ماكينة تغليف القطع فلوباك من شركة المهندس منسى
العميل: السلام عليكم
المهندس منسى: عليكم السلام ورحمة الله وبركاته
العميل: شركة المهندس منسي
المهندس منسى: أيوه
العميل: إزي حالك يا باشا
المهندس منسى: الحمد لله
العميل: معاك أحمد الريان يا باشا من طنطا
المهندس منسى: أهلاً بيك
العميل: أهلاً بحضرتك،إحنا بنشتغل شغل التوريد بنعمل عسلية الجوهرة حاجة كده لو سألت عنها في السوق هتلاقينا الحمد لله موجودين في السوق بكثافة
المهندس منسى: الله يبارك في حضرتك يا باشا
العميل: أتعرف بحضرتك؟
المهندس منسى: المهندس منسي معاك
العميل: إزي حضرتك يا باشا
المهندس منسى: الحمد لله
العميل: دلوقتي أنا شفت العروض اللي على النت عايز أكلم حضرتك في المواصفات، في مستعمل؟
المهندس منسى: لا كله زيرو
العميل: طيب المكن اللي موجود مصري ولا صيني؟
المهندس منسى: إحنا براند، إحنا بنصنع قطع الغيار في الصين وبنجمعها هنا
العميل: يعني حضرتك بتعمل المكنة كده تقريباً زي مصطفى زكي؟
المهندس منسى: ما أعرفش مين مصطفى زكي، ولكن إحنا براند عالمي، يعني إحنا أوردي عندنا معرض بيبيع مكن في قلب الصين،يعني إحنا بنصنع قطع الغيار وبنجمعها وبنبيعها هناك وهنا
العميل: طب حضرتك عارف المكنة الصغيرة اللي هي الصيني؟
المهندس منسى: اللي بتعمل إيه؟
العميل: اللي بتغلف لحد 17، تعمل حتة علف، تعمل عسلية، تعمل لبان حنة… بتغلف كل حاجة
المهندس منسى: نص أتوماتيك قصدك اللي هي سير اللحام
العميل: سير لحام؟
المهندس منسى: إنت بتتكلم على سير اللحام، ولا بتتكلم على الفلوباك
العميل: لا الفلوباك يا باشا، الصغيرة الصيني بتاعت هاي تيك، بتاعت أحمد فتحي
المهندس منسى: أنا ما أعرفش مين أحمد فتحي ولكن أعرف مكنتي هي كويسة، إحنا عاملين مكنة عالية قوي
العميل: يعني حضرتك مش عارف هاي تيك؟
المهندس منسى: والله لو كنت أعرف يا سيدي كنت قلتلك أعرفهم، والله ما أعرفهم
العميل: يا باش مهندس أنا مصدق حضرتك أنا مش بكدبك، أنا بتكلم في حاجة تانية خالص
المهندس منسى: أنا مليش علاقة قوي هنا في مصر، هنا في مصر أغلبهم بياخدوا مننا مكن
العميل: أنا خدت من أحمد الصغيرة دي واخدها من أحمد من هاي تيك، بس أنا ما أعرفش إنت بتقولي إنك براند عالمي، يعني معنى كده إنت ممكن تكون شغال معاه
المهندس منسى: اكتب على النت كده المهندس منسي في الصين الدولي، إحنا كنا عارضين في معرض الصين الدولي كنا بنافس في الصينيين
العميل: الله يبارك لك
المهندس منسى: افتح كده واتفرج وشوف الفيديوهات هتلاقينا الحمد لله
العميل: الله يبارك لك يا باشا أنا شفت واتفرجت، أنا كل اللي بتكلم فيه دلوقتي إن المكنة الصغيرة دي بتعمل كام؟
المهندس منسى: بتعمل
العميل: الكبيرة بقى اللي هي الـ 250؟
المهندس منسى: بتعمل 7000
العميل: طب الصغيرة اللي هي الـ 200 تعمل
