مكنه اتوماتيك لتعبئة اظرف الصلصة والصابون السائل من شركة المهندس منسي

العميل : سلام عليكم

المهندس منسي : الله وبركاته

العميل : إزيك يا باش مهندس

المهندس منسي : أهلاً بيك

العميل : كل سنة وإنت طيب يا فندم

المهندس منسي : وإنت طيب

العميل : معاك عبد الله من سوهاج

المهندس منسي : أهلاً وسهلاً

العميل : أهلاً وسهلاً، والله يا فندم كنت عايز مكنة أتوماتيك تعبئة السوائل الصلصة أظرف، صابون، كاتشاب كده يعني

المهندس منسي : موجودة

العميل : تشتغل كام… مثلاً من كام جرام لكام؟

المهندس منسي : ده براحتك إنت اللي بتحدده مش قضية، في  إمكانية لغاية 100 جرام، وفي إنت نفس المكنة تخليها لـ 500، وممكن نفس المكنة تخليها للتر

كل اللي فيها إنت بتغير البامب نفسها، بص هي المكنة مكونة من 3 حاجات، المكنة الأتوماتيك كده أنا بكلمك، مش النص أتوماتيك، ولا إنت عايز النص أتوماتيك؟

العميل : لا الأتوماتيك

المهندس منسي : الأتوماتيك بتعمل مكونة من 3 أجزاء جزء المكنة المازر بورد بتاعها، المكنة نفسها، وجزء التاني اللي هوه وحدة التغذية اللي هي الوحدة اللي بتعبي

العميل : تمام

المهندس منسي : والجزء التالت المخ اللي هوه الرأس العقل، اللي هوه جهاز لوحة التحكم

العميل : تمام.. أنا عندي مكنة أتوماتيك بعبي رز وكده يعني

المهندس منسي : آه.. هوه إحنا مكنتنا شويه بسيطة وسهلة مبسطنها على الآخر، بحيث إنك تقدر تغير المكنة في يوم من الأيام، يعني المكنة اللي عند حضرتك كده متقفله على الرز والسكر، طب إنت عايز تغيرها في يوم من الأيام لسوائل، مش هتقدر

العميل : لا مش هتتغير لا

المهندس منسي : آه بالنسبة إحنا بقى نقدر نغيرها

العميل : والله بجد، يعني تشتغل دي ودي؟

المهندس منسي : آه في مكنتنا إحنا نقدر نغيرهالك، نقدر نخلي الـ 2 مع بعض، ونقدر نغيرهالك ممكن نخليهالك رز وسكر، وممكن نخليهالك توابل، وممكن نخليهالك سوائل، وممكن… يعني دي ميزة من مميزات المكن بتاعنا

العميل : تمام… بسم الله ما شاء الله، يعني ديت تشتغل كاتشب عادي اللي هوه، الكاتشب مش عارفه أنا كام جرام

المهندس منسي : عادي ما هوه الكاتشب بيبقى حوالي 5جرام، 10 جرام

العميل : بس الكرافته ببتغير ولا حاجة ولا…

المهندس منسي : عادي.. إنت ليك كرافته عندنا بتاعتك

العميل : طب هي بتشتغل كام كيس في الدقيقة

المهندس منسي : عملية كام كيس في الدقيقة ديت، يعني إحنا بنقول دلوقتي كام كيس في خامة شكلها إيه؟

العميل : يعني كام؟

المهندس منسي : ما أنا جايلك أهوه، ولكن هل الخامة نفسها هتنزل ملحومة على السرعة دي، هنا إحنا بنتكلم في إيه؟ الخامة، درجة نزول المنتج، واخد بالك، إنما عادي إنت ممكن تعمل 50 و 70 إنما في الآخر في حاجات هتتحكم فيك، المادة بتاعتك بتتضخ على كام؟ والخامة نفسها بتتلحم على تايم أد إيه؟

