خامات وعبوات البي أي تي من شركة المهندس منسي
العميل : سلام عليكم
مهندس منسي : عليكم السلام ورحمة الله وبركاته
العميل : باش مهندس
مهندس منسي : أهلاً بيك
العميل : مساء الفل أخبار حضرتك إيه
مهندس منسي : الحمد لله
العميل : مع حضرتك محمد بدير من المنصورة
مهندس منسي : أهلاً وسهلاً اتفضل
العميل : كنت كلمت حضرتك قبل كده بخصوص خامات بي إي تي
مهندس منسي : آه
العميل : حضرتك افتكرت
مهندس منسي : كنت عايز أمبولات ولا كنت عايز إيه؟
العميل : آه كنت بدور على عبوات بي إي تي حضرتك يومها قلتلي إنك مستورد عبوات اسطمبات كده أزايز مع بعضها وقلتلي هشوف حد لو كده….
مهندس منسي : آه.. آه… عندنا اسطمبات آه
العميل : مساء الفل، أخبار حضرتك إيه
مهندس منسي : الحمد لله
العميل : بقول لحضرتك أنا بعمل الببرونة بتاعت الأطفال اللي هي البزازة دي
مهندس منسي : آه
العميل : فطبعاً إنت عارف الـ بي إي تي فيها منشف للأطفال لأن….
مهندس منسي : مش بي إي تي هي مادة تانية اسمها….
العميل : برانده
مهندس منسي : لأ دي بولي كربونيت
العميل : أنا مش عايز أعملها اللي هي شفافة قوي وناشفة، أنا عايز أعملها عادية اللي هي الرملي
مهندس منسي : لأ هي بتتعمل من بولي كربونيت عشان لو اتغلت في المياه ما تتأثرش
العميل : تمام…
العميل : طيب البولي كربونيت ده هل في حد بيعمل أنبولات بولي كربونيت في مصر؟
مهندس منسي : صدقني مش عارف
مهندس منسي : آه… أنا بشتغل على الاستيراد بس
العميل : معلش سؤال تاني عشان حضرتك خبرة كبيرة وهتفدني يعني، هل البولي كربونيت حقنه بأنبول ونفخه زي الـ بي إي تي ولا مختلف؟
مهندس منسي : نفسه آه نفسه
العميل : نفسه نفس الاسطمبات نفسها ونفس الكشية ونفس….
مهندس منسي : بس بتزود زمن التعرض للحرارة شويه
العميل : اللي هي المجفف
مهندس منسي : آه
العميل : تمام… بولي كربونيت، بيبقى في نسبة إعتام ولا شفافيته عالية؟
مهندس منسي : لا شفافيته عالية آه
العميل : خلاص توكلنا على الله، بس حضرتك ما تعرفش في حد بيعمل أنبول في السوق خالص…
مهندس منسي : أنا علاقتي ببره، مش علاقتي بمصر خالص
العميل : آه.. طب ماشي يا باش مهندس، طب هل لو في مكنة بتعمل الأنبولات البولي كربونيت أو الرندل حاجة صحية رقم 5 وتنفخها موجودة مكنة على بعضها ولا كل خط لوحده اللي هي الحقن لوحده….
مهندس منسي : هي في مكنة بتعمل الـ 2 بتعمل 6، اللي بتعمل 2 شوط مرة واحدة
العميل : يعني بتعمل الحقن والنفخ مرة واحدة؟
مهندس منسي : آه
العميل : تمام… دي أي أنبول أي حجم؟
مهندس منسي : آه أي أنبول أي حجم ولكن يستحسن لغاية 100 مللي، أكتر من كده بتبقى يعني فيها مشاكل
العميل : لا ده إحنا عايزنها لتر ولتر ونص
مهندس منسي : آه.. لأ يبقى مصلحة إنك تشتغل اللي هي المرحلتين
العميل : تمام… تمام.. كتر خيرك يا باش مهندس
مهندس منسي : العفو
العميل : خلاص أنا هدور برده كده هشوف موضوع البولي كربونيت في مصر لو مافيش يبقى هتابع حضرتك بإذن الله ونيجي نقعد مع حضرتك أنا وشريكي ونشوف هنعمل فيها إيه
مهندس منسي : ماشي يا باشا
العميل : ماشي يا باش مهندس كتر خيرك، سلام عليكم
