ماكينه الشرينك الحراري من شركة المهندس منسي
العميل: سلام عليكم
المهندس منسي: عليكم السلام ورحمة الله وبركاته
العميل: إزيك يا فندم عامل إيه
المهندس منسي: الحمد لله
العميل: مع حضرتك محمد من شركة سكور للدعاية والإعلان
المهندس منسي: أهلاً وسهلاً
العميل: بقول لحضرتك كنت بسأل على ماكينات الشرينك رول، أنا عندي شغل بسيط، يعني بنتج حاجات صغيرة بابل مش عارف إيه.. حاجات صغيرة يعني…. يعني قول أقصى حاجة ، فكنت عايز حاجة إن أنا أغلف أو أعمله شرينك
المهندس منسي: موجود
العميل: طب إيه أصغر حاجة موجودة أو أسعارها إيه؟
المهندس منسي: أصغر حاجة موجودة تاخد منتج ارتفاعه 16 سم × عرض 27 سم × الطول اللي إنت عايزه
العميل: آه… في أي طول؟؟
المهندس منسي: آه عشان هي سير، فأي طول شغال معاها ما تفرقش
العميل: مش الخامة بتبقى طول × عرض بس، ولا هي المكنة بتخش فيها العبوة وهي….
المهندس منسي: لأ طول × عرض × ارتفاع، يعني نفترض إن المنتج بتاعك رزمة ورق مثلاً، مش بيبقى ليها ارتفاع
العميل: آه مثلاً الـ 500 ورقة فوق بعض
المهندس منسي: آه… ليها ارتفاع وليها عرض
العميل: هي المكنة أتوماتيك يعني أنا بحط عليها المنتج وهي تنشف….
المهندس منسي: آه أتوماتيك تعمل كل حاجة
العميل: طب وفي حاجة أكبر من دي؟
المهندس منسي: آه في بقى ارتفاع 20 سم × عرض 40 سم × أي طول..وفي مقاس تاني 35 ارتفاع × 45 عرض برده في أي طول
العميل: أسعارهم إيه يا فندم؟
المهندس منسي: المقاس اللي هوه 16 × 26 بيعمل 3500
العميل: آه…
المهندس منسي: بتكتب؟؟؟
العميل: آه بكتب ورا حضرتك آه
المهندس منسي: والمقاس اللي هوه بياخد منتج ارتفاعه 20 × عرض 40 × أي طول دي سعرها 4200
العميل:آه…
المهندس منسي: والمقاس التاني اللي هوه ارتفاع المنتج 35 × عرض 45 × أي طول دي سعرها 6500
العميل: آه…. طب والخام بتاعه نفسه بيكون أطواله إيه؟
المهندس منسي: المقاس اللي إنت عايزه
العميل: يعني أنا دلوقتي، معلش أنا بطول على حضرتك بس في حاجات عايز أفهمها قوي لأن أنا معنديش بيها خلفية، يعني دلوقتي المنتج بتاعها بيكون رول صح…
المهندس منسي: بيكون رول أو أكياس أو تيوب، إنت اللي بتحدد
العميل: إيه الفرق بينهم؟
المهندس منسي: ما هو لو كيس يبقى كل العملية إنك هتحط المنتج في قلب الكيس وترميه على السير وخلاص، لو تيوب خرطوم يعني هتحط المنتج جوه التيوب وترميه برده على السير وخلاص، أما لو رول هيبقى حاجة من 2، يا رول تيوب هتفصله إنت، يا رول مشقوق هتاخد معاه حاجة اسمها قطاعة، يستحسن تاخد المنتج عبارة عن أكياس أو تيوب
العميل: آه.. هي دي الخامة نفسها، أنا بتهيقلي كل الشغل بيبقى علب، فالعلب دي اللي هي بتبقى أكياس صح؟
المهندس منسي: آه أكياس آه، أكياس أو علب مافيش مشكلة
العميل: الكيس ده بقى بيكون من جوه مفتوح، يعني أنا ممكن أرص حاجات كتير جنب بعضها وأحطها على المكنة وهي تقفلها صح؟
المهندس منسي: مضبوط آه
العميل: ولا حتة حتة برده
المهندس منسي: عادي الـ 2 قدامك، المهم الارتفاع نفسه ما يزيدش
العميل: طب والخامة دي تقريباً سعرها كام؟
المهندس منسي: في حدود 28 جنيه للكيلو
العميل: طب هو الكيلو يعمل كام حتة تقريباً لو 20 × 40؟
المهندس منسي: لا دي ما أعرفهاش، أنا ببيع بالكيلو
العميل: آه أصل أنا عايز أعرف أحسب التكاليف
المهندس منسي: آه… يبقى تاخد بكره وتحسبها
العميل: آه باخد بكرة وأجرب وأشوف هتطلعلي إيه صح؟
المهندس منسي: مضبوط آه
العميل: ودي بشتغل على كهربا عادية اللي هي…
المهندس منسي: آه كهربا عادية اللي هي سنجل فيز
العميل: وطب حجم المكنة نفسها أد إيه؟
المهندس منسي: أراوند حوالي 65 × ارتفاع 75 × طول متر مثلاً
العميل: والأسعار دي أسعار نهائية ولا…
المهندس منسي: آه إحنا شركة إنترناشيونال، مش شركة فردية، شركة إنترناشيونال يعني ملتزمين كلنا بقائمة أسعار
العميل: آه…
المهندس منسي: والدفع كله كاش
العميل: إن شاء الله..طيب ماشي يا فندم، أنا شاكر جداً على… طب دي لو روحت أجيبها على طول مافيهاش أي مشكلة صح؟
المهندس منسي: آه إن شاء الله بضاعة حاضرة
العميل: طب في ناس حضرتك وديتلهم مكنة في الهرم ولا حاجة بيشتغلوا عليها….
المهندس منسي: أنا بايع لغاية دلوقتي أكتر من 3000 مكنة، فأنا مش هفتكر مين اللي بعتله ومين اللي ما بعتلوش
العميل: لا أصل أنا قصدي لو في حد جنبي عميل عند حضرتك في الهرم ولا حاجة أنا أقدر….
المهندس منسي: إحنا مجموعة شركات مش شركة واحدة، فمش هنقدر نفتكر مين ولا مين… يعني مش هنفضل قاعدين استعلامات، يعني اللي بنبعله خلاص انتهت القصة بتاعته
العميل: طيب مافيش مشكلة، أنا شاكر جداً يا فندم لحضرتك، شكراً لذوقك