العميل : تمام.. تمام.. طب بالنسبة للصلصة بتكون فيها تعقيم والدنيا كلها مضبطة عشان أنا بعبي صلصة في مصنع يعني، كان في مشكلة في التعقيم فالصلصة بتنفخ زي ما حضرتك تعرف يعني

المهندس منسي : ما هوه إنت لازم تعبيها على السخن

العميل : ما هوه ببتعبى على السخن وبرده، بس لازم تعقيم برده، تعقيم المكنة يومياً وكده يعني

المهندس منسي : آه…

العميل : طب دي سعرها كام يا فندم برده يعني؟

المهندس منسي : ، يعني 45000 جنيه مصري

العميل : صناعة صيني طبعاً

المهندس منسي : لا دي مش صيني، دي ماركة المهندس منسي، مش عملية… إحنا اللي عاملين التصميم وإحنا اللي عاملين الديزاين، وعاملين بعض القطع في الصين وعاملين بعض القطع هنا.. هنا وفي الآخر بنجمعها

العميل : آه…

المهندس منسي : في الآخر إحنا اللي مسئولين

العميل : تمام.. تمام يعني هي الصناعة مصري

المهندس منسي : المفكر والمصمم مصري، ولكن كل القطع يعتبر أغلبها مستورد من بره بعض الأجزاء بس بتتعمل هنا، بعض الأجزاء الخفيفة يعني

العميل : طب هي آخرها كام برده يا فندم…

المهندس منسي : ما هوه إحنا أسعارنا نهائية، إحنا ماركة، إحنا شركة كبيرة مش واحد بيتاجر كده، يعني كلنا ملتزمين بقائمة أسعار ما نقدرش ننزل على بعض

العميل : آه… يعني هي عامله كام برده يا فندم لو الواحد…

المهندس منسي : ، يعني 45000 جنيه مصري

العميل : طب والضمان يا فندم؟

المهندس منسي : الضمان لمدة سنة ضد عيوب الصناعة و5 سنين توفير قطع الغيار لحساب العميل

العميل : آه.. تمام، دلوقتي يا فندم هي بتكون شبيهة لبتاعت الرز وكده

المهندس منسي : آه شبيهة ليها آه …

العميل : طب إيه الفرق بين دي وبين المصنع اللي بعبي….

المهندس منسي : حضرتك هتيجي تتفرج عليها وهيبقى قدامك المكنتين الـ 2 وهتبدأ تتعلم أكتر

العميل : في في المصنع اللي أنا بعبي فيها مكن طويل كده تختلف عن بتاعت الرز

المهندس منسي : آه.. ما هوه أنا ما شفتش المكنة اللي عندك عشان أقدر أقولك إيه الفرق

العميل : لأ…

المهندس منسي : مقدرش أنا أتكلم لا بالخير ولا بالشر، ما هوه أنا لو اتكلمت بالشر يبقى أنا راجل مش كويس، ولو اتكلمت بالخير يبقى أنا راجل منافق

العميل : لا يا فندم مش قصدي حاجة، أنا بس نشوف الأصلح إيه وكده يعني غالباً…

المهندس منسي : بص وحد الله، أنا اللي أعرفه مكنتي، أنا راعيت ضميري قوي في مكنتي، راعيت ضميري قوي قوي قوي قوي، فأنا مش هبيع البيعة وأروح أتحاسب عليها

العميل : أنا جيب مكنة وتعبت فيها

المهندس منسي : وحد الله، أنا النهاردة بقالي كام سنة في السوق، بقالي في حدود 8 سنين بقالي 10 سنين في السوق، الحمد لله وبفضل من ربنا لينا اسمنا اللي إحنا بنفتخر بيه

العميل : ربنا يبارك لحضرتك

المهندس منسي : بنفتخر بإن ده اسمنا، واخد بالك

العميل : ما هوه الاستمرارية في كده يا فندم بقى

المهندس منسي : صدقني ما كنتش بعمل بالدنيا، صدقني أنا بعمل بما يرضي الله، أنا اتعلمت في ألمانيا، فتعلمت إني أعامل ضميري في كل حاجة

