ماكينة تعبئة المواد اللزجة موديل 404 ماركة المهندس منسي
العميل : سلام عليكم
المهندس منسي : سلام ورحمة الله وبركاته
العميل : شركة المنسي معايا
المهندس منسي : أيوه
العميل : لو سمحت أنا د/ كمال صاحب مصنع تريدا فارما نجع حمادي
المهندس منسي : أهلاً وسهلاً
العميل : أهلاً بيك، كنت دخلت على الموقع عندكم كنت عايز أسأل على ماكينة إم تو باك 401، 402
المهندس منسي : هوه إحنا عملنا أبديت ليها خليناها 403
العميل : 403 آه
المهندس منسي : 403 و404 همه
العميل : 403 دي حضرتك اللي هي المواد اللزجة زي الجلسرين صح كده؟
المهندس منسي : 404 هي المواد اللزجة
العميل : طيب معلش أنا كنت عايز أعرف قدرة المكنة، 55 كيلو وات دي أد في الساعة؟
المهندس منسي : 55 كيلو وات إزاي؟
العميل : مكتوب على الموقع 55 كيلو وات قدرة المكنة
المهندس منسي : لأ قصدك الماتور بتاعها يعني
العميل : آه.. آه سحبها، القدرة بتاعتها كام؟ أو كام حصان؟
المهندس منسي : هي مفيهاش حصان، ده هي مافيهاش ماتور أساساً، ده هي نيوماتيك، هوا
العميل : آه.. آه
المهندس منسي : نظام كمبروسر آه
العميل : طب ماشي هي مفيهاش ألكتريك سابلاي
المهندس منسي : مفيهاش إيه؟
العميل : استهلاك كهرباء، مش المفروض متوصلة بكهرباء ولا ملهاش
المهندس منسي : متوصلة بالكهرباء بس علشان الماجنيتك كيه، الماجنيتك كيه اللي هوه مفاتيح الكهرباء بتاعتها بس اللي هي بتتحكم في الكمية
العميل : أمال الـ 55 كيلو وات دي إيه
المهندس منسي : حضرتك بعتلي الرابط، دي بالتأكيد في غلطة في الدسكربكشن
العميل : آه.. دي شغاله على 220 دي زراير الكهرباء العادية
المهندس منسي : الكهرباء العادية، كل المكن بتاعنا بدون استثناء كهرباء عادية، إلا إذا إنت طلبت غير كده، لو إنت طلبت بعد كده 110، أو 360 بنغيرها لك بالكهرباء اللي إنت عايزها، إنما هوه الفولت عندنا أو الافتراضي عندنا 220
العميل : طيب، كل الماكينات اللي بتشتغل بنظام الكمبريسر نظام ضغط هوا ولا…
المهندس منسي : آه نظام ضغط هوا آه
العميل : كل الماكينات
المهندس منسي : آه.. لأنها أدق وأنظف
العميل : آه طبعاً وفي توفير في الكهرباء طبعاً
المهندس منسي : آه.. وفي سهولة صيانة
العميل : طيب مفيش مشاكل حضرتك، طيب لو أنا عندي خط إنتاج عايز أشتغل من 10 مللي تعبئة سوائل عادية، لغاية 250 مللي
المهندس منسي : دي يبقى 403
العميل : طيب حضرتك سيم أتوماتيك صح؟
المهندس منسي : آه.. سيم أتوماتيك آه
العميل : لو حبيت أحولها تغلف ماكينة شرينك؟
المهندس منسي : عايز تعمل إيه؟
العميل : أضيف ماكينة شرينك عليها تغليف
المهندس منسي : ولا حاجة، طالما سيم أتوماتيك مافيش مشكلة، أما لو عايزها تبقى أتوماتيك بنعملها سير وكل الوحدات بنركبها على بعضها
العميل : تمام، يعني إنت عندك أبشن إنك إنت بتعمل تعديل في الماكينات ديت
المهندس منسي : إحنا اللي مصنعين المكن ولكن مش مصنعينوا هنا في جمهورية مصر العربية، إحنا مصنعينه لحسابنا في بره، وبنجيبه نجمعه
العميل : تمام… يعني لو حبيت أطلب أي حاجة على الماكينة ممكن حضرتك تضيفها لي؟
المهندس منسي : آه.. ولو إنت خدتها دلوقتي نص أتوماتيك وحبيت تبقى أتوماتيك في يوم من الأيام أحولها أتوماتيك في يوم من الأيام
العميل : آه… آه.. طب حضرتك هيبقى في ضمان أد إيه على الماكينة؟
المهندس منسي : ضمان لمدة سنة، وهي كلمة ماركة المهندس منسي لوحدها ضمان
العميل : يا فندم أنا بكلمك على الاسم والسمعة صراحة
المهندس منسي : الحمد لله نحمد ربنا
العميل : فليكن… طب بعد السنة دي في حضرتك صيانة في متابعة…
المهندس منسي : إحنا عندنا فنيين مخصوصين لحضرتك
العميل : بس أنا عندي أنا حضرتك في الصعيد، أنا في نجع حمادي
المهندس منسي : راحوا لفوا محافظات الجمهورية كلها، إحنا بنصين مكن السعودية أون لاين
العميل : تمام يا فندم.. إنت حضرتك موجود في فرع القبة
المهندس منسي : لأ إحنا عندنا حدائق القبة، مدينة نصر، باب الشعرية، 6 أكتوبر، شوف الفرع اللي يريح حضرتك أبعتله الداتا بتاعته وإنت اتعامل معاه
العميل : أنا متشرفتش باسم حضرتك يا باش مهندس؟
المهندس منسي : مع حضرتك المهندس منسي الاستشاري بتاع الشركة
العميل : أهلاً وسهلاً يا باش مهندس، أنا من الصعيد يعني في خلال إن شاء الله أسبوع 10 أيام هنزل القاهرة ويكون ليا الشرف إن أكون إن أقابل حضرتك يعني
المهندس منسي : تيجي تنورني في أي وقت
العميل : الله يخليك شكراً يا فندم.. شكراً .. شكراً .. سلام عليكم
المهندس منسي : مع السلامة
