رولات فاكيوم ميتالايز من شركة المهندس منسي

العميل: سلام عليكم.

المهندس منسي: وعليكم السلام ورحمه الله وبركاته.

العميل: شركة المهندس منسي؟

المهندس منسي: أيوه.

العميل: والله أنا شفت على النت رولات فاكيوم واخده ميتالايز.

المهندس منسي: رولات فاكيوم واخده ميتالايز، آه.

العميل: يعني فضي أو ذهبي.

المهندس منسي: آه عندنا آه.

العميل: طيب ميكرون وعرض الرول كام.

المهندس منسي: لا إنت اللي بتقول عايز كام ميكرون..

العميل:يعني مفيش حاجة مثلاً موجودة.

المهندس منسي: الحاجات دي إنت اللي بتقولها مش إحنا اللي بنقول، يعني بتقول أنا عايز كذا كذا كذا كذا، وبنعملك اللي إنت عايزه.

العميل: حضرتك ممكن تصنعه.

المهندس منسي: ما إحنا بنصنعه.

العميل: جميل جميل.. جميل، أنا أول مرة أعرف إنه بتصنع في مصر دي حاجة جميلة جداً.

المهندس منسي: الحمد لله.

العميل: طيب الطن بكام يا فندم، وأقل أوردر أعمله أد إيه؟

المهندس منسي: حسب الكمية اللي إنت عايزها.

العميل: طب السعر كام وأنا… يعني إديني شرائح للأوردر.

المهندس منسي: هنختبر بعض، هوه السعر بيتحدد بناء على الكمية، يعني كمية الربع طن غير كمية الطن، غير كمية الـ 5 طن، فأنا…

العميل: طب الـ 5 طن لو أنا خدت.. أكبر شريحة فيها خصم أد إيه الـ 5 طن؟

المهندس منسي: بص أكتب على النت لو إنت عايز تقرا معلومات اكتب على النت طباعة أكياس المهندس منسي.

العميل: طيب أنا بشتغل بالبي بي سي أو الفاتيوم ده بعمله آيات قرآنية ذهبي وفضي يمكن إنت شوفتها عندك في القاهرة.

المهندس منسي: آه.

العميل: اللي هي في البراويز، دي إحنا كنا بنجيبه من الصين، فلو لقيته هنا في مصر يبقى أفضلنا جداً.

المهندس منسي: إن شاء الله.

العميل: أنا ممكن آخد منك 5 طن، 10 طن طالما بتعمله بالمقاس اللي عايزه.

المهندس منسي: أكيد آه.

العميل: مش كده.

المهندس منسي: أكيد آه.

العميل: طيب السعر ممكن يكون كام؟

المهندس منسي: اللي هوه المفضض وكده هيبقى حوالي للكيلو.

العميل: 5…كتير جداً ده الصين كده أرخص بكتير.

المهندس منسي: آه ما هوه عبال ما تشحنها وتجيبها الوضع هيختلف.

العميل: طب ماشي مش هتقف عليا بـ 20000 جنيه مصري.

المهندس منسي: بكام؟

العميل: الطن يعني.

المهندس منسي: آه.. يبقى أنت بتتكلم في خامة وأنا بتكلم في خامة تانية..أستأذنك بس ابعتلنا صور للحاجة اللي إنت عايزها أو ابعتلي عينة وأنا أقولك دي وضعها إيه.

العميل: أنا كنت عايز أجيلك القاهرة أكلم معاك.

المهندس منسي: إنت تيجي تنورني في أي وقت.

العميل: أنا عايز بي بي سي بيكم فيل، يعني حاجات للتعبئة والتغليف، اللي بيتعمل منها علب البيض…

المهندس منسي: لما تيجي تقارني تقارني بالصين في قلب الصين، هوه الحاجة جت من الصين طايرة، ما هي اتشحنت واتحط عليها جمارك و، و، و، ما الحاجات دي كلها مش ببلاش، يعني إنت بتقول مثلاً….

العميل: أيوه ما هوه على أرضه هناك الخامة الفيرجن بـ 1 للطن، والخامة الريسكيل بـ 1450.

