خط انتاج الصابون السائل في عبوات من شركة المهندس منسي
العميل: السلام عليكم
المهندس منسي: عليكم السلام ورحمة الله وبركاته
العميل: شركة المهندس منسي
المهندس منسي: أيوه
العميل: إزيك يا فندم
المهندس منسي: أهلاً بيك
العميل: لو سمحت كنت عايز أسأل على أسعار المكن بتاع خط الإنتاج بتاع الصابون السائل
المهندس منسي: آه
العميل: كنت عايز أعرف هوه بيبقى عبارة عن إيه الخط وسعره إيه وكده؟
المهندس منسي: هوه الخط بيتحدد بناء على الطاقة الإنتاجية المطلوبة، يعني مثلاً إنت بتقول أنا عايز أنتج مثلاً في اليوم مثلاً ربع طن مثلاً
العميل: مثلاً آه
المهندس منسي: آه.. أو 100 كيلو ـ 200…. بتقول مثلاً إنتاجيتي في الساعة كذا، فنبدأ نقولك آه هتحتاج ميكسر وهتحتاج مكنة تعبئة
العميل: تمام
المهندس منسي: يعني إنت مثلاً لو عايز تعبي في الساعة 100 كيلو يبقى هتحتاج ميكسر 50 كيلو، على أساس إن الميكسر بيخلط الخلطة في نص ساعة
العميل: تمام
المهندس منسي: طب لو عايز تنتج ربع طن في الساعة، يبقى هتاخد ميكسر 150 كيلو، وتاخد معاه مكنة تعبئة… هنا بقى بتقول إن أنا هعبي في عبوات أو في أكياس
العميل: تمام
المهندس منسي: هتعبي في عبوات يبقى مكنة تعبئة خاصة بالعبوات… هتعبي في أكياس يبقى مكنة تعبئة خاصة بالأكياس
العميل: تمام
المهندس منسي: طب لما يكون إنت عايز تعبي نص أتوماتيك ولا أتوماتيك كامل، ليه؟؟؟ عشان الإمكانيات المادية
العميل: تمام
المهندس منسي: يبقى الأول بتحدد خطتك هتبقى إيه، إنت عايز تعبي في الساعة أد إيه، نبدأ نقولك الملائم ليك مكن كذا.. كذا.. كذا…
العميل: طيب تمام، طب لو أنا مثلاً عايز مكنة التعبئة دي تبقى نص أتوماتيك، وتتعبى في عبوات مش أكياس، والميكسر يعني لو إحنا مثلاً… إنت بتقول حضرتك ممكن 50 طن في الساعة أو ربع طن في الساعة؟
المهندس منسي: ممكن 50 كيلو، وممكن 150 ، وممكن ربع طن، وممكن طن…. براحتك، يعني إنت اللي بتحدد
العميل: طيب عشان أقول لحضرتك على حاجة، المشروع لسه بادئه جديد، فأنا مش عايز على أد ما نقدر ما نجيبش حاجة عقيمة قوي، وفي نفس الوقت ما نجيبش حاجة تبقى مكلفة قوي
المهندس منسي: آه.. إنت هتعبي في عبوات ولا في أكياس؟
العميل: عبوات
المهندس منسي: بص يا سيدي كل اللي إنت هتحتاجه ميسكر صغير 50 كيلو يعملك من 100-150 كيلو في الساعة
العميل: ماشي…
المهندس منسي: ده موجود بضاعة حاضرة جاهز
العميل: ماشي
المهندس منسي: ومكنة تعبئة جنبيه صغيرة اسمها ديسك توب برده موجودة بضاعة حاضرة
العميل: دي بتعبي عبوات
المهندس منسي: آه.. تبدأ تشوف سوقك بيها وتتحرك، لقيت العملية اتحركت تبدأ تكبر وتزود وكده…
العميل: طيب الميكسر والمكنة دول يعمله كام؟
