مكنة لحام واكياس الومنيوم لتعبئة البودر من شركة المهندس منسى

العميل: السلام عليكم

المهندس منسى: عليكم السلام ورحمة الله وبركاته

العميل: شركة المهندس منسي

المهندس منسى: أيوه

العميل: طيب والله كنت بسأل على حاجتين، عايز أسأل على أكياس الألومنيوم لتعبئة الباودر، دي بتتباع بالألف ولا بتتباع بالكيلو؟

المهندس منسى: لو بالكيلو هتاخدها رولات، لو متفصلة جاهزة وهتاخدها أكياس يبقى تبقى بالعدد

العميل: طب بكام الألف لو بالعدد؟

المهندس منسى: ده حضرتك بقى هتيجي تشرفنا بالزيارة تتفرج على العينات وبناء على العينة اللي إنت هتختارها بنحدد لك سعرها وإنت قاعد

العميل: دي مقاسات مختلفة ولا مقاس واحد استاندر؟

المهندس منسى: اللي إنت عايزه

العميل: طيب لو أنا هاخدها بقى رولات بتبقى إيه؟

المهندس منسى: بتبقى بالكيلو

العميل: لو أنا هصنع يعني، يعني هاخد من عندكم الورق وآخد من عندكم المكنة اللي هتصنع

المهندس منسى: آه مافيشهاش مشكلة عادي

العميل: طيب الورق بكام والمكنة بكام؟

المهندس منسى: هوه الورق النهاردة مش متذكر السعر، بس أعتقد إن هوه في حدود 60-56 في الحدود دي

العميل: اللي هوه إيه؟

المهندس منسى: الورق ألومنيوم بولي إيثيلين اللي هوه بولي إستر ألومنيوم بولي إيثيلين

العميل: ده سعر إيه حضرتك؟

المهندس منسى: ده سعر الكيلو،أراوند، أنا مش فاكر السعر، أنا بديلك أعلى سعر عشان خاطر ما تجيش تنفذ وتزعل وتقول إنتم بتدوني أسعار ومش عارف إيه، إنما لو جيت هتلاقي أسعار أقل من كده بالتأكيد يعني

العميل: أنا هاجي حضرتك.. طيب أنا كنت في المعرض ومعايا الكتالوج بتاعكم، فأنا بكلمك من الكتالوج اللي معايا

المهندس منسى: أنهي معرض اللي حضرتك قابلتنا فيه؟

العميل: كان معرض القاهرة اللي فات ده

المهندس منسى: آه سوق القاهرة الدولي

العميل: آه… في مكنة لحام وتصنيع الألومنيوم متعددة الطبقات بتكتب تاريخ وكده يعني، ماركة إم تو باك 301 معروضة هنا قدامي

المهندس منسى: آه

العميل: مش هي دي اللي بتصنع أكياس حضرتك

المهندس منسى: هي دي آه

العميل: طب دي بتعمل كام؟

المهندس منسى: يعني 3600 جنيه

العميل: دي مافيش منها حاجة أقل في السعر، مش مصنع يعني ده حاجات شغل هواية يعني

المهندس منسى: آه… صدقني لو كان في حاجة أقل ما كنت اتأخرت عنك

العميل: طيب عموماً أنا هاجي لحضرتك في أقرب وقت وإذا ما كنش هاخد المكنة يبقى أكيد هاخد الأكياس إن شاء الله

المهندس منسى: تيجي تنورني في أي وقت

العميل: ربنا يخليك يا بيه، شكراً، متشكر خالص، اتفضل