خط صناعة وانتاج الصابون السائل من شركة المهندس منسي

العميل : أيوه يا باش مهندس

مهندس منسي : أيوه اتفضل

العميل : أنا كنت كلمت حضرتك إمبارح بالنسبة لخط إنتاج الصابون السايل

مهندس منسي : آه

العميل : تمام.. كنت عايز أعرف بس الأسعار عشان الورقة راحت مني

مهندس منسي : آه همه مكنتين مافيش غيرهم

العميل : اللي هوه الخلط والتعبئة، تمام…

مهندس منسي : إنت لو هتشتغل في عبوات يبقى خلط وتعبئة، لو هتشتغل في أكياس، يبقى خلط ومكنة تعبئة نص أتوماتيك ومكنة لحام معاها

العميل : لأ هشتغل عبوات

مهندس منسي : يبقى خلط ومكنة تعبئة معاها، مكنة الخلط بتبدأ من

العميل : هي سعتها كام؟

مهندس منسي : في حدود 100 لتر، يعني تعملك مثلاً 600 لتر في الساعة

العميل : تمام.. بالنسبة لمكنة الخلط اللي بتاخد نص طن أو طن

مهندس منسي : ما هوه أنا يا ابن الحلال، أنا مش عارف ليه كلنا بنيجي في الأول ونقول إحنا عايزين نعمل 5 طن، عايزين… يا ابن الحلال

العميل : لأ أنا قلت نص ما قلتش 5 طن

مهندس منسي : اتعب الأول وابدأ، أنا بنصحك لوجه الله بس، إنما أنا إنت هتقولي نص طن هقولك عادي سعر النص طن كذا، بس في الآخر إحنا بنكسر في دماغنا

العميل : تمام.. أنا كده فهمت حضرتك، نبدأ باللي هي 100 لتر دي بـ

مهندس منسي : صلي على النبي

العميل : عليه الصلاة والسلام

مهندس منسي : إنت شاب، عندك باور، عندك طاقة

العميل : تمام…

مهندس منسي : وماعكش فلوس، معاك فلوس بس مش كفاية، ودي طبيعة أي مشروع صغير، فأبدأ أعمل إيه، أجيب الباور الطاقة وأوظفها تبقى فلوس، أقول لمعاليك معلش أنا بحاول أرشد بما يرضي الله والأرزاق بيد ربنا، بص يا سيدي وحد الله

العميل : تمام.. لا إله إلا الله

مهندس منسي : أنا دلوقتي معايا إمكانية تجيب عربية على الأد وأبدأ أشتغل أجيب أي حاجة، لما ربنا يسهلها والدنيا تعلى أبدا أجيب عربية أكبر

العميل : كلام مضبوط تمام

مهندس منسي : فأنا هستخدم شبابي وقوتي لأنه الباور، لأنه ممكن برده يبقي كبير ويبقى قوي، ولكن الباور اللي هوه التفاؤل اللي هوه ببني مستقبل، ممكن يبقى في السبعينات وقوي وقوته أعلى منك، ولكن أنا بتكلم في التفاؤل، نظرة التفاؤل عندك إنت أعلى

العميل : تمام…

مهندس منسي : بالتأكيد أعلى، فالباور اللي عندك دوت وظفه في مقابل المادة، معناها إن أنا دولقتي ممكن أجيب 600 لتر وما أجيبش 100 لتر، لأنه 600 لتر هيعملي 600 مرة واحدة، أما الـ 100 لتر هيعملي 600 لتر على 6 مرات في الساعة، فده كده أنا هبذل مجهود، ماشي أبذل مجهود دلوقتي في مقابل إن أنا أشتغل بس

العميل : تمام.. تمام.. أنا فهمت قصدك يا باش مهندس خلاص

مهندس منسي : لا عادي بص أنا أديلك أسعار كل حاجة، أنا عامل الأسعار بتاعتي وحاططها على النت، مافيهاش مشكلة بالنسبة لي، ولكن أنا بنصح وخلاص

العميل : والله يا باش مهندس أنا دخلت على الموقع بصراحة مش فاهم الأسعار، الصراحة يعني