المهندس منسي: الميكسر يعمله في حدود، والمكنة في حدود .. إحنا بس بنسمي بال إنما بناخد بالجنيه المصري، عشان بس تفاوت الأسعار
العميل: المشاكل اللي موجودة في العملة دلوقتي يعني
المهندس منسي: آه عشان الجنيه طالع نازل.. طالع نازل… فإحنا بنسمي لأنه أغلب الناس اللي بتسأل دلوقتي بنفذ بعدين
العميل: تمام…. طب لو أنا هاخد حاجة أعلى من كده شويه يبقى بكام وبكام؟
المهندس منسي: هتاخد بقى أعلى من 50، يعني بعد الـ 50 لتر في 100 لتر واخد بالك… المكنة بتاعت التعبئة ثابتة زي ما هي لأنها تقدر تعبيلك في الساعة حوالي نص طن أو طن
العميل: تمام
المهندس منسي: يبقى خليك مثلاً نتكلم في الميكسر، ممكن تاخد 2 ميكسر 50 كيلو
العميل: تمام…
المهندس منسي: واخد بالك، بدل ما تاخد ميكسر واحد تاخد 2 ميكسر، الخلطة اللي تخلص تتعبى، الخلطة اللي تخلص تتعبى… وهكذا
العميل: طيب يعني الأوفر إن أنا آخد ميكسرين ولا آخد ميكسر يعمل شغل الـ 2؟
المهندس منسي: لا والله هوه إنت لو خد ميكسر واحد هيشغلك، أما الميكسرين يبقى بدل ما عندك عربية عربيتين بقى عندك الطاقة طاقتين
العميل: ما إنت حضرتك دلوقتي بتقولي خد ميكسر كمان ولا تقصد إيه؟
المهندس منسي: أنا أقصد إنت دلوقتي بتقول أنا عايز أبدأ
العميل: آه أنا أقصد أجرب في البداية ولو احتجت أجيب ميكسر تاني زيه
المهندس منسي: ولا حاجة، خد ميكسر تاني، وخد ميكسر تالت، وخد ميكسر عاشر… إيه المانع
العميل: مضبوط..
المهندس منسي: يبقى إنت كاتب مثلاً كاتب على الأولاني تشغيلة رقم 1، التاني تشغيلة رقم 2… تروح جاي الميكسر خلص الخلط تبدأ تاخد منه تروح رامي الخرطوم فيه وتسحب منه… وهكذا
العميل: طيب الميكسر يعمل صابون سائل بس ولا يعمل منظفات تانية
المهندس منسي: يعمل ككككككككككل أنواع سوائل الخلط…. هوه بص أنا هقولك على حاجة، الميكسر ده عبارة عن إيه؟؟؟ عبارة عن جهاز خلط ومزج، يعني إنت جبت المكونات بتاعتك عايز تمزجها، هوه مش هيقولك أنا بمزج بس الصابون السائل، لا هوه هيقولك أنا بمزج كل أنواع السوائل
لو عايز تمزج عليه عصير، لبن… أي نوع ولا حاجة، هوه مش هيقول حاجة، اللي هتحطه فيه هيخلطهولك
العميل: تمام… طيب هوه بس عملية الصابون السائل إن هوه يبقى موجود في عبوة بيبقى محتاج بس ميكسر ويتعبى في عبوة ولا في إجراءات تانية محتاجها قبلها، يعني المادة الخامة مثلاً بجيبها بحطها في الميكسر على طول ولا إيه؟
المهندس منسي: إنت بتجيب المواد الخام من شركة الكيماويات وبتحطها ما بعضها، وهوه بيخلطهولك، وبعد ما يخلطهولك بيطلعهولك النعومة بتاعته كده بتبقى جميلة كده، ناعمة كده وممزوج مزج كويس يعني
بعد كده إنت بتاخد ممزوج جاهز بتحطه في العبوة بتاعتك، بعد ما بتحطه، طبعاً إنت بتحطه بمكنة التعبئة اللي إنت أخدتها من عندنا