المهندس منسى: لأ الصغيرة اللي أنا أقصدها سير لحام، يعني حضرتك عبيت المنتج وبعد ما عبيته رميته على السير هوه بياخد الكيس يلحمه ويرمي الناحية التانية، فكده وفر عليك عامل
العميل: ده فرن شرينك يا باشا؟
المهندس منسى: لأ حاجة اسمها سير إنتاجي للحام،وعندنا مكنة تانية اللي إنت تحط القطع فيها هي ترميها لك في قلب الكيس، هي تفصل الكيس وترمي القطع دي في قلب الكيس، مكنة كويسة قوي، عامله
العميل: هي بتفصل الكيس إزاي يا معالي الباشا؟
المهندس منسى: تفصله إزاي ديت حضرتك لو جيت شرفتنا بالزيارة هتشوفها على الطبيعة، هتنبصت منها قوي
العميل: طيب أصل أنا عندي الصغيرة وعندي مصري وعندي كل حاجة، أنا محتاج مكنة كبيرة، 250 كبيرة، اللي هي بتكلم حضرتك فيها 140 ألف، حوالي 135
المهندس منسى: في الحدود دي
العميل: آه،طب باش مهندس منسي في حاجة نظام عندكم؟
المهندس منسى: للأسف كل شغلنا كاش
العميل: طيب شيكات على 6 شهور
المهندس منسى: يعلم ربنا حتى الكاش مش عاجبنا، بندور على حاجة أحسن
العميل: ممكن حضرتك تعدل يعني لو في حاجة تحطها مافيش مشكلة، يعني مثلاً معايا في حدود 35000 لو ينفعوا وشيكات على 6 شهور إحنا شركة مضمونة يعني اسأل عليها هتلاقيها موجودة الحمد لله في السوق
المهندس منسى: صدقني يعلم ربنا لو في حاجة ما كنت استنيتك تتكلم، كنت قلتلك على طول لأن دي تعتبر ميزة، كنت قلتلك على طول إحنا عندنا مميزاتنا كذا وكذا وكذا ونعملك يا باشا وكده يعني
العميل: إنت بتتكلم في صحة، بس الفكرة زي ما إنت شايف الوضع وشايف السوق، فالنهاردة كل السيولة متكومة في السلوفان.. إحنا بنشتغل مواسم، بنشتغل من شهر 9
المهندس منسى: إحنا مش أساسي على السوق المصري، لأنه لما ال طلع والجنيه نزل فالقوة الشرائية بتاعت الجنيه بقى الناس مش قادره تشتري، فإحنا..
العميل: ما هو ده اللي بقول لحضرتك فيه
المهندس منسى: وتصدق إن إحنا بنبيع هنا بنفس السعر اللي بنبيع بيه في الصين، بعد الجمارك والضرائب، نفس السعر اللي بنبيع بيه في الصين نفس السعر اللي بنبيع بيه هنا
العميل: يبقى هنا أحسن بقى
المهندس منسى: لأ هناك أحسن طبعاً، لا جمارك، ولا ضرائب
العميل: آه يعني بعد ما بتصرف جمارك وبتصرف ضرائب بتبيع بنفس السعر
المهندس منسى: بس مش للجملة طبعاً، هناك البيع جملة والبيع قطاعي
العميل: فاهم.. فاهم.. إنتم بتشتغلوا تغليف بس
المهندس منسى: ولو هناك نزلنا السعر زيادة عن اللزوم يسبونا، يبهدلونا
العميل: آه طبعاً
المهندس منسى: يعني إحنا مثلاً نفسنا ننزل السعر هناك، ما نقدرش،إنما هنا عادي نزل براحتك
العميل: ما هي الفكرة كلها إن السوق زي ما إنت شايف الدنيا ملبشة فإحنا بنقول نزق، إحنا بنشتغل مواسم موسمنا بيبدأ في شهر 9 بيخلص في 3.5 نوصل 4، دراسة مدارس
المهندس منسى: آه..