مهندس منسي : لأ عادي أنا وظيفتي إن أنا أفهمك، وأمسك بإيدك حتى لو… صدقني حتى لو مش هتشتري، أنا مش فارقة معايا تشتري ولا ما تشتريش

العميل : أنا والله ناس كتير شكروا فيك، وأنا بتصل عشان بصراحة أنا عايز أشتغل وحياة ربنا

مهندس منسي : لا ربنا ييسر لك أمورك إن شاء الله

العميل : أنا عايز.. أنا جنبي أهوه القاضي، بس القاضي دوت أنا يعني… أنا لقيته بيزق في الكلام وكده، قلتله على إيه؟؟؟ فبسأل فقالولي يا باش مهندس…

مهندس منسي : ما تدخلنيش في منافسة مع حد لأنه أنا شايف…

العميل : مش منافسة والله

مهندس منسي : أنا جاي لحضرتك، مافيش حد في مصر في الكرير بتاعي، أنا مش تاجر، أنا صاحب رسالة، يعني أنا بعمل إيه؟؟ أنا مصنع وفي نفس الوقت بدل وبالخير، يعني عايز تتصل تاخد معلومة خش على الموقع أكيد لازم هتكتسب معلومة

العميل : تمام

مهندس منسي : ولو حضرتك عايز تستفسر عن المعلومة قولي، وأنا مش هتأخر عنك

العميل : ربنا يخليك يا باش مهندس، أنا دلوقتي عايز أعمل اللي هوه خط الصابون السايل، كنت عايز مكنة الخلط ديت وحتى لو 4 نوازل أو 6

مهندس منسي : بص يا سيدي، الإمكانيات المادية بتاعتك هل متاحة للـ 4 نوازل أو 6

العميل : تمام

مهندس منسي : أنا هقول لحضرتك على حاجة، أنا هخليك إنت اللي تعمل دراسة الجدوى بتاعتك بنفسك، معناها إن أنا هديلك أسعار كل حاجة وأفهمك كل حاجة وإنت عايزك مع نفسك كده تمسك ورقة وقلم وتقول أنا فين، يعني مش أنا المهندس منسي، اسم الكريم إيه؟

العميل : اسمي كريم يا فندم

مهندس منسي : بص يا سيدي هتقول أنا كريم فين؟؟؟

العميل : تمام

مهندس منسي : فين في النقطة دي

مهندس منسي : بص يا سيدي، الأول نقول إنت هتعبي الحاجة دي في أكياس ولا عبوات؟

العميل : عبوات، اللي هي اللتر والـ 3 لتر

مهندس منسي : بص يا سيدي إحنا عندنا نوعين، نص أتوماتيك ونوع أتوماتيك، أنا هقولك على كل حاجة، هقولك على الأتوماتيك وهقولك على النص أتوماتيك، وهقولك على الواحد نزل، والـ 2، والـ 4، والـ 6، والـ 12 والـ 24، وإنت امسك ورقة وقلم كده بعد إذنك يا عم كريم

العميل : أنا معايا

مهندس منسي : أو سجل المكالمة دي أو دي براحتك، أنا مش هنزعج لما تكون مسجلي لأني أنا ما تكلمش حاجة غلط

العميل : لأ مش على التسجيل

مهندس منسي : أنا بقولك أنا مش فارقة معايا، أصل ده تليفون تجاري، يعني تليفون شركة، مش هيبقى في حاجة غلط

العميل : إنت أخ كبير وأنا أخدك قدوة والله من الكلام اللي أنا سمعت عنك

مهندس منسي : الله يبارك لك يا رب، بص يا سيدي، إحنا بتكلم في المكسر الأول، في مكسر 50 لتر، وفي 100 لتر، وفي 150، وفي 200، وفي 500، وفي مكسر ألف