العميل : لأ أنا حضرتك سمعتك سابقاك بصراحية يعني

المهندس منسي : الحمد لله

العميل : لأ بس أنا كنت عايز أعرف الفرق بين دي ودي، يعني في مكنة اللي هي إيه تحسها، إحنا بتاعتنا رأسية، لأ التانية تحسها أفقية كده يعني الرول بيدخل ويعبي…

المهندس منسي : لأ اللي عندنا رأسي

العميل : رأسي.. آه، طب إيه الفرق بين دي ودي، أو أنهي الأفضل

المهندس منسي : هوه إحنا موردين مكن كتير، مش أول مرة هنورد، موردين كتير للكاتشب وللصلصة وللـ….، لحاجات كتير قوي

العميل : ربنا يسهل، لا أنا قصدي يكون مثلاً الطاقة الإنتاجية بتاعتها أعلى مثلاً أوكيه مثلاً، أنا بتكلم في الجزئية دي

المهندس منسي : بص هي الطاقة الإنتاجية في كل العالم واحدة، الطاقة الإنتاجية اللي مش بيحددها المكنة

العميل : بيحددها الخامة…

المهندس منسي : اللي يقولك الطاقة الإنتاجية اللي بيحددها المكنة ده يبقى تاجر، مش المصنع

العميل : آه

المهندس منسي : هدفه إنه يتكلم وبس، إنما الطاقة الإنتاجية اللي يحددها الخامة مش المكنة، صلي على النبي قول عليه الصلاة والسلام

العميل : عليه الصلاة والسلام

المهندس منسي : دلوقتي إنت معاك عربية العداد فيها كام، نقول 240 كيلو في الساعة، هل إنت تقدر عمرك تمشي على 240، ولا 150، يبقى اللي بيحددلك سرعة العربية إيه عدد من العوامل، أولاً سلاسة الطريق اللي إنت راكب عليه، درجة حرارة الجو بتتحكم في السرعة، الحمولة اللي إنت شايلها، فهمتني ولا ما فهمتنيش

العميل : اه تمام

المهندس منسي : أيوه معاك

العميل : أيوه يا باش مهندس معلش النت بيفصل

المهندس منسي : ولا يهمك

العميل : بقول لحضرتك على حاجة، أنا جبت مكنة كانت هي تجربة، جيبت مكنة أتوماتيك رز وكده فتعبتني، كنا متفقين على 60 كيس وكده ما كانتش بتعمل 20

المهندس منسي : آه.. شفت إنت اللي رديت على كلامك أهوه، قلت إيه متفق معاه على 60، ينفع بقى إني كنت أتفق معاك دلوقتي أقولك بتعمل كذا آه.. وبتعمل.. ينفع.. ينفع

العميل : لا

المهندس منسي : إنما إنت لما قلتلي سعرتها الإنتاجية قلتلك إيه، بتتحدد بناء على خامة الكيس، المنتج بتاعك بينزل إزاي، درجة حرارة الجو عندك عامله إيه، فهمتني إزاي

العميل : تمام…

المهندس منسي : يبقى هنا ده الفرق بقى المصنع، المهندس اللي بيصنع والفرق بين التاجر

العميل : آه…

المهندس منسي : التاجر وظيفته، يعني إنت مثلاً لما تيجي تقف قدام تاجر، يعني مثلاً لو وقفت قدام تاجر بتاع تفاح، وقلتله بكام التفاح، هيقولك تفاح ياباني مش عارف ألماني وإيراني وحلو، وهيقعد يكالوك دماغك بالكلام، هيخليك تشتري وإنت منسجم قوي

العميل : آه صح

المهندس منسي : تيجي عند الراجل المزارع بتاع التفاح وتقوله التفاح، هيقولك تفاح إيه إيراني

