ماكينة لحام اغطية عبوات الزبادي من شركة المهندس منسي
العميل : إيه يا باش مهندس إزي حضرتك
المهندس منسي : أهلاً بيك يا غالي
العميل : الدكتور خالد مع حضرتك
المهندس منسي : آه يا دكتور
العميل : أنا بعتلك رسالة بالإيميل بتاعي، ودا الواتس آب ممكن أبعتلك كمان رسالة من الواتس آب ممكن تبعتلي العرض عليه
المهندس منسي : ماشي يا غالي
العميل : أبعتلك على الواتس آب رسالة؟
المهندس منسي : ابعتلي آه، بس أنا هرد بعد ساعة كده أو ساعتين أكون وصلت لأني في الطريق ومش عارف اكتب اوي علي الواتس وانا سايق
العميل : مافيش مشكلة، بس ابعتها النهاردة الله يخليك
المهندس منسي : إن شاء الله تحت الأمر
العميل : الله يبارك فيك، ولو أمكن لو عندك صورة للمكنة ابعتهالي على الواتس كمان، ماشي
المهندس منسي : آه.. وأخباركم إيه في الألومنيات
العميل : ده الوزارة بقى، إحنا في المشروع دلوقتي، مركز البحوث اللي ممكن ياخد، إنت عندك عبوة ألومنيوم
المهندس منسي : الألمونيوم اللي بغطي عبوات الزبادي
العميل : من فوق يعني، طيب، لأ إحنا بنعمل زبادي فريش اللي هوه الغطا العادي ده
المهندس منسي : آه.. آه.. آه
العميل : طب إنت عندك مكنة اللحام بتاعتها؟
المهندس منسي : عندي آه
العميل : كويس.. كويس، مكنة اللحام بتاعتها كام عين؟
المهندس منسي : 4 عين
العميل : آه عندك العبوة الصغيرة الزبادي الصغير
المهندس منسي : لا عادي العبوة اللي إنت عايزها مش فارقة معايا
العميل : لأ أنا عايز مثلاً عبوة تاخد من 200-300-400 جرام بتاعت الزبادي الكبيرة
المهندس منسي : عادي.. عادي.. مافيش مشكلة
العميل : موجودة عندك يعني، وعندك المكنة بتاعتها
المهندس منسي : آه.. كل المقاسات بتاعتها ما تشغلش بالك يعني
العميل : طيب كويس.. كويس، وعندك مكن تعبئة ولا تعبئة يدوي؟
المهندس منسي : عندي الـ 2 إن شاء الله
العميل : باسم الله ما شاء الله عليك، حلو قوي، خلاص لو في حاجة زي كده ابعتلي عليها على الواتس آب هبعتلك.. ابعتلي كل الصور بتاعتها وممكن أخليهم في الوزارة يشتروا واحدة أو 2 لأنهم بيعبوا تعبئة عادية كده كلام فارغ، اللي هي البلدي، إحنا عايزين نطور يا باش مهندس منسي
المهندس منسي : لا تحت أمرك
العميل : وإنت أبو التعبئة والتغليف يعني
المهندس منسي : الحمد لله، حبيناها وأخلصنا ليها ففتشتلنا كل أسرارها
العميل : لا.. لا.. إنت راجل مخلص في كل شغلك يعني
المهندس منسي : الحمد لله
العميل : إن شاء الله هعمل مؤتمر قريب هبقى أدعوك فيه، هبقى أعملك دعوة ليه
المهندس منسي : فين؟
العميل : هعمله قريب في قاعة المؤتمرات بتاع العلاقات الخارجية
المهندس منسي : لا ده أنا هزعل لو ما دعتنيش ليه
العميل : والله.. طيب
المهندس منسي : أنا عاشق للعلم، عاشق…. إنت عارف متعتي لما أقعد في مؤتمرات علمية، دي متعة بالنسبة لي
العميل : إنت راجل محترم يا باش مهندس منسي
المهندس منسي : الله يبارك لك
العميل : هبعتلك رسالة دلوقتي فاضية وإنت ابعتلي على الواتس آب الله يخليك، ماشي
المهندس منسي : تحت أمرك يا غالي
العميل : ماشي يا بيه شكراً، بعتلك الإيميل في رسالة على فكرة
المهندس منسي : آه ماشي
العميل : بس الواتس آب أسرع
المهندس منسي : حاضر
العميل : ماشي.. ماشي
المهندس منسي : ماشي يا غالي
العميل : شكراً
المهندس منسي : مع السلامة
العميل : مع السلامة