مهندس منسي : لما نيجي نقول الـ 50 لتر، المكسر دوت اللي هوه الخلاطة، يعني هوه المسئول عن خلط المكونات بتاعتك، يعني حضرتك هتجيب المكونات من الكيميائي هتروح حاططها في المكسر دوت، هوه ده المسئول عن عملية الخلط، بيشتغل في اتجاه واحد، يعني إنت لو مسكت الصابون وقلبته في اتجاهين مختلفين، بيحصل كونفلكت، فهنا أول حاجة الخلاطة الـ50 لتر سعرها حوالي، الـ 100 لتر سعرها ، الخلاطة الـ 150 سعرها ، الخلاطة الـ 250 سعرها ، الخلاطة الـ 500 لتر سعرها ، وفيه خلاطة الألف لتر سعرها

العميل : تمام…

مهندس منسي : إحنا عدينا المرحلة دي خلاص، تيجي تقولي يا باش مهندس طب أنا معيش إمكانية إن أنا أجيب خلاطة، هل في طرق بديلة إن أنا أخلط وأتعب شويه، أقولك آه… ممكن تجيب خزان، الخزان ده كل سعره 600-700 جنيه

العميل : خزان زي بتاع المياه دوت اللي بيتحط في البيوت

مهندس منسي : الله ينور عليك

مهندس منسي : وتروح جايب حاجة اسمها مواتير خلط، ماتور الخلط ده سعره في حدود 2000 ـ 3000 جنيه كده يعني، بريشة، حاجة اسمها ماتور خلط بريشة، وأروح مركب ماتورين 3 في قلب الخزان، والخزان بيشيل 2 طن

العميل : طب بعد إذنك يا باش مهندس ماتور واحد في الخزان ولا ماتورين؟

مهندس منسي : لو أنا حطيت ماتور واحد يبقى المدة هتزيد معايا، لأنه هي نسبة وتناسب، طب لو حطيت 5 مواتير، يبقى هاخد الخلطة بتاعتي بعد 25 دقيقة

العميل : تمام..

مهندس منسي : طب لو حطيت 3 مواتير اللي هي الطريقة الازدواجية، هاخد الخلطة بتاعتي مثلاً بعد ساعة

العميل : تمام…

مهندس منسي : طب لو حطيت ماتور واحد هاخد الخلطة بتاعتي بعد 5 ساعات

العميل : تمام…

مهندس منسي : فهتمني

العميل : تمام يا باش مهندس

مهندس منسي : يبقى إحنا عدينا كده مرحلة الخلط

العميل : تمام، معانا الخلاطة ومعانا الخزان

مهندس منسي : دي أو دي، حسب الظروف المادية، وحسب وضعنا هيبقى إيه

العميل : تمام.. طب بعد إذن حضرتك يا باش مهندس يعني لو ما مشيناش إحنا في الخلط وحضرتك جبتلنا خزان وعملته لنا هل في إمكانية يعني إن حضرتك تعمله لنا ولا…

مهندس منسي : آه.. آه.. عادي أنا بساعدك عادي، ولو إنت عملته بره أنا مش هزعل

العميل : لأ أنا ما أعرفش حد بره، أنا بسأل حضرتك هل في إمكانية إن حضرتك تعمله؟

مهندس منسي : بص وحد الله أنا كل العملية إن أنا بفيدك وعملية البيع والشرا ديت يعلم ربنا ما في دماغي

العميل : أنا بستفاد من حضرتك

مهندس منسي : نعملها ما عندناش مشكلة

العميل : أنا بسأل في إمكانية حضرتك تعملهالي آه، مافيش أشوف حد يشوفهالي كده يعني، قصدي كده والله

مهندس منسي : أي حاجة إن شاء الله قادرين عليها، طالما فاهمنها إن شاء الله قادرين عليها

العميل : ربنا يخليك يا باش مهندس يا رب

مهندس منسي : نيجي بقى للمرحلة التانية مرحلة التعبئة، مرحلة التعبئة أول مكنة اسمها ديسك توب واحد نزل، ديت بتعمل

