عبوات الملاحات من شركة المهندس منسي

العميل: سلام عليكم

المهندس منسي: عليكم السلام ورحمة الله وبركاته

العميل: باش مهندس منسي

المهندس منسي: أيوه

العميل: أنا مهندس أحمد شرف الدين، أنا حضرتك كلمتك، وإمبارح رحت عملت زيارة للمكتب عند حضرتك عشان عايز آخد مكنة فاكيوم ومكنة لحام أكياس وحاجات زي كده

المهندس منسي: آه…

العميل:  بس كان ليا استفسار عند سعادتك، أنا كنت شفت هناك حاطط على الفيس بوك ملاحات صغيرة كده صيني

المهندس منسي: آه… الملاحات ديت إحنا بنصنعها بالطلب، عبوات الملاحات

العميل: آه بالغطا بتاعها، والأزايز أنا شفت أزايز حلوة قوي ما شفتهاش عند حضرتك ليه؟

المهندس منسي: ولا حاجة حضرتك اللي إنت عاجبك إنت بتطلعهولي وبتجيبه إحنا بنصنعهولك

العميل:  تمام حضرتك.. تمام، ممكن الكميات ما تبقاش كبيرة قوي، ممكن الملاحات ديت ناخد منها مثلاً 5000 حسب احتياجاتنا

المهندس منسي: في الحالة دي حاجة من الـ 2، يا نستوردهالك بالطلب على حسابك إنت باسمك إنت، يا إما نصنعلك الاسطمبة وخد الكمية اللي إنت عايزها

العميل: آه… ما أنا مش عايز برده أتكلف كتير في الأول لأني أنا عايز أعبي بودرة توم وبصل وحاجات من دي 100 جرام في الملاحة دي، أو 50 جرام مثلاً

المهندس منسي: ربنا ييسرلك الأمور، حضرتك مسجل، ورقك سليم

العميل: مسجل إيه يا فندم؟

المهندس منسي: مسجل يعني، يعني معاك سجل تجاري وبطاقة ضريبية ورخصة وحاجات من دي

العميل: آه.. آه كل حاجة

المهندس منسي: خلاص ممكن نجيبلك الحاجة اللي إنت عايزها طيران من الصين تيجي باسمك

العميل: آه… آه..

المهندس منسي: لأن في الكميات الصغيرة هيبقى صعب علينا

العميل: يعني 5000 على صعب على حضرتك

المهندس منسي: آه يبقى صعب إن إحنا نجبها باسمنا، إنما ممكن نجيبها طلبية خاصة باسم حضرتك، طالما مش عايز تدفع الاسطمبة

العميل: هوه أنا أفضل… أصل الاسطمبة ممكن بعد ما نجرب السوق نيجي لحضرتك نعمل اسطمبة ونعمل كميات كبيرة، أو نعمل كميات وندفع تمن الاسطمبة، طب تقريباً حضرتك الألف بكام تقريباً

المهندس منسي: تبقى تقريباً في حدود 1 جنيه، 1.15 جنيه حاجة زي كده

العميل: استيراد ولا هنا؟

المهندس منسي: إن شاء الله استيراد

العميل: طيب تمام، أقدر أقابل حضرتك يا باش مهندس ولا صعب، أنا عارف ظروفك إنك مشغول باستمرار

المهندس منسي: لا عادي تحت أمرك في أي وقت… لا إزاي بقى، تحت أمرك

العميل: ربنا يكرمك الله يبارك فيك، طب أنا يعني أنا مكتبي في مصر الجديدة آخر شارع الحجاز، فآجي لحضرتك فين، برده في باب الشعرية ولا في مدينة نصر

المهندس منسي: أنا كل يوم موجود في باب الشعرية ماعدا يوم السبت بكون في مدينة نصر

العميل: طيب أنا ممكن بس بعد بكره مثلاً أكلم حضرتك إذا كنت سعادتك متواجد في باب الشعرية أجيلك؟

المهندس منسي: أنا ببقى موجود من 5-11 بالليل

العميل: طيب خلاص هكلم سعادتك.. أنا هطلع الصور وأبعتهالك على الإيميل، على النمرة بتاعت حضرتك لو فيها واتس آب ولا حاجة، وفي أزايز تانية برده بتاعت العسل كان شكلها، وعبوة زيت الزيتون…  كنت عامل حاجات حلوة قوي في عبوات زيت الزيتون دي

المهندس منسي: آه كلها طلبيات أنا عاملها بالطلب للناس

العميل: كلها استيراد يعني!!

المهندس منسي: كلها استيراد يا أوردرات عاملها للناس بالطلب، يعني عاملهم الاسطمبة وبعد ما عملت الاسطمبة بدأنا صنعنا عليها

العميل: آه… آه طيب نقدر ناخد من الاسطمبة دي ولا لازم نعمل اسطمبة لوحدينا؟

المهندس منسي: لأ لازم تعمل حضرتك اسطمبة، إحنا سياسة شركتنا إن إحنا نصنع الاسطمبة الأول وبعد كده ننفذ للعميل عليها بناء على طلبه

العميل: طب الاسطمبة تتكلف في حدود أد إيه تقريباً؟

المهندس منسي:

العميل: يعني حوالي 10000 جنيه

المهندس منسي: في الحدود دي

العميل: طيب شكراً، هكلم حضرتك أنا إن شاء الله هبعتلك الأشكال الأول ونشوف إذا كان ممكن ناخد منها استيراد الأول وبعدين نعمل اسطمبات إن شاء الله

المهندس منسي: ماشي يا فندم، ربنا يكرمك، شكراً، سلام عليكم