ماكينة تعبئة سوائل غازية من شركة المهندس منسى
العميل: السلام عليكم
المهندس منسى: عليكم السلام ورحمة الله وبركاته
العميل: لو سمحت كنت عايز أعرف لو عايز خط يدوي حاجة حنينة للمياه الغازية تتكلف كام؟
المهندس منسى: خط يدوي لتصنيع المياه الغازية؟
العميل: آه
المهندس منسى: قصدك نص أتوماتيك مثلاً
العميل: أنا عايز حاجة حنينة من الآخر تتكلف كام؟
المهندس منسى: عندنا مكنة تعبئة
العميل: تتكلف كام؟
المهندس منسى:
العميل: دي تعبئة بس؟
المهندس منسى: آه دي تعبي بس آه
العميل: طب المنتجات والحاجات بتاعتها الحاجات اللي أنا بستخدمها بجيبها منين؟
المهندس منسى: المواد نفسها بتاعت المياه الغازية؟
العميل: آه
المهندس منسى: دي مش تبعنا، إحنا بتوع مكن وخامات، خامات اللي إنت هتعبي فيها
العميل: آه… الأزايز بتتكلف كام طب
المهندس منسى: الإزازة بقى بنقعد مع بعض ونشوف الإزازة وزنها في حدود أد إيه، لأنه كل إزازة ليها وزن، وكل إزازة ليها سعر
العميل: آه هي ممكن…
المهندس منسى: ممكن تبقى في حدود 65-75 قرش
العميل: الواحدة؟
المهندس منسى: آه
العميل: بالغطا بتاعها بكله؟
المهندس منسى: إن شاء الله
العميل: تمام.. إنت مكانك فين؟
المهندس منسى: إحنا عندنا حدائق القبة، مدينة نصر، باب الشعرية، 6 أكتوبر
العميل: أصل أنا من إسكندرية
المهندس منسى: آه
العميل: في صفحة على الفيس عندك ممكن أتفرج عليها على الحاجات دي؟
المهندس منسى: في صفحات آه
العميل: طب تمام، أنا هبقى لو إنت معاك واتس دلوقتي أنا هكلمك على الواتس تبعتلي اللينك بتاع الصفحة
المهندس منسى: والله يا سيدي أكتر حاجة تخنقني أنا أقعد أفحر على الواتس في شاشة 4 بوصة وأجيب عناوين وأجيب مش عارف إيه؟؟ ممكن تبعتلي على الإيميل أو تشرفنا بالزيارة بقى يستحسن، أما إن أنا أقعد أمسك موبايل وأقعد أفحر بصوابعي أطلع وأعمل… ده يجيب للواحد الضغط
العميل: تمام.. خلاص
المهندس منسى: خنيق قوي التليفونات دي خنيقة إن الواحد يتعامل معاها تجارياً
العميل: أنا عارف ربنا يعينك خلاص مافيش مشكلة
المهندس منسى: على أد مكالمة سلام عليكم، دي بكام، عندك ولا مش عندك، إنما أنا أفرج الناس على حاجة على الموبايل يبقى صعب قوي يعني
العميل: تمام.. لو أنا كتبت في السيرش كتبت رقم تليفونك في جوجل يظهرلي حاجة
المهندس منسى: الرقم ده في القديم، أما في الجديد… عموماً دور في الرقم ده هيطلعلك الأرقام الجديدة والأرقام القديمة
العميل: تمام زي الفل، اسم المهندس إيه؟
المهندس منسى: المهندس منسي
العميل: ماشي أوكيه خلاص هي عامله
المهندس منسى: إن شاء الله،المكنة رقمها 451
العميل: بتعبي لتر ولا أد إيه؟
المهندس منسى: بتعبي كيفما تشاء
العميل: زي ما أنا عايز ممكن لتر، ممكن نص لتر
المهندس منسى: اسمها مكنة بامب معيارية تكنولوجية حديثة هي، هي كل العملية إنت بتعاير لها بتقولها عبي لغاية كذا، بتعبي لغاية كذا وتقف
العميل: تمام.. تمام زي الفل
المهندس منسى: اسمها 450 ماركة المهندس منسي
العميل: وإنتم كان عندكم مكنة صناعة مكرونة ولا إنتم مكن تعبئة وتغليف بس؟
المهندس منسى: عندنا مكن تعبئة وتغليف بس
العميل: إنما الصناعة مش موجودة، كنت دخلت على الموقع بتاعكم قبل كده افتكرت
المهندس منسى: إحنا أوردي كل اللي يخطر على بالك في عالم الصناعة لأنه ده مجالنا وإحنا خريجين هندسة ميكاترونيك، لكن أنا بكلمك على البضاعة الحاضرة
العميل: هوه مكن صناعة المكرونة لما تبقى موجودة بتتكلف في حدود كام، ولا عالية دي
المهندس منسى: ركز واحدة واحدة، خلص دي الأول بعد كده خش في اللي بعديها
العميل: أصل أنا لسه بعمل دراسة جدوى، يا إما مياه غازية، يا إما مكرونة… فلسه في حيرة كده شويه، على الله
المهندس منسى: على الله كله
العميل: مع السلامة
