مكنه تعبئة الزيت النص اتوماتيك موديل 403 اربعة نوزل ماركة المهندس منسي
العميل : سلام عليكم
المهندس منسي : عليكم السلام ورحمة الله وبركاته
العميل : إزي حضرتك يا فندم
المهندس منسي : أهلاً بيك اتفضل
العميل : بقول لحضرتك حضرتك كنت عارض مكن لتعبئة الزيت وكده
المهندس منسي : آه
العميل : خطوط إنتاج حضرتك لو عايزين مثلاً مكنة بدائية تساوي كام إن شاء الله
المهندس منسي : إحنا عندنا مكنة بتبدأ من 2200 وعندنا مكنة تانية بتعمل 7000 وعندنا مكنة تانية أتوماتيك 2 نزل و4 نزل، وفي 4 نزل نص أتوماتيك، في حاجات كتيرة قوي
العميل : يعني النص أتوماتيك اللي هي 4 نزل دي بكام؟
المهندس منسي : بتعمل 28500
العميل : آه.. طب دي إنتاجها حضرتك أد إيه يا فندم؟
المهندس منسي : 4.5 طن في الساعة
العميل : طب بص يا فندم صلي على النبي
المهندس منسي : عليه الصلاة والسلام
العميل : أنا أصلاً حضرتك بره وكده مسافر
المهندس منسي : حمد الله على السلامة
العميل : فجي ربنا أكرمني.. الله يسلمك، فأنا بقالي 3 ـ 4 شهور عمال أدور على أي مشروع، فبسأل حضرتك على مشروع اللي هو إيه… فدخلت على النت فحضرتك شايف مشروع تعبئة الزيوت ده كويس ولا الواحد ….
المهندس منسي : أنا تخصصي تصنيع مش تسويق، فأنا أخدمك بس في الصناعة، لأنه دي مجالات أنا تخصصي تصنيع، إنما أقدملك مكنة مضبوطة وثقة وماركة وحاجة محترمة، فهمتني إزاي، عملية إن أنا أسوق ديت أو أشوف السوق دي مش تبعي، أنا أشوف السوق أخباره إيه في مجالي أنا في مجال التصنيع، وحتى لو إنت هتعمل نفس المجال اللي أنا بعمله ولا تفرق معايا، يعني مثلاً لو إنت قلتلي مثلاً في مشاريع إيه
العميل : عند حضرتك يعني ممكن شايف إن أنا أكون فيها،
المهندس منسي : أقولك آه في عندي مشروعين كويسين بس حسب رأس المال اللي مع حضرتك
العميل : اللي همه إيه بقى حضرتك؟
المهندس منسي : لأنه في رأس مال مثلاً في حدود 75000 ده مشروع نفخ عبوات الـ بي في سي
العميل : يعني إيه مش فاهم معلش
المهندس منسي : بص يا سيدي، العبوة اللي إنت هتعبي فيها الزيت ديت عشان تبقى عبوة لازم تتنفخ
العميل : آه…
المهندس منسي : لأنه بيبقى بلاستيك وبيتنفخ
العميل : تمام.. تمام
المهندس منسي : ده اسمه مشروع نفخ عبوات الـ بي في سي، الستارت، ستارت يعني بداية، البداية بتاعته بتعمل تبدأ من 56 مثلاً وإنت طالع لغاية 75
العميل : تمام…
المهندس منسي : في حاجات تانية مشاريع تانية تحت الـ 100 ألف، وفي مشاريع تحت الـ 50 ألف، وفي مشاريع تحت الربع مليون، وفي مشاريع تحت الـ 125 ألف، وفي مشاريع تحت المليون، فأنت …..
العميل : إنت حضرتك من فين يا فندم؟ المصنع أو المصنع فين؟
المهندس منسي : إحنا عندنا في القاهرة حوالي 9 فروع، وبره حوالي 3 فروع
العميل : طيب ماشي…
المهندس منسي : يعني عندي الفرع الجديد بتاع هونج كونج يوم الثلاثاء
العميل : ألف ألف ألف مليون مبروك يا باشا، ألف مليون مبروك يا باشا
المهندس منسي : إن شاء الله
العميل : إن شاء الله بإذن الله رب العالمين، ربنا يوسعها عليك
المهندس منسي : في القاهرة إحنا عندنا حدائق القبة، مدينة نصر، باب الشعرية، العبور، 6 أكتوبر
العميل : لو عايز آجي أقابل حضرتك الإدارة مثلاً آجي فين؟
المهندس منسي : أنا ببقى موجود السبت في مدينة نصر، وباقي أيام الأسبوع في باب الشعرية من 5-11 بالليل
العميل : تمام… فين في باب الشعرية طب حضرتك شايف يا فندم المشروعات دي ماشيه كويسة ولا….
المهندس منسي : ممتاز.. ممتاز، بس لف على الناس اللي بيعبوا زيت وبيعبوا سمنة وبيعبوا كلور وبيعبوا منظفات وبيعبوا مستحضرات تجميل وأدوية ومواد كيماويات، كل الناس ديت لف عليهم وقولهم إن أنا فتحت مصنع، ما تقولهمش أنا هفتح مصنع، قولهم أنا فتحت مصنع وهعملكم شغل يعني
العميل : آه… هي المكنة دي بتعبي مبيدات وحاجات زي كده؟
المهندس منسي : مش بعتبي إحنا بنتكلم بنقول إحنا هنصنع العبوة اللي هيتعبى فيها الحاجات…
العميل : آه.. آه.. تمام.. يعني المكنة دي بتاعت تصنيع عبوات مش بتاعت تعبئة زيت
المهندس منسي : آه لأ مش إنت قولتلي عندك مشروع إيه كويس، أما مشروع تعبئة الزيت أنا معرفش هوه عالي ولا مش عالي، معرفش كويس، لأ، إنما أنا بكلمك في مجالي أنا لأن أنا عندي أوردي مصنع عبوات
العميل : تمام… تمام…
المهندس منسي : فعادي لما بيجيلي حد ببيعه وبشتغل مع غيري، عامل لغاية دلوقتي أكتر من 500 مصنع على مستوى العالم العربي
العميل : الله أكبر.. الله أكبر.. تمام، تمام خلاص يلزمنا إن إحنا نتقابل بدل الواتس وإن شاء الله بإذن الله خير إن شاء الله
المهندس منسي : ماشي يا غالي
العميل : اسم حضرتك باش مهندس إيه؟
المهندس منسي : مهندس منسي
العميل : ماشي يا باش مهندس منسي أخوك محمد من القليوبية شبين القناطر
المهندس منسي : ماشي يا غالي
العميل : ماشي..ماشي.. ماشي الله خليك
المهندس منسي : مع السلامة
العميل : الله يخليك الله يسلم حضرتك مع السلامة