المهندس منسي: أنا بتكلم، طالما أنا بتكلم حضرتك تسمعني، لغاية ما أخلص كلامي… عشان نفهم بعض.

العميل: أيوه اتفضل يا فندم، اتفضل يا فندم.

المهندس منسي: يعني هي دلوقتي الحاجة جايه من الصين طايرة، ما هوه بالتأكيد….

العميل: في شحن وجمارك.

المهندس منسي: آه جمارك وفي فلوس اتركنت، وما إحنا عارفين البضاعة دي هتتباع ولا مش هتتباع، وقرف وكل شويه الحكومة عماله تتضيق علينا ومش لاقيين ومش لاقيين ومش لاقيين، حاجات كتيرة جداً، حاجات كتيرة جداً بتطلع عينا.. ده رقم واحد، رقم 2 الخامات اللي عندنا كلها أوروبي جايه من ألمانيا وإيطاليا، فهتلاقي البريق بتاعها عالي قوي، والفلاش بتاعها عالي قوي.

العميل: طيب جميل، طب هقول لسيادتك بس عشان أنا في وسط سوق وليا منافسين فمش هعرف آخد بسعر غالي، فالسعر ده ممكن نوصل لحل وسط مع حضرتك.

المهندس منسي: اتفضل.

العميل: أنا ممكن أجيب الخامة الشفافة اللي هي الصيني وحضرتك تديهالي ماتالايز من عندك.

المهندس منسي: قصدك ننلنشنها يعني.

العميل: آه اللي هوه الماتالايز معرفش إيه يعني، اسمها لنشنه.

المهندس منسي: عموماً أعتقد اللي هوه هيمشي معاك حاجة اسمها استوكات أوروبي حضرتك ابعتلي بس عينة وإن شاء الله اللي فيه الخير يقدمه ربنا.

العميل: يعني برده عندك استوكات بتيجي من أوروبا برده.

المهندس منسي: آه.. آه.

العميل: أنا كان نفسي آجي أقابلك ما هوه مش هينفع في التليفون لأن أنا بتكلم في كمية تعتبر كويسة.

المهندس منسي: ما تقلقشي إنت بمجرد ما هتديلهم العينة إن شاء الله ما تقلقشي خالص يعني، هتلاقي في فريق مبيعات زي الفل.

العميل: وممكن يديني السعر قريب من الصين؟

المهندس منسي: إيه؟

العميل: ممكن يدين السعر قريب من الصين.

المهندس منسي: إن شاء الله.

العميل: طيب آجي لسيادتك إمتى؟

المهندس منسي: أنا من طنطا يا فندم أنا من طنطا.

العميل: أهلاً بيك.

المهندس منسي: إحنا موجودين دايماً من 11-9.

العميل: من 11-9؟

المهندس منسي: من 11-9 آه.

العميل: 9مساء، آه 9 مساء.. ما شاء الله كده حوالي 9، 10 ساعات، في 6 أكتوبر؟

المهندس منسي: لا في القاهرة..عايز تروح 6 أكتوبر؟

العميل: لا أنا عايز آجي مكتب الإدارة اللي أنا هتفق معاه.

المهندس منسي: كله زي بعضه، القاهرة زي 6 أكتوبر زي العبور، كله زي بعضه.

العميل: أنا عايز أقابلك إنت.

المهندس منسي: أنا باجي من 5-11.

العميل: مش مشكلة هضبط نفسي على الميعاد اللي حضرتك هتكون موجود فيه.

المهندس منسي: ماشي دايماً من 5-11 ماعدا يوم السبت ببقى موجود في الفرع بتاع مدينة نصر.

العميل: فرع إيه؟

المهندس منسي: في الفرع بتاع مدينة نصر.

العميل: مدينة نصر، يعني آجي مدينة نصر ناحية عباس العقاد كده.

المهندس منسي: يوم واحد بس اللي ببقى موجود فيه في مدينة نصر باقي أيام الأسبوع ببقى في باب الشعرية، هبعتلك العنوان في رسالة دلوقتي حالاً.

العميل: سهل باب الشعرية سهل جداً

المهندس منسي: هبعتلك العنوان في رسالة حالاً دلوقتي أهوه.

العميل: متشكرين يا فندم جداً ألف شكر يا فندم.