ماكينة تغليف اكياس الكرواسوه وماكينة حقن الكرواسوه من شركة المهندس منسي
العميل : السلام عليكم
المهندس منسي : عليكم السلام ورحمة الله وبركاته
العميل : حضرتك شركة المهندس منسي
المهندس منسي : أيوه
العميل : كنت عايز أسأل على معدات مخابز
المهندس منسي : إحنا تخصصنا مكن تعبئة وتغليف، يعني الحاجات بتاعت المخابز إن إحنا نعبيها ونغلفها
العميل : طيب المكن الباتيه نفسه ليه مكنة تغليف الباتيه
المهندس منسي : أيوه
العميل : ولا مكنة التغليف تغلف أكتر من نوع؟
المهندس منسي : عادي مكنة تغليف الباتيه تقدر تغلف الباتيه، وتغلف الكرواسوه، وتغلف الحاجات دي
العميل : بمقاسات متعددة صح؟
المهندس منسي : آه
العميل : والأشكال نفسها شكل التغليف واحد ولا على حسب التصميم الديزاين
المهندس منسي : على حسب التصميم بتاع حضرتك
العميل : تمام.. معلش المكنة تعمل كام؟ وسرعتها كام؟
المهندس منسي : في منها نص أتوماتيك وفي منها أتوماتيك
العميل : طب إيه الفرق؟
المهندس منسي : النص أتوماتيك بتحطلها المنتج في الكيس وتحطها على السير هي تلحمه وتوديه الناحية التانية، أما الأتوماتيك هي بتقوم بكل حاجة لوحدها
العميل : معلش، يعني حضرتك بتحطلها المنتج على السير وهي تاخده تغلفه
المهندس منسي : أيوه
العميل : ده النص أتوماتيك
المهندس منسي : أيوه إن إنت تحطلها الحاجة في الكيس وترمي الكيس على السير
العميل : لكن برده تغليف الأكياس والحاجات دي نفس الموضوع أتوماتيك
المهندس منسي : لأ الأتوماتيك بقى هي بتاخد الكيس رول وتفصله وتعبي وتغلف وتنزل
العميل : يعني كده مش موضوع أحطلها المنتج بس، الموضوع إن أنا بحطلها المنتج والأكياس وشغلها يدوي
المهندس منسي : لأ هوه إحنا كده اتلخبطنا…. نتكلم تاني من أول جديد نقول
النص أتوماتيك إنت بتحط المنتج في قلب الكيس وترمي الكيس على السير
العميل : تمام وهي تبدأ تغلف الكيس
المهندس منسي : آه طب الأتوماتيك؟؟؟ بتاخد الرول، بتحطلها الرول كامل مثلاً بيبقى 30-20 كيلو وهكذا، بتاخده المكنة نفسها بتفصلها وبتعبيه وبتغلفه وكل حاجة أتوماتيك
العميل : تمام… سعر كام النص أتوماتيك؟
المهندس منسي : النص أتوماتيك بتعمل ، والأتوماتيك بتعمل إحنا بنسمي بس بال إنما بناخد بالجنيه المصري
العميل : بمعدل كام ال النهاردة تعمل كام كده مصري؟
المهندس منسي : ال النهاردة يعمل 18
العميل : آه يعني…. بس ليه فيه تفاوت كبير قوي بين الـ 2 وبعضيهم؟
المهندس منسي : عشان إنت بتوفر عامل فهوه افتراض سعر العامل النهاردة كام، ومرتبه في الشهر كام، وهل هيطيع الأوامر وهيشتغل فعلاً ولا هيتعبك…. لو حسبت التكلفة هتلاقي الأتوماتيك أرخص هي الأتوماتيك أرخص من حيث ما أدوش دماغي بعامل واشتغل وما تشتغلش، واعمل وما تعملش… والإنتاج اتأخر ليه والحاجات دي
العميل : أيوه
المهندس منسي : معايا
العميل : آه مع حضرتك، يعني تاني النص أتوماتيك محتاجة إن أنا أقطع الرول وألف الكيس وأدخل فيه المنتج وهي بتغلفه
المهندس منسي : إنت بتاخد الأكياس جاهزة
العميل : آه
المهندس منسي : يعني إنت بتاخد مننا الأكياس جاهزة لو هتشتغل نص أتوماتيك، أما لو هتشتغل أتوماتيك هتاخدها رولات ببيبقى فيه فرق في السعر ما بين دي وما بين دي، في سعر التفصيل نفسه بيبقى فيه فرق، يبقى دي أول فايدة إنت استفادت بيها تاني فايدة إنت النهاردة وفرت عامل من العمالة
