رولات تغليف اكياس النسكافيه من شركة المهندس منسي

العميل: سلام عليكم

المهندس منسي: عليكم السلام ورحمة الله وبركاته

العميل: شركة المهندس منسي للصناعات الهندسية

المهندس منسي: أيوه

العميل: أخيراً لقيت تليفون صح لأن التليفونات كلها اللي اتصلت بيها كلها غلط، حضرتك بتعملوا….

المهندس منسي: حضرتك تليفونات إيه اللي اتصلت بيها؟

العميل: أنا بدور على شركة تكون بتنتج مواد تعبئة، فخدت كام تليفون من على النت

المهندس منسي: آه… مش إحنا يعني تليفونات تانية

العميل: لأ إنتم حاطين رقم أرضي والموبايل بس أنا بتأكد من الموبايل، حضرتك بتنتج الأفلام اللي أقدر أعمل بيها باكت بتاع النسكافيه أو الكابشينو وكده، الأفلام

المهندس منسي: آه الخدمة دي موجودة عندنا آه

العميل: طيب أنا هحتاج أحط رسم معين عليها، مش هبقى، أنا جديد في الموضوع بس عشان كده بسأل حضرتك

المهندس منسي: لأ إن شاء الله موجوده

العميل: بالرسومات اللي أنا أحطها على المنتج؟

المهندس منسي: إن شاء الله

العميل: طيب حضرتك ممكن آجي لسعادتك النهاردة على الساعة 5 لو ينفع؟

المهندس منسي: ماشي هبعتلك العنوان في رسالة حالاً عندنا حدائق القبة، مدينة نصر، باب الشعرية

العميل: أنا ساكن في حدائق القبة على فكرة

المهندس منسي: أبعتلك فرع حدائق القبة يعني؟

العميل: فرع حدائق القبة أو آجي أقابل حضرتك أجيلك الفرع الرئيسي باب الشعرية

المهندس منسي: طيب ماشي هبعتلك فرع باب الشعرية دلوقتي حاضر

العميل: يعني آجي أوري حضرتك الصور وأقعد…

المهندس منسي: آه ما حضرتك هتيجي باب الشعرية هتلاقي في ناس بتوع مبيعات هتقعد معاهم وتوريلهم كل حاجة وما تقلقش يعني

العميل: كويس

المهندس منسي: ماشي يا غالي

العميل: طيب حضرتك ممكن أعرف الأسعار مبدئياً الرول العادي دوت….

المهندس منسي: هيبقى للكيلو

العميل: مش بالجنيه يعني ولا إيه…

المهندس منسي: عادي ما هو ال بيتحسب بالجنيه، ما هو الجنيه عمال ينزل….

العميل: حضرتك قلتلي أنا حسيت إن أنا في أمريكا

المهندس منسي: لا ده هو بس ال عملة ثابتة نسبياً بس، إنما الجنيه عمال ينزل.. ينزل.. ينزل، طب أنا هديلك سعر النهاردة، إحنا تعاملاتنا كلها بال، بكره أبص هلاقي الحاجة كلها نزلت….

هوه انتوا ما بتصنعوش الرولات دي عندكوا

المهندس منسي: لأ ما بنصنعهاش للأسف..يعني بنجيبها خامة وحضرتك بتحط عليها الطباعة وحاجات من دي

العميل: أيوه.. آه.. آه…يعني ما بتعملش في مصر يا باش مهندس معقولة، كل تغليف الأكياس والبوزو والشيبسي كله كله بيجي من بره

المهندس منسي: كله كله بيجي من بره

العميل: ده إحنا بناكل الحاجة وبنرميها، لما آجي أنا أعملها ألاقي نفسي بنجيبها من بره؟؟!!!

المهندس منسي: إذا كان الدقيق اللي بيتعمل منه الحاجة دي بييجي من بره، يبقى الخامة دي وتغليفها هيجيي من جوه؟؟!!!

العميل: لا إنت عارف حضرتك أنا تخيلت الماتيريال الأصلي اللي هوه الليكويد بتاع الحاجة دي إنت تاخدها تحطها في مكنة تبدأ تديك الرول ده، إنما ما تخيلتش إنك تجيب الرول نهائي وتحط عليه الرسمة وخلاص

المهندس منسي: آه…..

العميل: ولكن أياً كان بقى مش مشكلة، طب حضرتك معلش هل أنا مطالب بكميات معينة، لو أنا مثلاً هعمل عينات لمنتج  في ولا لأ؟

المهندس منسي: آه على الأقل خالص ربع طن

العميل: طب آخد بقى عنوان باب الشعرية

المهندس منسي: هبعتهولك في رسالة حالاً

العميل: حضرتك بقى المهندس مين؟

المهندس منسي: المهندس منسي مع حضرتك

العميل: صاحب الشركة طب أهلاً وسهلاً بسعادتك يا فندم

المهندس منسي: أهلاً وسهلاً بيك

العميل: معاك محمد بهاء يا فندم

المهندس منسي: أهلاً وسهلاً

العميل: هستنى مكان باب الشعرية وهاجي لحضرتك

المهندس منسي: إن شاء الله

العميل: تسلملي يا فندم.. شكراً