العميل: فإحنا بنقول معانا 6 ـ 7 شهور، معانا دلوقتي 35000 عايزين نحطهم ونعمل 6 شيكات مثلاً كل شيك يبقى 25 أو شوف المبلغ اللي باقي أد إيه وإن شاء الله تسأل وتجرب
المهندس منسى: صدقني يعلم ربنا لو كان فيه حاجة أنا ما كنت اتأخرت عنك، كنت قلتلك عليها على طول، إنما صدقني يعلم ربنا إن أسعارنا كلها نهائية وكاش
العميل: مافيش مشاكل، طيب أي حاجة استعمال موجود مافيش؟
المهندس منسى: لأ هوه إحنا ما بنشتغلش في المستعمل
العميل: أنا فاهم يا باشا، ممكن تكون مكنتكم إنتم حد باعها لكم، حد قفل صفى… يعني مكنتك لو جيت بعد كده قلتلك أنا خلاص بلم ما تاخدهاش مني؟
المهندس منسى: أنا أشتريها منك، مش هيبقى أنا أشتريها منك، أقولك مثلاً هشوف حد ياخدها، بس خدمة
العميل: والله إحنا معانا يا معالي الباشا قدامنا شهر، فإنت تليفون حضرتك معايا أهوت، وأنا تليفوني مع حضرتك سجله، أحمد الريان طنطا، فإنت يا باشا لو فيه…
ربنا يبارك في حضرتك، ويعني بإذن الله هيبقالنا قعدة بقى طالما كده مافيش يبقى لينا قاعدة في شهر 11 يكون إحنا لمينا شوية السيولة اللي موجودة معانا ونبدأ نخش لحضرتك ونشوف الدنيا فيها إيه، فإنت برده خلي الكلام مفتوح، فخلي معاك التليفون لو ظهرت حاجة زي كده على سكة مثلاً 65 ـ 70 حاجة شغالة وكويسة، مكنة ما تعبتش بس راجل بصفي في ناس كده
اليومين دول ربنا مش مسهل معاها فتعمل كده، حاجة ظهرت قدامك 60-70 ألف جنيه حاجة ظهرت قدام حضرتك اتصل بيا
المهندس منسى: إن شاء الله،دي بتبقى نادرة جداً جداً لأبعد الحدود اللي ممكن تتخيلها، ليه؟؟ أغلب الناس اللي اتعاملوا معانا الحمد لله من فضل ربنا ربنا يسرلهم الأمور
العميل: يا رب
المهندس منسى: المرونة والسلاسة بتاعت تشغيل المكنة عندنا سهلت الدنيا على الآخر، يعني يكفي النهاردة اللي بيقول لحد ده دي المهندس منسي، بتبيع نفسها، أنا بكون سعيد بالكلمة دي لما حد يوصف لحد يقوله دي مكنة المهندس منسي
العميل: ما هو ده اللي أنا بتكلم فيه
المهندس منسى: فده نجاح في حد ذاته إن مكنتك بقت عامله زي الجنيه الذهب
العميل: الحمد لله ده كويس جداً، الفكرة كلها دلوقتي لو في حاجة ظهرت مافيش مشاكل،بتشتغلوا مكن صيني مكن تغليف بس؟
المهندس منسى: مكن تعبئة وتغليف بجميع أنواعه
العميل: آه مافيش شغل تبريد وتغطيس مافيش
المهندس منسى: الحاجات دي بتبقى بالطلب بس مش مركزين عليها قوي
العميل: ممكن تعملوا غطاسة؟
المهندس منسى: عادي الحاجات ديت بنصنعها بالطلب بس مش مركزين عليها قوي
العميل: يعني بتصنعوها
المهندس منسى: لأنه اتشهرنا أكتر في التعبئة والتغليف
العميل: يعني الغطاسة لو تعملوا غطاسة في حدود 40 سم تكلفنا كام؟
المهندس منسى: دي نقعد مع بعض وندرسها ونعملها دراسة تكاليف
العميل: خلاص توكلنا على الله، يبقى إن شاء الله بعد العيد لينا قاعدة مع بعض
المهندس منسى: إن شاء الله
العميل: العنوان زي ما هو على النت
المهندس منسى: إن شاء الله
العميل: ماشي يا أستاذ، أنا متأسف إن أنا كلمتك حضرتك متأخر كده
المهندس منسى: لا خد راحتك
العميل: ماشي يا معالي الباشا، اتفضل يا باشا، اتفضل