العميل: آه
المهندس منسي: بعد كده هتحتاج بعد كده إيه مكنة لصق ليبول، إنت في الأول الصق بإيدك، طب ربنا سهلك والدنيا اتحركت، تعالى خد مكنة لصق ليبول
العميل: آه مكنة اسمها إيه؟
المهندس منسي: لصق ليبول
العميل: دي بتعمل إيه؟
المهندس منسي: الورقة اللي بتبقى على الإزازة
العميل: آه اللي هي بتعمل الورقة على طول على الإزازة يعني
المهندس منسي: آه
العميل: دي بتعمل كام دي؟
المهندس منسي: دي بتعمل ، يعني هي لوحدها بسعر الخط كله، فإنت هتاخدها في الأول تزحم نفسك بيها ليه؟؟؟ الصق بإيدك دلوقتي لأنه الطاقة الإنتاجية اللي عندك دلوقتي محدودة، بسيطة
العميل: مضبوط على ما أشوف السوق إيه والدنيا
المهندس منسي: أيوه شفت سوقك ولقيت الدنيا بتتحرك معاك، ابدأ الأول في المنطقة بتاعتك اتحرك في المنطقة بتاعتك، وممكن تهزم نفسك لو المنطقة بتاعتك فيها ناس كتيرة بتصنع، شوف المنطقة اللي جنبك، شوف المنطقة دي، شوف المنطقة دي… لغاية ما تلاقيلك سوق واتحركت هيبدأ الطلبات عندك مثلاً تزيد.. آه هات تاني، هات تالت…
لقيت وإنت شغال رايح تعرض على حد قالك إنت جايب منظفات، آه يا ريتك جبت عصير، لو جبت عصير كنت خدت منك، ولا حاجة، تعالى يا باش مهندس منسي، أنا عايز أعمل الخط ده أخليه عصير، حاضر…. كل اللي عليك إنك تغسله بالمياه وتعبي عليه عصير
العميل: آه
في واحد تاني قالك ده أنا عايزك بقى تعملي كاتشب، ومايونيز وحاجات من دي… إيه الحل يا باش مهندس منسي؟؟؟ ولا حاجة حط مياه وأغسل وشغل
العميل: تمام.. تمام… طب والصابون الصلب برده نفس الخط ده بيعمله ولا خط تاني؟
المهندس منسي: لا الصابون الصلب خط تاني خالص مختلف تمام الاختلاف
العميل: آه.. آه… طيب تكلفته في حدود كام متوسط مثلاً بدون تفاصيل يعني؟
المهندس منسي: ما هوه برده.. لا الصابون الصلب بيبقى تكلفته أعلى ليه بقى؟؟؟ لأنه بيحتاج استرودر، واسطمبات ومكابس
العميل: آه تمام
المهندس منسي: ولكن إنت في بدايتك هتعمل صابون صلب، إنت محتاج طباعة، ومحتاج غلبة
العميل: يعني أفضلي إيه من وجهة نظر حضرتك يعني؟
المهندس منسي: بص هوه دائماً وأبداً الحاجة اللي بتحتاج مجهود عالي ما بتحتجش فلوس كتيرة، والحاجة اللي بتحتاج فلوس كتيرة ما بتحتاجش مجهود عالي
العميل: تمام
المهندس منسي: يعني إنت دلوقتي في مقتبل الحياة وعايز تعمل حاجة وتعتمد على مجهودك البشري
العميل: مضبوط
المهندس منسي: يبقى تبدأ بالصابون السائل
العميل: الصابون السائل، وهلاقيله سوق والدنيا هتمشي فيه
المهندس منسي: هيحتاج منك مجهود بشري إيه؟؟ المجهود اللي إنت هتحتاجه في التسويق والتوزيع، يعني إنك هتبدأ تاخد المنتج بتاعك وتجري وتلف وما تزهقش، مرة و 2 و 3 لأنك بتفتح سوق ودي أصعب مرحلة
العميل: مضبوط..