العميل : آه تمام… دي كده مثلاً بحوالي 72000 جنيه
المهندس منسي : لأ 81000 دي الأتوماتيك، أما النص أتوماتيك تعمل في حدود 3600 لو ضربنا 200 × 18 = 3600 طب لو ضربنا 4500 × 18 = 81000
العميل : طيب عندك مكن حقن باتيه أو كرواسوه ولا حضرتك ما بتشتغل فيهم
المهندس منسي : عندنا آه
العميل : طيب كام السعر؟
المهندس منسي : في حدود
العميل : بس كده مش غالية
المهندس منسي : دي مواصفات أوروبي، في مكن أرخص، بس أنا بكلمك على الأسرع وإنتاجها أعلى، لو عايز مكن أرخص ممكن تيجي تشرفنا بالزيارة تتفرج على المكن كله، ولكن أنا بكلمك على الحاجة اللي تنتج معاك بسرعة أعلى، ومواصفات أوروبية
العميل : ب مكنة الحقن
المهندس منسي : إن شاء الله
العميل : مكنة حقن كرواسوه دي حقن يدوي
المهندس منسي : لا مش يدوي، لأ تكاد تكون أتوماتيك، فيها دواسة كده إنت بتدوس على الدواسة هي تحقنلك جوه الكرواسوه المربى، أو الشيكولاته أو الحاجة اللي حضرتك عايز تحطها
العميل : تمام، أنا هقول لحضرتك على حاجة، أنا ممكن أزوركم في عنوان الفرع، أو الحاجات دي موجودة على الموقع بتاعكم
المهندس منسي : آه موجودة آه بس يستحسن لو شفت الحاجة لايف، يعني طبيعي، الحاجة بضاعة حاضرة، فلو جيت شفتها على الطبيعة يبقى أفضل بكتير
العميل : أنا ممكن أكتب العنوان
المهندس منسي : هبعتهولك في رسالة إحنا عندنا حدائق القبة، مدينة نصر، باب الشعرية، 6 أكتوبر
العميل : أقرب فرع ليا أكتوبر
المهندس منسي : ماشي هبعتهولك في رسالة حالاً هوه هيتوه معاك لما تقوله حقن كرواسوه، فقوله المكنة رقمها 404
العميل : تمام
المهندس منسي : لأنه هوه متعود إنه 404 بتعبي المربى، وبتعبي العسل، وبتعبي الشيكولاته، ممكن ما يكونش في باله إنها بتحقن الكرواسوه
العميل : آه
المهندس منسي : فإنت قوله أنا عايز المكنة 404
العميل : تمام… معلش سؤال تاني، ما بتشتغلوش في الفرادات الباتيه أو الكرواسوه أو الحاجات دي
المهندس منسي : لأ
العميل : طب ألاقيها عند مين… عندي هنا في مصر ولا مستورد أفضل؟
المهندس منسي : والله هوه أنا براهن بس على حاجة نقدر نصنعها في مصر بجودة عالية، بنحاول
العميل : طب…
المهندس منسي : أنا عن نفسي بصنع بره وبجمع
العميل : يعني إنت حضرتك بتصنع بالطلب وتجمع من بره
المهندس منسي : بنعمل إيه بقى عشان نجيب سعر أقل، إحنا مهندسين بنعمل تصميمات خاصة بينا إحنا بناء على ثقافة العميل بتاعنا لأنه شويه مريح دماغه يعني، ده رقم واحد رقم 2 عايز المكن كله كهربا بيوت عادية رقم 3 مافيش فنيين، كل واحد كلهم ناس لسه بادئة زي حضرتك كده وماعندهومش فكرة عن المكن ولا أي حاجة
العميل : شكراً
المهندس منسي : لأ لازم نكون صرحة مع نفسنا عشان نقدر نجيب حاجة نقدر نشغلها
العميل : آه… اللي حضرتك تقصده إن أنا أجيب مكنة سهلة مش محتاجة خبير يتعامل معاها
المهندس منسي : الله ينور عليك، مش محتاجة فنيين ولا مهندسين ولا تبقى حاطط صباعك تحت ضرس حد ييجي يتحكم فيك ولا قاعد ممكن ييجي، ولا يتأخر النهاردة يعطلك المصنع كله، لأ إحنا بنجيب مكنة سهلة جداً جداً أبسط مما تتخيل، بحيث إنك لو العمالة قرفتك النهاردة تروح ممشيها وتدرب العمالة الجديدة إنت بنفسك تدربهم، خش ما تفتيش اعمل كذا وكذا وكذا…
