ورق فلتر لتعبئة وتغليف الأعشاب والشاي من شركة المهندس منسي
العميل : السلام عليكم
المهندس منسي : عليكم السلام ورحمة الله وبركاته
العميل : لو سمحت كنت عايز أسأل عندكم ورق تعبئة الأعشاب والشاي والحاجات دي؟
المهندس منسي : آه عندنا آه
العميل : طيب ده على كام؟
المهندس منسي : الورق أنهو الفلتر يعني؟
العميل : آه
المهندس منسي : ده بيتحدد بناء على الكمية وبناء على المقاس، وتيجي تختار نوعية لأنهم عدد من الأنواع، فالخامات بالذات ما نقدرش ندي سعرها كده، لازم حضرتك تيجي تشرفنا بالزيارة
العميل : طيب أنا كنت عايز أسأل البكر لما بيتركب مثلاً بيتركب عليها فتلة وأكياس ولا ما بيتركبش
المهندس منسي : بكرة إيه؟؟ لأ البكرة بتبقى لوحدها والفتلة لوحدها، المكنة نفسها هي اللي بتحددلك، إنت عندك المكنة ولسه ما جبتهاش؟
العميل : لأ أصل في مكنة بتاعت تعبئة شاي بتاع الفلتر صغير كده بس ما بتركبش الفتلة قدام
المهندس منسي : آه… وفي مكنة بتركب الفتلة والتاج
العميل : ما هو أنا عارف إن في مكنة بتركب الفتلة والتاج، بس في ورق بييجي ورق الفلتر ده بييجي متركب عليه الفتلة والتاج…
المهندس منسي : لا.. لا.. مافيش استحالة
العميل : لا في أنا شايف فيديو ليها
المهندس منسي : آه الفيديو ده أوانطه
العميل : يعني إيه أوانطة؟
المهندس منسي : مافيش حاجة اسمها إن دول بييجوا متركبين وبعد كده يتقص منهم مفيش
العميل : ده فيديو مش رسوم متحركة
المهندس منسي : لا ما همه عمالين يلعبوا علينا، مطلعين لنا دلوقتي ماتور الماتور ده بيولد كهربا، بسم الله ما شاء الله، عمالين يتوهونا
العميل : يعني إيه بيطلعوا ماتور بيولد كهربا؟
المهندس منسي : لسه إمبارح قاعد هوسوني بلف حوالين نفسي قاعد بعمل في مصنع طاقة شمسية خلينوا وقفته واتجننت وبعدين قعدت أقلب فيه لقيت في بطارية من تحت هي اللي بتطلع الكهربا وفيلم كده عاملينوا علينا، اللي هوه يتوهوا الشعب العربي عشان خاطر ما يتقدمش، يقعد يعملك فيديوهات يتوهك يلففك حوالين نفسك، زي مثلاً آجي أقولك مثلاً تعرفش أبيع المنتج ده فين، تقوم تقولي مثلاً في سيوة، أروح سيوة ألاقي الدنيا فاضية، يبقى ضيعتلك على الأقل أسبوع ولا شهر
العميل : طب إنتم عندكم المكنة بتاعت الشاي والأعشاب دي إزاي؟
المهندس منسي : آه موجودة
العميل : بكام؟
المهندس منسي : حضرتك شرفنا بالزيارة بس واتفرج عليها هي دي المكنة اللي هتلزمك ولا لأ كده يعني
العميل : طيب اديني سعر مبدئي يعني
المهندس منسي : ما هو أنا مش هقدر أديلك سعر مبدئي فيها صدقني
العميل : أصل دي مكنة محددة
المهندس منسي : أصل أنا المشكلة هديلك سعر دلوقتي، إنت بتتكلم على سعر ولا بتتكلم على مكنة وإمكانيات، حضرتك تيجي تشوف إمكانيات ونقولك السعر ده بكذا، وتشوف الإمكانيات دي على أد…. يعني مثلاً دلوقتي لما نيجي نتكلم على تليفون سامسونج، ما في تليفون سامسونج بـ 13000 وفي تليفون سامسونج بألف جنيه، فلسه هقولك تليفون سامسونج بألف تقوم تقولي آه ده أرخص سعر لما أروح أبص على التليفون ده، فهمتني، فحضرتك شرفنا بالزيارة حتى نحس بالجدية بس، فهمتني، نقوم نفرجك على المكنة ونفرجك على الخامة ونجربلك ونعمل معاك الواجب كما ينبغي يعني
العميل : طيب ماشي، طيب إنتم عندكم مكنة لحام لوحدها كده؟
المهندس منسي : آه مكنة لحام إنتاجية بتاعت مصانع، اللي هي لحام سير، مش لحام
العميل : آه لحام سير آه
المهندس منسي : اللي تحط عليها الكيس تروح مطلعاه من الناحية التانية ملحوم جاهز
العميل : بتطبع…
المهندس منسي : بتطبع تاريخ الإنتاج آه
العميل : دي موجودة عندكم على كام؟
المهندس منسي : دي يعني 3600 جنيه
العميل : طب إنتم مكانكم فين بالضبط؟
المهندس منسي : إحنا عندنا عدد من الأماكن ولكن إنت عايز دلوقتي المكان اللي في مكنة تعبئة الشاي، ولا عايز الأماكن كلها؟
العميل : لأ المكان اللي في تعبئة الشاي وفي مكنة اللحام
المهندس منسي : هبعتلك العنوان في رسالة حالاً
العميل : طيب خلاص ماشي
المهندس منسي : سلام
العميل : ماشي مع السلامة