المهندس منسي: إنك إنت بتنشئ عملية لحسابك، جست إنك مجرد خلاص ضبطت عملائك بدأت خلاص تستريح بقى، تبدأ تعتمد على إنك توفر بقى وتعمل إنتاجيات أعلى وحاجات من دي
العميل: مضبوط
المهندس منسي: في البداية إنت هتتعب شويه في تسويق المنتج
العميل: تمام
المهندس منسي: يعني إنت بتنتج منتجك، وبتعمله بشكل حلو، شكل يليق عشان برده يلقى قابلية العميل
العميل: عن الناس آه
المهندس منسي: وتنزل تتوكل على الله، ونصيحة لوجه الله انزل باسمك إنت، باسم إنت تختاره، ما تروحش جاي ماسك ماركة وطريق سهل يا الله ألد الماركة دي وخلاص، أنا عايز أكسب وخلاص
العميل: لا ما ديت مافيش فاتي… إنما لو في اسم أتعب فيه في الأول أفضل
المهندس منسي: كل العملية كأنك بتخطف من زرع غيرك
العميل: مضبوط
المهندس منسي: هتفضل تخطف طول العمر؟
العميل: لأ ما ينفعش طبعاً
المهندس منسي: إنما النهاردة المهندس منسي مثلاً لما بدأ، بدأ بإيه؟؟؟ بدأ بمكتب، النهاردة الحمد لله عدد من الفروع على مستوى العالم
العميل: ما شاء الله ربنا يزيدك
العميل: تمام
المهندس منسي: فالناس علمونا صح، قالك ابدأ باسمك إنت ولو على مدى هيكون بعيد، بس في الآخر المحصلة صح
العميل:يعني مثلاً الصابون السائل اللي أطلعه باسم لنفسي، الحاجة اللي أطلعها يبقى اسمي موجود…
المهندس منسي: وات إيفر أياً كان الاسم، إن شاء الله حتى يكون الاسم هالولا، أياً كان الاسم، في الآخر هتلاقي الاسم… يعني في قنوات تبص على النت تلاقي قنوات أساميها هايفة بس في الآخر مشهورة، ليه؟؟؟ لأنه هوه تعب في اسمها، هوه شايف الاسم ده كان كويس، ولكن هوه قدم إيه؟؟ قدم منتج كويس على حاجاته
العميل: خلى الناس تقبل عليه
المهندس منسي: هوه تعب على الاسم وفي الآخر الاسم أخد مصداقية من المنتج نفسه، المنتج هوه اللي ادى الاسم احترام
العميل: مضبوط تمام
المهندس منسي: يعني هوه لما جاهد في مرحلتين 2: جاهد في إنه الاسم يبقى محترم، وجاهد في إنه ينشر اسم، ومع ذلك انتشر وبقى حاجة كويسة، وبقى تمام و.. و… وهكذا
العميل: تمام..
المهندس منسي: وبعدين هوه في حاجة أنا هقولك، دائماً وأبداً أي واحد لما بيركز في شغلانة واحدة هي دي اللي شاغل نفسه فيها، صدقني بيبدع فيها
العميل: مضبوط..
