ماكينة الفاكيوم لصنع الأشكال البلاستيك موديل 605 من شركة المهندس منسي
العميل : سلام عليكم
مهندس منسي : عليكم السلام ورحمة الله وبركاته
العميل : شركة المهندس منسي
مهندس منسي : أيوه
العميل : بقول لحضرتك يا باشا، إحنا في القنطرة تمام وكنت عايز مكنة الفاكيوم اللي ممكن أعمل بيها أطباق بلاستيك، اللي هي منتجات البلاستيك يعني
مهندس منسي : آه…
العميل : طب دي إيه نظامها، أو تكلفتها إزاي أو كده
مهندس منسي : تكلفتها يعني 15000 جنيه
العميل : تمام.. دي تصنع إيه؟
مهندس منسي : تصنع كل أشكال البلاستيك
العميل : طب الأشكال دي.. معلش أنا آسف للإطالة، الأشكال دي بجيبها منين، أو الاسطمبات دي
مهندس منسي : الاسطمبات دي إحنا بنعملها لك أو أي حد عنده تي إن تي يقدر يعملها لك
العميل : طيب تكلفة الاسطمبة بتبقى غالية
مهندس منسي : يعني أراوند 2000 جنيه ـ 3000 جنيه كده يعني
العميل : دي بتبقى معايا على طول
مهندس منسي : بتاعتك…
العميل : يعني الاسطمبة بتتعمل خلاص بقت بتاعتي
مهندس منسي : آه
العميل : طب كبلاستيك بشتريلها مثلاً ألواح بي في سي ولا رولات
مهندس منسي : رولات
العميل : رولات، الرول ده بيبقى أد إيه وبكام؟
مهندس منسي : إنت بتشتري بالكيلو
العميل : يعني تقريباً تبقى إزاي، الواحد عايز يعملها دراسة جدوى، بتبقى إزاي؟
مهندس منسي : هوه الكيلو أراوند سعره حوالي بيبدأ من 19 ـ 28 جنيه، وفي المصري، وفي الصيني، وفي البرازيلي، وفي الأسباني…
العميل : بيبقى ألوان؟
مهندس منسي : آه ألوان وسادة وكل حاجة
العميل : طب معلش العرض بتاعه بيبقى أد إيه؟
مهندس منسي : العرض اللي إنت عايزه
العميل : تمام… طب معلش اللهم صلي عليك يا نبي، إيه السمك اللي هوه التخانة بتاعته برده اللي أنا عايزها؟
مهندس منسي : برده إنت اللي بتختارها
العميل : تمام يا باشا، ماشي.. لو كنت العنوان بتاع حضرتك اللي مكتوب ده
مهندس منسي : آه
العميل : ماشي يا باشا
مهندس منسي : هبعتلك أنا بقى تليفون المبيعات قولهم مكنة الفاكيوم موديل 605 ماركة المهندس منسي
العميل : تمام… هتديهولي دلوقتي
مهندس منسي : هكتبهولك هنا علي الشات حالاً
العميل : ماشي يا باشا، اتفضل.. سلام عليكم
