عينات اكياس شيبسي مصنعة من شركة المهندس منسي

العميل : سلام عليكم

المهندس منسي : عليكم السلام ورحمة الله وبركاته

العميل : شركة المهندس منسي

المهندس منسي : أيوه

العميل : لو سمحت كنت عايز أسأل هوه إنتم فاتحين النهاردة؟

المهندس منسي : آه فاتحين آه

العميل : طب كنت عايز أسأل عن حاجة، كان في حد في الشركة عندنا كلم حضرتكم إمبارح علي الواتس بس قاله كلمني الصبح، كنا عايزين نسأل على موضوع كده، اللي هوه الاكياس بتاع الشيبسي، حد كلم حضرتك إمبارح بخصوص الموضوع ده؟

المهندس منسي : هوه الواتس ده واتس الشركة عام يعني ممكن يكون كلم حد زميلي، ممكن حد كلمني أنا، ممكن يكون كلم واحد تالت، كده يعني، عدد من الناس بيردوا عليك

العميل : دلوقتي أنا كنت طالب.. اللي أنا أعرفه إن إنتم بصنعوا أكياس شيبسي والكلام ده صح؟

المهندس منسي : آه مضبوط آه

العميل : أنا عندي شركة دعاية وإعلان، فعندي شغلانة مع شيبسي اللي اسمه فورن

المهندس منسي : شيبسي اسمه فورن آه

العميل : الشيبسي ده المفروض الكيس ده بيبقى فاضي، بيتملي هيليوم

المهندس منسي : آه يعني إحنا هنعمل كيس ونملاه هيليوم، إحنا ما عندناش هيليوم، إحنا ممكن نديهولك…

العميل : لأ ما هو الهيليوم عندي

المهندس منسي : آه…

العميل : أنا اللي أنا عايز أطلبه حضرتكم هتعملولي عينة وأنا هدفع فلوسها

المهندس منسي : آه

العميل : زي ما تتكلف

المهندس منسي : ماشي

العميل : أنا عايز الكيس عشان آخده أجربه أحط فيه الهيليوم أشوفه هيتملي ولا لأ

المهندس منسي : لا ماشي تحت الأمر

العميل : فأنا عايز أعرف آجي لحضرتك أقعد معاك أفهم حضرتك الموضوع

المهندس منسي : هوه مش هتقعد معايا أنا عشان أنا الاستشاري مش مبيعات، أنا هبعتلك 3 تليفونات هتلاقي فيهم أو 4 تليفونات دول تليفونات المبيعات تابع معاهم وقلهم أنا عايز الحاجة ديت تكلفة العملية كام وكده يعني

العميل : خلاص ماشي تمام

المهندس منسي : ماشي تحت أمرك، دعاية وإعلان إيه طباعة وكده ولا إيه؟

العميل : لأ أنا بمسك مشروعات، ده حاجة لشركة فورن عملاها المفروض كده بيتعمل في المول هيوزعوا على الأطفال شيبسي هدية والكلام ده…

المهندس منسي : زي…. بطير كده فوق

العميل : أيوه هي دي

المهندس منسي : آه… دي عندنا

العميل : فهمه عايزين كيس الشيبسي ده أنفخه هيليوم وأروح لاصقه يروح طاير لفوق، همه عايزين كده

المهندس منسي : ماشي يا غالي

العميل : بس بص والله لو عملتها يبقى خدمتني عشان أنا أصلاً أنا كنت دورت كتير في الموضوع ده

المهندس منسي : لا.. لا.. ما تقلقش

العميل : عشان أنا عمال بدور عليها في مصر بقالي أكتر من 5 أيام مافيش حد بيعملها في مصر

المهندس منسي : إحنا الوحيدين اللي هنعملها

العميل : إن شاء الله يا رب

المهندس منسي : لا ما تقلقش، كن متأكد إن إحنا قادرين عليها يعني، ما تقلقش

العميل : إن شاء الله

المهندس منسي : تلاقيها في السوبرماكتات والسناتر والحاجات دي

العميل : إن شاء الله

المهندس منسي : ماشي يا غالي

العميل : طب هتبعتلي رقمهم

المهندس منسي : آه.. آه.. لو ما عرفوش ما تقلقش قلهم أنا عايز أكلم المهندس منسي

العميل : المهندس منسي، خلاص ماشي

المهندس منسي : على أساس همه مبيعات ممكن ما يكونش عندهم العلم…

العميل : آه ممكن ما يعرفوش

المهندس منسي : آه.. لا.. لا ما تقلقش، إنت عندك ديزاين ليها ولا حاجة؟

العميل : آه أنا عندي الديزاين، أنا عندي كل حاجة

المهندس منسي : خلاص إن شاء الله توكل على الله، هبعتلك أنا الفرع بتاع باب الشعرية دلوقتي حالاً

العميل : خلاص تمام، هتبعتهولي على رقم الواتس اللي أنا بتكلم عليه دلوقتي

المهندس منسي : آه.. آه..

العميل : خلاص ماشي

المهندس منسي : مع السلامة

العميل : مع السلامة