ماكينات تعبئة وتغليف قطع من شركة المهندس منسى
العميل: السلام عليكم،ألو..
المهندس منسى: أيوه
العميل: أيوه
المهندس منسى: أيوه أنا معاك اتفضل
العميل: أيوه السلام عليكم
المهندس منسى: عليكم السلام ورحمة الله وبركاته
العميل: أنا محتاج ماكينة تغليف قطع عندكم؟
المهندس منسى: آه عندنا
العميل: أيوه يا فندم؟
المهندس منسى: عندنا آه عندنا
العميل: طب ممكن تبعتولي بس مواصفاتها إيه طيب، سعرها؟
المهندس منسى: هي بضاعة حاضرة، موجودة، حضرتك شرفنا بالزيارة واتفرج عليها على الطبيعة
العميل: يا فندم أنا مش جمهورية مصر العربية، أنا بره مصر
المهندس منسى: آه.. آه… طيب أبعتها لك إزاي، راسلنا…
العميل: أنا بكلم حضرتك من الإمارات
المهندس منسى: آه أهلاً بيك، طب راسلنا بقى على الإيميل
العميل: طيب ماشي، أنا ممكن أبعتلك على الرقم ده، ده موبايل صح؟
المهندس منسى: ما هو مش ظاهر، ظاهر كده أرقام من غير كود، ممكن تبعتلنا رسالة، هبعتلك أنا رسالة بالمبيعات تتابع معاهم
العميل: لأ أنا ممكن أبعتلك على الرقم اللي أنا بكلمك عليه دوت الإيميل بتاعي وتبعتولي كل الديتيلز بتاع المكنة
المهندس منسى: أنا عبال ما هقفل هنسى، فإنت يستحسن لو إنت بعت على الإيميل دايركت
العميل: طيب يا باشا أبعتلكم على الإيميل ماشي، الإيميل بتاعكم إيه؟
المهندس منسى: إنفو آت إم تو باك دوت كوم
العميل: أنا هعرف أوصلكم على الإيميل مافيش مشكلة، طيب هي الماكينة بكام يا فندم؟
المهندس منسى: والله لسه هنشوف بس العيش أو الخبز اللي إنت عايزه تعمله عرضه كام؟ وهنشوف الخبرة بتاعتك مجالها إيه؟ هنشوف حاجات كتيرة قوي هنحسبها بناء عليه
العميل: آه طيب حضرتك عارف العيش الكايزر اللي بيتحط فيه الهامبرجر
المهندس منسى: آه عارفه آه
العميل: طيب هوه ده بيتحط تقريباً 2 جنب بعض وبيتغلفه، هي فيها بكرة كده بتبقى نايلون من فوق، فيها بكرة كده بتلف، دي الماتيريال يعني المادة الخام النايلون وبعد كده هي بتطبع النايلون، النايلون ده بيبقى مطبوع عليه اسم المحل و اللوجو بتاع المحل الرسمي، وبعد كده هي بتطبع عليه تاريخ الإنتاج وتاريخ الانتهاء لوحديها وتروح قاطعة بستيلر كده بالسخونة بتاعتها بتروح قاطعة هي الكيس
المهندس منسى: مضبوط آه
العميل: وبتعبي الكيس التاني، وتخش على الكيس التاني، يعني اللي واقف مجرد إن هوه بيحط الخبز.. يرص الخبز وبس، وهي بتقوم ساحبة كده فيها شريط بيسحب وتروح مغلفة وتروح قاطعة وواحد تاني من الناحية التانية بيرص بقى في البساكت
المهندس منسى: آه…
العميل: أو في الأقفاص يعني
المهندس منسى: آه مضبوط آه
العميل: فهتمني
المهندس منسى:آه
العميل: دي ملخص المكنة كلها، حضرتك أتشرف باسم حضرتك مين معايا؟
المهندس منسى: المهندس منسي
العميل: طيب أنا أحمد معاك، أنا هتواصل معاكم على الإيميل وممكن أكلم حضرتك على الرقم دوت بيبقى معاك على طول يعني
المهندس منسى: إن شاء الله، هوه في عندنا نوعين، في نوع منها أبو ، وفي نوع منها تاني بـ …..