العميل : لا طبعاً

المهندس منسي : هيقولك التفاح أهوه ونازل أهوه وهينزهولك مش هيتكلم كتير، فهي نفس العملية ده الفرق بين التاجر وبين المصنع

العميل : طب تمام.. طب دلوقتي يا فندم بالشاشات والسير ولا من غير ده كله

المهندس منسي : آه.. آه قلت لحضرتك في بداية حديثنا في لوحة تحكم، لوحة التحكم ديت اسمها بي إل تي، يعني لوحة تحكم إلكتروني إنت بتحددها، لوحة تحكم من أبسط ما يمكن، مبسطنهالك على الآخر عشان تعرف تتعامل معاها، وبنراهن على إن.. إنت وذكاءك بقى، بنراهن على إنك تبقى مهندس مكنتك بعد 6 أشهر

العميل : تمام كده، يعني هعرف أشغلها على صلصة وكده، الصلصة بتعدي على درجة حرارة عالية

المهندس منسي : آه… هتعبي صلصلة إيه

العميل : صلصة بتاعتي اسمها زينة

المهندس منسي : زينة، دي مكوناتها إيه؟

العميل : معجون وملح ومياه

المهندس منسي : معجون طماطم ولا معجون إيه؟

العميل : آه معجون طماطم آه

المهندس منسي : آه.. آه.. ماشي

العميل : يعني كاتشب يعني بعبي 50 جرام

المهندس منسي : أصل إنت بتقولي صلصة ومصمم إنها هي صلصة، همه دايماً بيقولوا عليها كاتشب، فإنت قلت صلصة

العميل : لا صلصة أنا بعبي صلصة نفسيها مش كاتشب

المهندس منسي : إنما إنت عايز مكنة تعبيك الصلصة الأتوماتيك ، اللي هي الأتوماتيك، اللي هي بنتكلم عليها من ساعتها

العميل : آه تمام أشغلها مثلاً صلصة كاتشب مثلاً، ممكن أشغلها مثلاً صابون سائل 100 مللي كده يعني

المهندس منسي : آه..

العميل : أنا بتكلم في الجزئية دي يعني تكون حاجات سائلة يعني، بس إحنا اتكلمنا على حاجات زي كده وقلتلي متاح

المهندس منسي : إن شاء الله

العميل : طب العنوان يا فندم و إن شاء الله

المهندس منسي : إحنا عندنا حدائق القبة، مدينة نصر، باب الشعرية أقربلك إيه؟

العميل : أنا أقربلي باب الشعرية أوكيه

المهندس منسي : هبعتهولك في رسالة حالاً

العميل : مافيش مشاكل، إن شاء الله هتفتحوا إمتى يا فندم بعد العيد

المهندس منسي : يوم السبت

العميل : لا تمام كده، يوم السبت إن شاء الله أنا عندكم، طب حضرتك هتكون موجود يا فندم ولا هيكون في حد من الإدارة؟

المهندس منسي : أنا لو موجود ماليش لازمة أنا استشاري الشركة، أنا المستشار الهندسي للشركة، أنا هبعتلك دلوقتي رسالة فيها المبيعات وفيها تليفونات بتاعت الفرع نفسه

العميل : تمام يا فندم

المهندس منسي : كلمهم بقى وتعامل معاهم، إنما أنا وظيفتي أفهمك الوضع بس، أنا استشاري هندسي للشركة مش مبيعات

العميل : آه.. تمام يا فندم، بس نفس الأسعار اللي حضرتك بتقول عليها

المهندس منسي : آه.. آه بقول لحضرتك دي شركة مش واحد سايب مكنة وبيتسبب

العميل : خلاص يا فندم أنا مستني حضرتك تبعتلي رسالة واللي فيه الخير يقدمه ربنا يوم السبت بإذن واحد أحد

المهندس منسي : ماشي يا غالي

العميل : ماشي يا فندم متشكر لحضرتك وكل سنة وإنت طيب يا فندم

المهندس منسي : مع السلامة