طبة بجوان للعبوات من شركة المهندس منسي

العميل: سلام عليكم

المهندس منسي: عليكم السلام ورحمة الله وبركاته

العميل: المنسي

المهندس منسي: أيوه

العميل: إزي حضرتك يا فندم

المهندس منسي: الحمد لله

العميل: شغالين النهاردة ولا أجازة

المهندس منسي: هوه النهاردة إيه؟

العميل: النهاردة السبت

المهندس منسي:  لأ شغالين عادي، إحنا أجازتنا يوم الجمعة

العميل: تمام.. طب والنبي يا فندم مع حضرتك رامي الشركة المصرية الكندية

المهندس منسي: آه…

العميل: كنت بسأل على طبة اللي هي بجوان اللي هي بخرج الغازات من العبوة هل دي موجودة عندكم؟

المهندس منسي: والله هوه ممكن حضرتك بس تبعتلي العبوة نفسها…

العميل: أنا معايا الطبة

المهندس منسي: آه الطبة والعبوة ومعاها المادة، بحيث إن هوه لو موجودة أوكيه، مش موجودة ممكن نعملك بديل ليها، لأن إحنا متخصصين في المجال نفسه

العميل: بديل ليها، تمام، طب أنا أبعتها لحضرتك على الواتس، هي الطبة كرتون فتحتها….

المهندس منسي: هوه أنا عايز العبوة والمادة بتاعتها

العميل: إشمعنى؟

المهندس منسي: عشان نعمل عليها تجارب، لأن إحنا حلينا المشاكل دي قبل كده كتير، عبوات البويات عشان بتمنع  الغازات إزاي؟؟ إن هوه بتطرد الغاز، فإحنا عملنا حلول للموضوع ده قبل كده كتير مع الشركات البويات والكيماويات أغلبها

العميل: لأ أنا مجرب الطبة دي يا فندم عايز زيها، أنا مجربها على العبوات اللي عندي

المهندس منسي: افرض ما لقيناش زيها خلاص نوقف ولا ندور على بديل

العميل:  لأ.. لأ.. أصل هي شبه مستوردة، أنا الموضوع بتاع الطبة أنا مجربه، أنا بدور هل في منها ولا لأ بس مش قصدي، ممكن أبعتها لحضرتك على الواتس برده

المهندس منسي: ما هو صلي على النبي

العميل:  عليه الصلاة والسلام

المهندس منسي:  الطبات المتخصصة ديت مثلاً طبة فيها مش عارف إيه، وطبة إيه، وطبة إيه… حاجات كتيرة قوي فيها فإحنا لو جبنا كل الأنواع أساساً ما عليهاش استهلاك، في حاجات ما بنجيبهاش وبنقدر نعملها حل تاني فهمتني؟؟

العميل:  تمام..

المهندس منسي:  بس ممكن يكون عندي مثلاً طبة بغلق بتدي غلق مش عارف إيه، طب أنا هستوردها… طبعاً إحنا عشان نعملها هنا البرودكت لاين عالي قوي اللي هوه أم سكس بلف الصغنون ده، عشان أعملها لازم برودكت لاين عالي، طب أنا هجيبها لمين، هجيبها لواحد بيتصل بيا كل سنة مرة

العميل:  لأ يا فندم مش كده

المهندس منسي:  سبني أكمل كلامي

العميل:  لا إله إلا الله، اتفضل

المهندس منسي:  واخد بالك، فهنا أعمل إيه؟؟؟ أروح جاي عامل بديل ليها يأدي نفس الغرض، هوه الهدف إيه، الهدف إني أأدي نفس الغرض ولا الهدف إن أنا أعمل زي دي وبس؟؟ فهمتني

طب إحنا ليه ما فكرناش كشركات أساساً إن إحنا نعمل الطبات اللي هي عليها الاستهلاك اللي هي المستوردة دي؟ ليه ما فكرناش كده؟؟ ولا إحنا زي ما بيقول المثل الشعبي تقليد الخواجة ولا عقدة الخواجة

هوه ممكن تكون من وجهة نظرك إنت مستهلكة، إحنا بقى اللي نقول مستهلكة ولا مش مستهلكة لسبب بسيط، لأنه إحنا مقياس السوق، إحنا ترمومتر السوق، هي بالنسبة لك إنت مستهلكة وجميلة ليه؟؟؟ لإن إنت ما بتستهلكش غيرها، أما بالنسبة لنا ممكن تكون مالهاش أي لازمة لأنه اللي هيطلب منها هيطلب إيه 200 ألف، نص مليون في السنة، ما هو ما يعوضنيش حاجة، ما هو لو جيه قالي شكراً مش عايزها هقعد أنا بقى هغني جنبها ظلموه، فهمتني إزاي؟

العميل: تمام.. عشان كده يا فندم إحنا بنتصل بالشركات بنقول هل دي موجودة ولا لأ مش أكتر، لأن إحنا واخدينها من حد شغال برده بيقفل بيها العبوات بتاعته وجايبه معاه نتيجة، فمعنى كده إنه برده بيجيب منها، بس للأسف ممكن ما تكونش صناعة مصرية

المهندس منسي:  هي… إنا عملنا قبل كده حلول كتيرة قوي قوي قوي قوي، وممكن يكون اللي في إيدك أساساً حل من الحلول اللي إحنا قدمناها، ابعتها وإن شاء الله خير، ماشي يا باشا

العميل:  خلاص ماشي يا فندم ماشي