المهندس منسي: بيبدع ويتقن فيها
العميل: بتبقى عايزه صبر في الأول بس شويه… خلاص ماشي يا فندم، طيب عايز آجي لحضرتك مثلاً أقابلك، بتبقى مواعيدك إيه؟؟؟ ولا آجي فين؟؟؟
المهندس منسي: بص هوه أنا استشاري الشركة، بلف على الفروع كلها، فهوه أنا ممكن أبعتلك ارقام الشركة وتابع معاهم
العميل: تمام… إن شاء الله فتحة خير، وأنا هكلم حضرتك تاني، يعني إنت مثلاً ممكن الميعاد اللي أعرف أقابل حضرتك فيه إمتى؟ أو أقابلك فين؟
المهندس منسي: مش شرط تقابلني، إنت كل اللي عليك تروح تقولهم أنا عايز ميكسر 50 كيلو، وعايز مكنة تعبئة ديسك توب… آه إحنا عندنا حدائق القبة، مدينة نصر، باب الشعرية، 6 أكتوبر
العميل: طب أقرب حاجة ليا إيه لو أنا هاجي من أجا كده
المهندس منسي: والله ما عارف إنت اختار الفرع اللي هيعجبك وتوكل على الله عليه، أنا بعتلك رسالة دلوقتي فيها عدد من التليفونات تابع بقى مع أي حد فيهم
كل اللي عليك بس قولهم أنا عايز ميكسر 50 لتر أخلط بيه صابون سايل، وعايز مكنة ديسك توب وبس
العميل: تمام
المهندس منسي: توكل على الله واشتغل كده بداية
العميل: طيب هقول لحضرتك على حاجة، أنا محتاج أدرس حاجة كدراسة جدوى، أو أروح أشوف الموضوع هيكسب إيه وبتاع وكده، ولا الدنيا تمشي إزاي؟؟؟
المهندس منسي: تمام … وفي الأول مش هتكسب كتير، اكسب بسيط جداً، يعني ادي لنفسك على الأقل سنة كده حاجة اسمها تعليم … ما هو لما أعمل إنتاجية عالية الربحية هتزيد
العميل: مضبوط
المهندس منسي: لا إن شاء الله ربنا ينجحك في مصنعك الجديد إن شاء الله
العميل:عايزين نعمل حاجة جديدة كويسة نقدر نشتغل فيها تمشي معانا، فلما جيت أسأل لقيت الأقرب ولقيت رأسماله برده يعتبر كويس لقيت موضوع المنظفات الحاجات ديت المنظفات كلها بأنواعها دي حاجات سهلة
المهندس منسي: هوه عموماً مشاريع التعبئة والتغليف كلها مشاريع واعدة وكويسة، ومكسبها حلو، وتعتبر قايمة نايمة، مافيهاش خسائر كتير، مافيهاش خسائر عموماً لسبب بسيط، لأنك بتجيب المنتج وكل اللي عليك إنك تمسكه تعبيه
العميل: تمام
المهندس منسي: إنت ممكن تجيب الصابون السائل جاهز، وكل اللي عليك إنك تعبيه… وبعدين إنت أكبر الشركات كلها النهاردة تلاقيها شركات تعبئة وتغليف
العميل: تمام…
المهندس منسي: ماشي توكل على الله بقى وشوف بقى النظام إيه
العميل: خلاص ربنا يسهل أضبط الموضوع كده، وكده كده إنت بعتلي الأرقام في الرسائل
المهندس منسي: آه بعتهالك آه
العميل: بقول لحضرتك الموضوع ده بيحتاج ترخيص ولا حاجة، ولا ممكن نشتغل عادي من غير ترخيص
المهندس منسي: ولا حاجة ممكن تبدأ تشتغل إنت هتعمل حاجة بيتي كده في الأول
العميل: آه…
المهندس منسي: وعادي لو عايز تقدم على ترخيص في الأول عادي مافيش مشكلة
العميل: طب التراخيص ديت بتتاخد منين مثلاً، صحة، ولا منين؟
المهندس منسي: ولا أي حاجة، إنت بتروح بتقدم على الرخصة وتشتغل، إحنا في بلدنا بنشجع الصناعة جامد ما تقلقش
العميل: ماشي يا باشا، على العموم اتشرفنا بحضرتك، ولو في أي حاجة معلش هأبقى أزعج حضرتك تاني لو في حاجة تاني محتاجنها
المهندس منسي: إن شاء الله خد راحتك يا باشا
العميل: ماشي
المهندس منسي: ماشي يا غالي
العميل: متشكر لحضرتك