العميل : دي تعمل كام إزازة في الساعة؟

مهندس منسي : في حدود ألف، من 800 ـ ألف حسب سرعة اللي واقف عليها، بس ألف إزازة إيه بقى؟ ربع ولا 10 ولا.. ولا.. ولا… لما نيجي نتكلم نتكلم في عبوات إيه؟؟؟ إحنا بنقول ألف دايماً في أعلى حاجة، ولكن لما تيجي تقول في اللتر لأ تنزل الكمية، طب لما تيجي الديسك توب عايز تخليها 2 نزل، بتاخد مكنتين وتاخد الكلاتش بتاعها اللي هوه الدواسة بتاعتها وتروح دامجها الـ 2 في بعضها، يعني تشيل الدواسة التانية وتروح دامج دي في بعضها بقت معاك مكنة 2 نزل

العميل : تمام.. بس في نفس الوقت مكنتين يا باش مهندس

مهندس منسي : ما هو إيه المانع

العميل : أنا كنت عايز مكنة واحدة

مهندس منسي : يا حبيب قلبي لما تكون مكنة واحدة 2 نزل، ما هي بسعر الـ 2 نزل

العميل : لأ أنا كان قصدي مكنة واحدة في 2 نزل، 4 نزل، كده

مهندس منسي : إيه بقى المرجو أو إيه الفايدة؟

العميل : لأ أنا شفتها قبل كده عند ناس في القاهرة…

مهندس منسي : أنا عندي الـ 4 نزل مرة واحدة، وعندي 2 نزل مرة واحدة، بس مش في الديسك توب، الديسك توب دي بجيبها وحدات مع بعضها، عايزها تبقى مكنة واحدة يا ابن الحلال تروح ماسك المكنة دي مركبها على المكنة دي وتروح مشمبرها عملها شمبر وتروح منزل الـ 2 نزل، بقت مكنة واحدة، ما هو أنا بشوف بس إيه الفايدة من تعدد الوحدات؟؟ إيه الفايدة من إن الوحدات من غير الكلكعة اللي جوه، خلي بالك في حاجة، كل ما إنت بسطت الدنيا كل ما سهلت معاك في خدمة ما بعد البيع

العميل : تمام…

مهندس منسي : ما علينا نيجي نتكلم في الواحد نزل، الواحد نزل في الديسك توب تقدر تخليها 2، 3، 4، 10، 24

العميل : في مكنة واحدة ولا…

مهندس منسي : ما هو أنا جيلك أهوه، تعدد الوحدات وبعدين تعمل هيكل يلملك الـ 4 مكنات مع بعض، بقت 4 نزل، عايز نعملها لك نعملها لك، بس هناخد منك تكلفة إن إحنا عملنا بدي بقت مكنة واحدة، يعني جيبنا الـ 4 مكنات وروحنا مركبينهم مع بعض ورحنا عملين لهم بدي بقت مكنة واحدة

العميل : تمام..

مهندس منسي : يعني بدل ما يكون النزل بـ يعني ، وناخد تكلفة البدي ما حسبنهوش لسه، لأنه ما حدش طلبها مننا، همه بياخدوها ويربطوها جنب بعض، معايا، كده إحنا انتهينا من الديسك توب نخش على وحدات التعبئة بالهوا نيوماتيك

العميل : تمام..

مهندس منسي : اللي هي وحدات التعبئة البستمية، يعني الديسك توب دي تقنية في التعبئة، ووحدات التعبئة البستمية دي تقنية تانية خالص

العميل : تمام…

مهندس منسي : لما نيجي نتكلم على الواحد نزل في النيوماتيك أو في الهوا، اللي هي بستمية

العميل : اللي هي كمبروسر الهوا

مهندس منسي : آه معاها كبروسر هوا، لازم يكون في كبروسر هوا عشان خاطر تشتغل، ديت بتعمل إيه… دي يا سيدي الواحد نزل بتعمل على الكيلو، وبتعمل على الـ 500 مللي

العميل : معلش بكام يا باش مهندس؟

مهندس منسي : هتبقى ، إنت هتعبي لتر ولا هتعبي نص؟

العميل : لأ لتر يا فندم

مهندس منسي : اللتر يبقى ، لو نص يبقى

العميل : تمام…

مهندس منسي : الـ 2 نزل بتعمل ، الـ 4 نزل..

