مكنة لحام وطباعة تاريخ من شركة المهندس منسى
العميل: السلام عليكم
المهندس منسى: عليكم السلام ورحمة الله وبركاته
العميل: لو سمحت أنا مدام جيهان بكلمك من إسكندرية بخصوص مكنة لحام شفتها على النت وجبت نمرتكم من على النت
المهندس منسى: آه
العميل: في مكنة معينة كده كنتم منزلنها اللي هي مكنة لحام وطباعة تاريخ
المهندس منسى: آه موجودة
العميل: هل ليكم موزع في إسكندرية أو حاجة؟
المهندس منسى: هوه إحنا لينا مصنع لسه بنبني فيه في برج العرب
العميل: لسه بتبدأوا تبنوا فيه
المهندس منسى: لو عندك حد يساعدنا في الرخص يبقى خدمتينا
العميل: إسكندرية جميلة، جميلة، برخصها، بحيها، بموظفيها بكل حاجة
المهندس منسى: ربنا ييسر
العميل: طب لازم نيجي نشوفها عندكم يعني مش كده
المهندس منسى: إن شاء الله،إنما هي موجودة في القاهرة بضاعة حاضرة
العميل: طيب هوه مكتوب أو ما يوازيها
المهندس منسى: آه اضربي × 18 سعر النهاردة يعني 3600 جنيه مصري
العميل: طب التروس من جوه ستالس ولا…
المهندس منسى: حديد صلب، حديد صلب سبيكة مخصوصة عشان خاطر ما تبريش… يعني إحنا مصنعين قطع الغيار لحسابنا في الصين ومجمعنها لحسابنا، يعني إحنا مش بنروح نشتري مكن من الصين ونيجي نتسبب فيه، لأ إحنا بنصنع قطع الغيار لحسابنا هناك بمواصفتنا إحنا وبنجبها نجمعها
العميل: طيب
المهندس منسى: عشان الضمان بس
العميل: في منها مثلاً أقل شوية ما بتطبعش تاريخ إنتاج أو حاجة
المهندس منسى: لا صدقيني ده آخر سعر عندنا
العميل: مكتوب العنوان خلف رئاسة حي باب الشعرية القاهرة، هوه التفصيل مش كده ولا في حاجة أشهر شويه؟
المهندس منسى: في عندنا حدائق القبة، مدينة نصر، باب الشعرية، 6 أكتوبر
العميل: يعني لو جايه من إسكندرية هيبقى المناسب ليه إيه لو طلعت من على الدائري مثلاً
المهندس منسى: والله كل واحد بيجي من إسكندرية واحد يقولي إديني كذا… فإنت امسكي الفروع وادرسيها وقولي والله أنسب فرع ليا كذا كده يعني
العميل: طب الفرع الوحيد اللي مكتوب عندي اللي هوه بتاع باب الشعرية ده، يعني أدخل على حاجة تانية ألاقي باقي الفروع أو حاجة
المهندس منسى: آه اكتبي عناوين شركة المهندس منسي هيطلع لك العناوين كلها
العميل: طيب ماشي، خلاص في أيام أجازة أو حاجة
المهندس منسى: يوم الجمعة
العميل: وآخرنا لغاية الساعة كام؟
المهندس منسى: 9 مساء
العميل: خلاص ماشي، نشوفك على خير بإذن الله
المهندس منسى: الله يبارك فيكي
العميل: إن شاء الله شكراً
