مكنه اللحام المستمر موديل 301 ماركة المهندس منسي

العميل : سلام عليكم

المهندس منسي : عليكم السلام ورحمة الله وبركاته

العميل : إزيك يا باش مهندس

المهندس منسي : أهلاً بيك مين معايا؟

العميل : معاك سامح يا فندم مندوب شركة فرعونية تعبئة مواد غذائية، فرعونية يا فندم

المهندس منسي : أهلاً بيك

العميل : أهلاً بيك، كنا عايزين نستفسر عن سعر مكنة اللحام المستمر رقمها 301

المهندس منسي : آه موجودة آه عامله

العميل : كام مصري؟

المهندس منسي : هوه ال النهاردة بنحسبه نقول بـ 12.5 جنيه، إحنا هناخد منك بالمصري، بس إحنا بنسمي بال ليه؟؟ عشان خاطر الجنيه عمال… مش راسينلوا على حل، إنما إحنا هناخد منك بالمصري، يعني أصلاً لو ما خدناش منك بالمصري غلط

العميل : أيوه أنا فاهم، تمام يا فندم، ممكن تعملها كام مصري؟

المهندس منسي : ما أنا قلتلك أهوه ، ال بـ 12.50 جنيه، يعني 200 × 12.5 تبقى 2500 جنيه مصري، خلي بالك دي ماركة.. ماركة، مش رايحين شاريين شوية مكن وجايين نبيعوهم

العميل : ما أنا عارف يا فندم إنتم ليكم اسم عريق يا فندم، عارف يا فندم، إنتم ليكم اسم في السوق حلو

المهندس منسي : الحمد لله بفضل من ربنا

العميل : آه ليكم اسم في السوق حلو قوي يا فندم

المهندس منسي : الحمد لله

العميل : سؤال بس يا فندم، المكنة دي تنفع واحد يعمل فيها سكر صوابع؟

المهندس منسي : ينفع كمشروع كده إيه.. كموضوع برايفت كده صغنون إن إنت تنزل تشوف سوقك وتشوف حركتك وتعتمد، إنما كمكسب مكسبها بسيط جداً يعني، مكسبها هيبقى مشروع صغنون كده يا دوب

العميل : آه مكسب صغير، عايزين نبدأ مشروع صغير

المهندس منسي : إنما هوه الأفضل إنك تاخد مكنة أتوماتيك، والمكنة الأتوماتيك عامله

العميل : ما عارف دي غالية معديه فوق الـ 50 ألف

المهندس منسي : آه…

العميل : ما أنا عارف سعرها

المهندس منسي : إنما إنت لو عايز تجتهد وتعمل حاجة كده صغنونة تنفع طبعاً، تنفع وسريعة جداً، لو إنت عايز في البيت مثلاً بدل ما إنتم قاعدين مثلاً مافيش أي شغل ومافيش أي دخل

العميل : أيوه.. تمام… النهاردة الخامة عند حضرتك، صح يا فندم لو حبيت أعمل مواد خام عندك

المهندس منسي : عندي آه

العميل : تمام أنا عارف العنوان في باب الشعرية

المهندس منسي : ماشي أنا هبعتلك بقى العنوان في رسالة هتابع بقى مع المبيعات

العميل : خلاص مافيش مشاكل، أنا جيت عند حضرتك هناك أنا جيت قبل كده مرة

المهندس منسي : آه.. أنا أقصد يعني أنا استشاري الشركة مش المبيعات يعني استشاري الشركة أنا جست برد عليك وأوجهك التوجيه المضبوط وأضبط الدنيا، يعني عشان خاطر الحمد لله ربنا آتاني من العلم كفاية يعني

العميل : الحمد لله يا فندم، طب أتشرف باسم حضرتك يا فندم؟

المهندس منسي : المهندس منسي

العميل : أهلاً بيك يا باش مهندس، طب أشوف حضرتك في الشركة إن شاء الله

المهندس منسي : أتشرف بيك

العميل : الله يخليك يا باش مهندس، الله يخليك، سلام عليكم يا باش مهندس