العميل: طيب هوه ده رقمي أنا، وهبعتلك برده الإيميل في رسالة على أساس إنك تبعتلي…
المهندس منسى: بص إنت تبعتلي إيميل أنا هنسى، فكل اللي عليك إنت ابعتلي طلب استفسار على الإيميل هيرد عليك فريق المبيعات، على العموم في ماكينتين 2 منها، في منها مكنة رأسية وفي منها مكنة أفقية، المكنة الرأسية اللي هتغلف الخبز واخد بالك في منها رأسية وفي منها أفقية، اللي الـ 2 أتوماتيك هاند فيد
العميل: آه…
المهندس منسى: بس أنا كده خلصت
العميل: الـ 2 أتوماتيك، يعني دي سعرها كام بقى؟ إنت كنت بتقولي مش عارف
المهندس منسى: آه اللي هي الرأسية بـ ، والأفقية بـ
العميل: يعني في نوعين منها، أنا ممكن آخد أم 4500 وممكن آخد أم 9000
المهندس منسى: آه الـ 2 بيقضوا نفس الغرض، هي بس أم 9000 بتظبطلك الـ 2 بتخليهم مضبوطين جنب بعض بالضبط، إنما التانية بيبقوا مبهوقين شوية
العميل: آه تمام… طيب أنا فريق المبيعات يا فندم ممكن هيرد عليا على طول لو بعتله الإيميل، ولا فيه رقم مخصوص ممكن أتواصل معاهم وأكلمهم
المهندس منسى: آه.. آه.. لما تيجي تتكلم معاهم قولهم أنا محتاج المكنة رقمها 911 ماركة المهندس منسي معايا
العميل: أيوه
المهندس منسى: 911 الفلوباك
العميل: طيب يا فندم، طب إنتم فين في القاهرة يا فندم، أنا بفكر ممكن يعني ده كده سعر المكنة غالي قوي، لو كده ممكن أنزلكم مثلاً يومين 48 ساعة وأرجع
المهندس منسى: إحنا عندنا حدائق القبة، مدينة نصر، باب الشعرية، 6 أكتوبر، العبور
العميل: هيبقى مدينة نصر في الأغلب يبقى أقرب لأني بنزل مدينة نصر
المهندس منسى: ماشي توكل على الله
العميل: أنا شقتي في مدينة نصر
المهندس منسى: فين في مدينة نصر؟
العميل: عندكم فرع هناك، أنا في شارع النزهة يا فندم
المهندس منسى: آه.. إحنا في مكرم عبيد
العميل: طيب يعني أنا قدمكم على طول، أنا بيت والدي أنا في مكرم عبيد، قدام السنتر اللي هوه سنتر هناك كده اللي هو سيتي سنتر أو حاجة زي كده
المهندس منسى: ماشي، هبعتلك أنا عنوان فرع مدينة نصر دلوقتي حالاً
العميل: وأنا برده من غير تكليف على حضرتك ممكن بس توصيهم بس فريق المبيعات إن أنا فعلاً مافيش وقت افتتاح المحل.. محتاج الماكينة محتاج أعرف الاستفسار بسرعة، يعني أنا هرسلهم دلوقتي حالاً على طول
المهندس منسى: يعني أنا أوصيهم بإيه مثلاً؟
العميل: وصيهم بس بسرعة الرد أشوف الصور بتاعت المكنة هي دي المطلوبة، هي مضبوطة…
المهندس منسى: حاضر، من العين دي، صدقني البضاعة حاضرة، إنت كل اللي عليك هتنزل هتشوف المكنة عجبتك عجبتك، ما عجبتكش خلاص
العميل: بالضبط يا فندم، إن شاء الله تكون هي المطلوبة وإحنا بنشجع منتجات بلدنا في الأول وفي الآخر
المهندس منسى: هي دي المطلوبة، ويا ريت تجيب شويه عيش معاك
العميل: أنا طبعاً يشرفني إن أنا أستقبل ماكينة بلدي، أنا كنت بتعامل مع الناس اللي في الصين
المهندس منسى: آه إحنا بقى بنعرض في الصين وبنافس في الصين، إحنا تفوقنا على الصين
العميل: ده كلام كويس جداً، ده شرف لينا
المهندس منسى: آه اكتب كده على الإنترنت المهندس منسي في معرض الصين الدولي، إحنا كل سنة بنروح ناخد حصة ونيجي، يعني الحمد لله بفضل من ربنا تفوقنا في السعر، تفوقنا في الجودة، تفوقنا في التطوير والابتكار، وده كان مهم جداً التطوير والابتكار
العميل: ممتاز يا فندم، ممتاز ربنا يوفقك وده فخر لينا ولبلدنا يعني في الأول وفي الآخر، طب يا فندم بالنسبة للسعر في تفاوض في السعر شويه ولا إنتم… إيه يا فندم؟
المهندس منسى: صدقني أسعارنا نهائية يعلم ربنا
العميل: آه يعني إنتم بتحطوا أسعار نهائية، دي ليست برايز يعني
المهندس منسى: كل اللي عليك إحنا بنسمي بال، فإنت بتقارن بالأنسب والأرخص بالنسبة لك إنك إنت تسددها بالمصري ولا بال، فإنت لو لقيت ال أرخص تسدد بال، لو لقيت المصري أرخص بتسدد بالمصري
العميل: لأ أنا آخر نقطة هسألك عليها هي التفاوض في السعر شويه، في خصم اى حاجة
المهندس منسى: صدقني يعلم ربنا مافيش
العميل: طب يعني إنت أسعارك كلها بتبقى ليست برايز، أي تعامل دايماً بيبقى متعب، بنسأل بعض بس وبعد كده بتبقى الأمور ماشيه لوحديها على طول متسستمة يعني
المهندس منسى: ييسرلك ربنا
العميل: خلاص أنا هبعتلك حالاً الإيميل برده ووصيتك بقى لفريق المبيعات، تمام، وهبعتلهم الإيميل يا فندم، وآسف جداً على إزعاجك يا فندم
المهندس منسى: ولا يهمك يا غالي
العميل: يبارك لك يا رب، شكراً، مع السلامة
