ماكينة تعبئة الزيت من شركة المهندس منسي
العميل: السلام عليكم
المهندس منسي: عليكم السلام ورحمة الله وبركاته
العميل: شركة المهندس
المهندس منسي: أيوه
العميل: كنا عايزين نسأل على مكن تعبئة الزيت الأزايز
المهندس منسي: آه
العميل: اللي بياخد 10 أزايز عندكم منه؟
المهندس منسي: 10 أزايز إزاي؟ إنت عايز تعبي 10 أزايز شيلة واحدة؟
العميل: على مرة واحدة
المهندس منسي: مافيش مشكلة، عايز تعبي 12 ـ 24 ـ 48 مرة واحدة ولا حاجة عادي، هوه كل العملية إنك بتعدد الوحدات جنب بعضها بس مش أكتر من كده يعني
العميل: طب إنت في حاجة جاهزة يعني؟
المهندس منسي: آه موجودة جاهزة آه
العميل: أد إيه؟ تنزل كام إزازة؟
المهندس منسي: هوه إحنا مش قلنا دلوقتي، هي كل العملية إن هوه 4 ـ 8 ـ 12…. براحتك عد زي ما إنت عايز تعد، هي كل العملية إنك بتركب الوحدات جنب بعضها جاهزة، هي وحدات
العميل: طب بتعبي في الساعة كام إزازة؟
المهندس منسي: الواحدة بتعبي في الساعة 1200، يبقى لو هتعبي 10 يبقى هتعبي 12000 في الساعة
العميل: يعني لو بزبوز واحد يعبي 1200؟
المهندس منسي: آه
العميل: طب وفيها سير؟
المهندس منسي: آه فيها سير آه
العميل: آه… طيب والمكن النفخ؟
المهندس منسي: نفخ بي إي تي؟
العميل: آه اللي هوه بتاع الأزايز
المهندس منسي: آه… معاك
العميل: هوه إنت المكان فين؟
المهندس منسي: إحنا عندنا حدائق القبة، مدينة نصر، باب الشعرية، 6 أكتوبر
العميل: أنا كنت إمبارح في اللي هوه في مصر، أنا من إسكندرية أساساً
المهندس منسي: آه أهلاً وسهلاً
العميل: كنت رحت خدت الورق بتاعك من هناك من المعرض
المهندس منسي: إنت جيت نورتنا
العميل: بس مالقتش حاجة، خبطت المشوار لغاية هناك على الفاضي، ما لقتش أي مكن ولا أي حاجة، ولا المعرض أساساً شغال كويس
المهندس منسي: آه سوق القاهرة الدولي
العميل: آه
المهندس منسي: ما إنت رايح بقى آخر يوم وآخر دقيقة ما هو إنت مش هتلاقي حاجة، طب ما فاتح بقاله 10 أيام رايح إنت في آخر ساعة وعايز تلاقي، ما هو إنت مش هتلاقي..تعالى بقى معارضنا إحنا هتلاقي الخير كله، عندنا أكتر من 50 ـ 60 مكنة اتفرج عليهم في كل أنواع كل حاجة
طب أقرب حتة لإسكندرية أروح المعرض فين؟
المهندس منسي: اطلع بقى 6 أكتوبر
العميل: طب أنا معايا مين معلش المهندس مين؟
المهندس منسي: معاك المهندس منسي، لو إنت رحت 6 أكتوبر في الفرع بتاعنا هناك هتلاقيه في مجمع الأمل هناك
العميل: طب لو عايز أقابل حضرتك كأن حضرتك تعرفني شكلك سمح كده
المهندس منسي: هوه أنا عشان تقابلني نتشرف بيك، بس هوه أنا فاتح فروع وحاطط مديرين عشان خاطر في الآخر أقابل الناس يبقى الفروع دي كان هيبقى فايدتها إيه بقى
العميل: آه صح
المهندس منسي: ما تسبني بقى عشان خاطر أطلعلك مكنة تانية أحلى، يعني سبني للمنطقة اللي أنا أبدع فيها أحسن، إنما لو هقعد أقابل في عملاء طيب ما هوه أي حد يقعد يقابل عملاء، إنما أنا أقعد أبدعلك أرسملك مكنة تانية، أصمملك حاجة حلو بحيث تريحك في شغلك، إنما لو كل واحد جيه بقى قعد يقابل المهندس منسي، طب ما هو المهندس منسي هيتقدم؟؟
العميل: لأ
المهندس منسي: آه بس كده، إنما الناس هيستقبلوك أحسن استقبال، وناس زي الفل اللي موجودة، نقاوة أخوك يعني، وأخوك بينقيهم إيه يعني حاجة فلة
العميل: حضرتك منين أساساً
المهندس منسي: أساساً من بلد تبع ميت غمر اسمها ميت مسعود، إنت عارف ميت غمر
العميل: نعم أنا من ديرب نجم
المهندس منسي: آه.. أدينا طلعنا قرايب أهو، ميت غمر دي هندسة مصر، قلعة الصناعة في مصر
بتاعت الأنابيب
العميل: الخواص
المهندس منسي: آه بتاعت الأنابيب اللي على الكوبري العلوي القديم
العميل: آه ده أنا اتشرفت بيك والله النهاردة
المهندس منسي: أنا بقى من الخواص
العميل: أهلاً بيك
المهندس منسي: أهلاً بيك يا غالي
العميل: فإحنا في مصنع زيت عاملين على الدولي بيعصر الفول السيوا
المهندس منسي: بيعصر الفول الصويا مش السيوا
العميل: آه..
المهندس منسي: بيعصره والفلترة بقى بتعملها إزاي
العميل: وبيكرر، في تكرير
المهندس منسي: وعملت التكرير كمان، بسم الله ما شاء الله
العميل: آه… فكنا عايزين مكنة التعبئة دي بردك عشان نزودها
المهندس منسي: إن شاء الله أنا تحت الأمر
العميل: فحضرتك ممكن تقولي العنوان إيه بالضبط
المهندس منسي: أنا هبعتهولك في رسالة حالاً
العميل: خلاص ماشي معلش هتعبك بقى، بس والنبي شرح بالتفصيل عشان أنا مصر دي بنتوه فيها كتير
المهندس منسي: إنت تتصل بيه وقوله ابعتلي اللوكيشن
العميل: يعني حضرتك هتبعتلي نمرة؟
المهندس منسي: آه أنا هبعتلك رقم دلوقتي، هتتصل بيه وتقوله يا حاج شوقي، هيقولك نعم، قوله ابعتلي اللوكيشن بتاعك
العميل: خلاص ماشي
المهندس منسي: معاك اللوكيشن هتروح بسهولة قوي
العميل: خلاص ماشي، متشكرين قوي يا باش مهندس
المهندس منسي: العفو يا غالي
العميل: مع السلامة