العميل : اللي هي اللتر برده؟

مهندس منسي : آه.. الـ 2 نزل يعني تعبي الـ 2 في ضربة واحدة

العميل : تمام…

مهندس منسي : الـ 4 نزل ، بص يا سيدي، لو عايز 48 نزل و600 نزل تقدر

العميل : لأ إحنا بكتيره قوي 4 نزل

مهندس منسي : ما هو أنا بقولك لو عايز 8 نزل هتجيب الوحدة الـ 4 نزل تركبها جنب الوحدة الـ 4 نزل وتروح عملها هيكل يبقوا كلهم مع بعضهم في حته واحدة، هي كل العملية إن إحنا جبنا الوحدات ركبناها مع بعضها ورحنا عملين لها كنترول كهربا واحد بس، مافيش أكتر من كده، أي حاجة تانية بقى مكلكعة مش تبع شركتنا، لأن شركتنا بحاول تبسط وتسهل للعميل لأنه العميل عندنا ما عندوش ثقافة صناعية عالية، فبنضطر نسهل ونبسط المكن قوي عشان خاطر ما نخشش في متاهات خدمة ما بعد البيع نتعب

العميل : تمام.. صح كلامك صح يا باش مهندس، طب بعد إذن حضرتك يا باش مهندس

مهندس منسي : نعم

العميل : حضرتك تفضل أنهي، الديسك توب ولا اللي هوه بالكمبروسر الهوا؟

مهندس منسي : والله أنا رأيي بقى إن  حضرتك تيجي تشرفني لأنه هوه العملية فرق إمكانيات مادية، الفرق أفضلك طبعاً أم كمبروسر هوا

العميل : تمام

مهندس منسي : بس افرض الإمكانيات المادية مش مساعداني يا أخي دلوقتي، وعايز أشتغل، أشتغل بالديسك توب، هتشتغل وهتبقى زي الفل، مافيهاش أدنى مشكلة

العميل : تمام..

مهندس منسي : خلي بالك أنا الديسك توب ديت عاملها مخصوص للناس اللي لسه بتبدأ، ومش عايز يغامر بمبلغ كبير، عايز يجرب سوقه، كده، بتشتغل وزي الفل، ولكن السرعة التانية، التانية أسرع

العميل : صح التانية أسرع أم كمبروسر الهوا

مهندس منسي : آه.. إنما ديت الديسك توب نظام بامب، نظام طرمبة، هتقعد ززززززززز لغاية ما تملهالك، إنما التانية بقى اللي هي البستمية أو أم كمبروسر هوا اسمع مني كده تعمل تك تك..

العميل : عارف عندي في الزيت دي

مهندس منسي : عندك في البيت؟

العميل : في الزيت.. مصنع الزيت

مهندس منسي : آه.. آه… يعني تك تك، يعني ألف مية يعني في الثانية تكون منزلة الكمية بتاعتها…

العميل : تمام.. كلامك مضبوط يا باش مهندس، لو حبينا نقلب بتاعت الزيت ديت لصابون سايل يبقى فيها تعديل ولا…

مهندس منسي : لا ولا حاجة تقدر تعبيلك صابون سايل وتقدر تعبيلك زيت، وتقدر تعبيلك شامبو، وتقدر تعبيلك كل حاجة بس لازم تغسلها تمام التنظيف

العميل : آه .. تمام

مهندس منسي : لأنه في حاجات دخلت في النتوءات اللي جوه لازم هتكرف

العميل : تمام…

مهندس منسي : لازم تنظفها كويس قوي قبل ما تقلبها من صابون لزيت

العميل : تمام يا باش مهندس، يعني حضرتك دلوقتي مكنة اللي هي أم كمبروسر الهوا ديت بكمبروسر الهوا بتاعتها، وإحنا نختار بقى الخلط، بالنسبة لخزان يا مكنة الخلط

مهندس منسي : إن شاء الله

العميل : تمام، هشوف كده يا باش مهندس وهبقى أرد على حضرتك

مهندس منسي : أتمنى إن أنا أكون أفدتك ولو بمعلومة

العميل : ربنا يخليك يا باش مهندس، يا رب ما نتحرمش منك يا رب

مهندس منسي : الله يبارك لك

العميل : الله يخليك يا باش مهندس

مهندس منسي : ماشي مع السلامة