العميل : جميل كويس، عامل زي عندي في الشغل كده أنا شغال في سامسونج…
المهندس منسي : ما هو اللي جاي لو عارف في المكنة وإنت مش فاهم ما هو هيتحكم فيك
العميل : خلاص المكنة بتاعته هوه مش هتعرف فيها
المهندس منسي : الله ينور عليك، بقيت إنت موزع ليه هوه مشي ولا غاب يوم خلاص إنتاجيتي وقفت بقيت حضرتك موزع ليه، يقعد يتحكم فيك ويحط شروطه عليك…
العميل : مش كل الناس زي بعضها، ولكن الغالبية العظمى بقوا كده
المهندس منسي : فالنهاردة عملنا مكنة سهلة جداً فري إيزي بحيث إن صاحب الحاجة يبقى فاهم مكنته شغالة إزاي ويعرف يشغلها في أي وقت، غاب أجيب واحد غيره على طول، مش شرط أي ثقافة ولا أي خبرة
العميل : طب سؤالين معلش حضرتك فاتح طول أيام الأسبوع؟
المهندس منسي : الأجازة بس الجمعة
العميل : تمام…وفي رمضان المواعيد من كام؟
المهندس منسي : بس ساعة الفطار بنروح نفطر في البيت ونيجي
العميل : طب معلش التقسيط، لو أنا دلوقتي مش هقدر أدفع المبلغ كله بتاع مكنة التغليف الأتوماتيك
المهندس منسي : هي دي بقى النقطة الوحيدة اللي مش عارفين نعالجها في جمهورية مصر العربية
كل شغلنا كاش
العميل : تمام…
المهندس منسي : حوالنا نتفق مع بنوك ولكن البنوك بقت تاخد الحالات وتحط عليهم شروط وحاجات من دي فمعرفناش
العميل : البنوك طبعاً صعب يعني، كمان هتدخل في ربا وكده فصعب
المهندس منسي : والله كلها لفه حوالين بعضها، يعني عملية ربا…. طب ما هو البنك صريح بيقولك أنا باخد فايدة كذا، أما لو إنت خدتها بالقسط من أي حد هيضرب أد البنك مرتين وفي نفس الوقت لو إنت خدتها كاش كانت هتبقى أرخص
يعني مثلاً النهاردة لما تروح تجيب عربية عن طريق البنك هتلاقيه واخد من 50% زيادة، طب لو رحت جبتها عن طريق واحد هتلاقي واخد منك 100% زيادة، مضبوط ولا مش مضبوط
العميل : بياخد الـ 100 والمشكلة مافيش ثقة في التصرفات
المهندس منسي : آه… يمضيك على بياض ويبهدل الدنيا، طب وعلى إيه، البنك صريح ودغري وبيقولك والله أنا هديلك كذا.. كذا…ما علينا عملية الحلال والحرام دي أنا ما أعرفهاش، ولكن حاولنا بقدر الإمكان إن ننظم مع البنوك بحيث إن الناس تروح مع البنك تاخد الرسالة من هناك وتديهالنا وكده فالبنوك لقيتهم بيفرضوا شروط عقيمة شويه
العميل : والله أنا عند الفرن الدوار الإيطالي، فعندي كل المعدات، بس ناقصني 3 معدات، مكنة الحقن والتغليف، ومكنة الفرد
المهندس منسي : الفرد ديت إنت ممكن تعملها على إيدك
العميل : ما شاء الله
المهندس منسي : سعرها غالي في السوق، سعرها عامل زي مكنة التغليف عموماً أي مكنة مش عندنا إحنا أوردي عندنا شركة في الصين، وعندنا معرض بيبيع مكن في قلب الصين
العميل : آه
المهندس منسي : فأي حاجة لو إنت احتجتها من بره ممكن الشركة عندنا تجيبهالك وبيخادوا عمولة بسيطة 5%
العميل : طيب خلاص إن شاء الله اليوم اللي هاجي فيه أشوف هقولهم على الفرادة اللي أنا عايزها، أو المواصفات أو أشوف الحاجة وأقول لحضرتك عليها بحيث نتفق تيجي إزاي والكلام ده كله
المهندس منسي : ماشي يا غالي
العميل : شكراً جزيلاً على تعب حضرتك، متشكر جداً، جزاكم الله خير، السلام عليكم
