزنها ونوزنها وعلى أد ما تطلع هنقولك سعرها هيبقى كذا

العميل : يعني أنا عايز بس أفهم قولي عشان أبقى أنا ما في حاجة، 48 دي سعر البكرة اللي هتديهالي ولا سعر الكيلو لو عايز مثلاً 40-50-60 كيلو

المهندس منسي : 40 كيلو السعر هيزيد

العميل : هيزيد عن 48 جنيه؟

المهندس منسي : آه

العميل : هيبقى في حدود كام؟

المهندس منسي : ما هو في حدود كام على إيه؟ ما هو إنت ما حددتليش الكمية اللي حضرتك عايزها

العميل : هعوز 50 كيلو

المهندس منسي : آه.. هيبقى السعر في حدود 58 جنيه، هوه ال النهاردة بكام يا برنس

العميل : ال وقف حالنا إحنا مش عارفين….

المهندس منسي : وقف حال الدنيا كلها، تصدق وتؤمن بالله، أنا اللي بيجيلي النهاردة عايز يتشري أنا ببقى زعلان وأنا ببيعله، المفروض إن أنا أبقى فرحان وبزغرد ولا أبقى زعلان وأنا ببيعلك؟!! المفروض فرحان، لأ أنا زعلان عشان عارف إن أنا هبيع البضاعة النهاردة مش هعرف أجيبها تاني

العميل : آه…

المهندس منسي : وبعدين وقفولنا الجمارك، وقفولنا الدنيا كلها، ما هو البضاعة دي كلها استيراد

العميل : آه

المهندس منسي : ما هو الألومنيات بتاعت التغليف ديت ما هي كلها استيراد، ما عملناش لغاية دلوقتي ألمومنيات التغليف، إحنا كل العملية إن إحنا بنجمع بس، يعني جمهورية مصر العربية بتجمع بس، فإحنا شغالين باليورو وبال، فأنا ببيعلك وأنا زعلان، أنا نفسي إن أنا أقولك السعر كذا إنت تفرح وتقول أنا جايلك أهو.. الله… زي ما كان بيحصل طول العمر، النهاردة…. كنت أقول لحد السعر أبص ألاقيه ناطط عندي على طول، لأنه فعلاً كان أرخص سعر عندي، بس هوه النهاردة الناس مش متقبلة ذلك، طب أنا هعمل إيه؟ في ناس غيري عملوا إيه؟؟؟ راحوا مقفلين خالص وراحوا موقفين، طب وبعدين؟؟!!! هوه ده حل، خليني قاعد لغاية لما أشوف أخرتها إيه؟

العميل : ربنا يصلح حالنا وحالك يا رب

المهندس منسي : يا رب