ماكينة التراسونيك للحام الانابيب من شركة المهندس منسى

العميل: سلام عليكم

المهندس منسى: عليكم السلام ورحمة الله وبركاته

العميل: إزيك يا باش مهندس

المهندس منسى: أهلاً بيك

العميل: مع حضرتك د/ ماجد ملاك أنا كنت بسأل على المكنة اللي بتسموها ألتراسونيك بتاعت لحام الأنابيب

المهندس منسى: آه موجودة عندنا

العميل: طيب دي لازم تركب على خط سير ولا ممكن تشتغل لوحدها؟

المهندس منسى: ممكن تشتغل لوحدها آه

2 العميل: فاز ولا 3 فاز؟

المهندس منسى: كل شغلنا 220، إلا إذا طلب العميل غير ذلك، بنعمله اللي هوه عايزه

العميل: زي الفل، طيب سؤال فني حضرتك أكيد هتفيدني فيه، أنا عندي كمية أنابيب مصنعة في مصنعنا تمام، كريمات وجيلات اللي هوه 35 العادي ده، اللي هوه 50 جرام، الأنبوبة لما آجي أضرب عليها بتعمل بلونة تحت اللحام، طبعاً مقفولة حراري مش ألتراسونيك

المهندس منسى: ما هوه غلط، اللي إحنا بنعمله ده أساساً غلط، إنت بتسألني في حاجة إنت في معوقات قابلتلك ما هوه أساس الطريق غلط، لأن إحنا بنروحوا نجيب مكن لحام حراري وبيلحموه بالألومنيوم… بيلحموه بالأنابيب البلاستيك وده أكبر غلط، هوه الأنابيب البلاستيك ليها لحام ألتراسونيك غير كده يبقى إحنا ماشين غلط

العميل: طيب هو الأنابيب متعبية لما آجي أضغط عليها بتعمل بلونة صغيرة تحت اللحام، لو أنا حطيت الأنبوبة دي على الألتراسونيك تهبط؟

المهندس منسى: أكيد، أصل إنت بتحلم هنا الأنبوبة على البارد بالموجات الكهرومغناطيسية، فالمكنة دي بتعمل إيه؟؟ بتمسك البلاستيك بتدمجه في بعضه من غير أي حرارة

العميل: تمام.. تمام… طب المكنة دي كام يا باش مهندس؟

المهندس منسى: بتعمل يعني 25000 جنيه، خلي بالك الأسعار هتترفع في 1/10

العميل: هي أساساً مستوردة يا باش مهندس

المهندس منسى: بتضحك ليه؟؟؟!،دي ألتراسونيك يعني إحنا في مصر أنتجنا ألتراسونيك دي حاجة جميلة قوي

العميل: لأ بس أنا عارف برده إن حضرتك يعني مهندس كبير يعني مش أي حد…. لو حد عايز يخترع حاجة أو يبتكر حاجة جديدة بييجي يقولك أنا عايز أعمل كذا.. كذا.. كذا وإنت بتعملها له… صح؟

المهندس منسى: بس عمري ما هعيش لوحدي، يعني لو أنا لو اتقفل عليك ما هو كده عليك حصار اقتصادي، النهاردة مافيش دولة عايزه تتقدم ولا تكنولوجيا سهلة ما هو ما قال إني أعلم كل شيء فهو لا يعلم أي شيء

العميل: صح

المهندس منسى: النهاردة عشان أقولك أنا هعمل كل حاجة عندي في مصر بإمكانياتي في مصر استحالة أعمل حاجة، ما تتطمنليش، لازم على الأقل خالص 65 ـ 70% من بره وإنت عليك الباقي

العميل: يعني هي مستوردة؟

المهندس منسى: لا ممكن يكون فيها جزء مصري، الخطوط، والمصري كمان الصيانة بتاعته مستوردة

العميل: تمام… تمام…. طيب هل حضرتك….

المهندس منسى: جايب ميسي وبتقوله العب مع فريق عزبة الشوكي

العميل: حلو التشبيه ده…….

المهندس منسى: فهيعمل إيه مع عزبة الشوكي.. مع خلاص، بس هوه في الآخر ميسي

العميل: تمام.. طب هل مسموح أو أقدر إن أنا أجيب بعض الأنابيب معايا وأنا جاي….

المهندس منسى: آه وتقعد تجرب وتعمل عيناتك وتتطمن على شغلك قبل ما تدفع جنيه، إحنا مش باصين للجنيه اللي حضرتك هتدفعه، إحنا بصاين إن نحل المشكلة

العميل: تمام…

المهندس منسى: يعني حضرتك تجرب وتشوف شغلك وتبقى مطمن تمام الاطمئنان إن الدنيا تمام، خلاص اتكل على الله

العميل: تمام يا باش مهندس.. ما أتحرمش من حضرتك، طيب الشركة لسه زي ما هي أدام مدرسة البنات في باب الشعرية

المهندس منسى: ده فرع، وفي فرع في حدائق القبة، وفي مدينة نصر…..

العميل: طب أنا جاي من المنصورة فهل….

المهندس منسى: خليك على القديم بقى

العميل: يعني باب الشعرية أسهلي ولا مدينة نصر أسهلي، بتهيقلي من على الدائري أحسن…

المهندس منسى: اه تمام…..

العميل: يا باشا ربنا يديك الصحة يا باشا

المهندس منسى: الله يبارك لك يا باشا

العميل: على العموم الشركة فاتحة من كام لكام؟

المهندس منسى: من 11-9 بالليل

العميل: زي الفل قوي، طب أنا إن شاء الله قبل العيد يا الثلاثاء يا الأربعاء يا الخميس، وهكلم حضرتك بقى وأنا في الطريق بحيث نشوف أقرب فرع لينا فين نيجي لحضرتك فيه

المهندس منسى: هبعتلك أرقام المبيعات بقى في رسالة لأني مش في أي وقت تلاقيني متاح

العميل: تمام يا باش مهندس تمام.. تمام

المهندس منسى: هبعتهولك في رسالة دلوقتي حالاً

العميل: تمام يا باش مهندس.. تمام.. ربنا يخليك، ما أتحرمش من حضرتك، شكراً لسعادتك

المهندس منسى: مع السلامة

العميل: معلش يا باش مهندس أنا آسف على الإزعاج بس هوه سؤال صغير،فاتحين الخميس ولا لأ ولا هتبدأوا أجازة العيد؟

المهندس منسى: لا فاتحين إن شاء الله،الخميس أنهو

العميل: الخميس دهو بعد بكره

المهندس منسى: آه شغالين إن شاء الله والسبت شغالين كمان

العميل: تمام زي الفل ما أتحرمش من حضرتك، يعني خميس وسبت شغالين

المهندس منسى: إن شاء الله

العميل: تمام يا حبيبي متشكرين

المهندس منسى: سلام

العميل: سلام عليكم

المهندس منسى: عليكم السلام ورحمة الله وبركاته