ماكينة تعبئة اللوليتا النص اوتوماتيك من شركة المهندس منسي

العميل : سلام عليكم

مهندس منسي : عليكم السلام ورحمة الله وبركاته

العميل : شركة المهندس منسي

مهندس منسي : أيوه

العميل : إزي حضرتك يا فندم

مهندس منسي : الحمد لله

العميل : حضرتك مكن لوليتا

مهندس منسي : عايزها في أكياس ولا في عبوات؟

العميل : والله هي فكرة الأكياس اللي عاجباني بس عايز أعرف لأني بادي المشروع جديد اللي أنا فيه

مهندس منسي : آه هوه في نص أتوماتيك وفي أتوماتيك كام

العميل : النص أتوماتيك اللي بتركب في القدرة دي صح؟

مهندس منسي : آه بتحط الكيس وهي بتعبيهولك وبعد ما تعبيه تحطه على مكنة كده المكنة دي بتلحمه وترميه الناحية التانية

العميل : تمام… دي اللي هي اليدوي صح النص أتوماتيك

مهندس منسي : آه نص أتوماتيك آه

العميل : دي عامله كام يا فندم؟

مهندس منسي : مكنة التعبئة بتعمل 350 يعني 3500 جنيه مصري، ومكنة اللحام بتعمل يعني 2000 جنيه مصري

العميل : اللي هي يدوي دي اللي بتعبي في كيس الموزة صح؟

مهندس منسي : بتعبي في كيس الموزة والفراولاية وكله.. كله العبوات الجاهزة

العميل : آه… طيب والأتوماتيك؟

مهندس منسي : الأتوماتيك بتعمل يعني 45000 جنيه مصري

العميل : في إسكندرية حضرتك ولا فين؟

مهندس منسي : إحنا عندنا عدة فروع في القاهرة، وإن شاء الله قريب قوي خدنا عندكم في برج العرب ولسه بنجهز الفرع بتاع إسكندرية

العميل : لأ أنا من المنصورة حضرتك

مهندس منسي : منين في المنصورة؟

العميل : من حته اسمها طناح لو تسمع عنها

مهندس منسي : آه حبايبنا لينا قرايبنا عندكم كتير قوي، طناح بس في المجال ده في مجال الكاتشب

العميل : آه.. آه..

مهندس منسي : موردين لواحد عندكم بيعبي كاتشب

العميل : في طناح

مهندس منسي : آه في طناح آه

العميل : أنا بقى في طناح حضرتك، أنا معروف شغال في وزارة الكهربا

مهندس منسي : أهلاً بيك

العميل : أهلاً بيك يا فندم

مهندس منسي : ده شرف ليك إنك بتسأل على مشروع

العميل : ربنا يبارك فيك

مهندس منسي : ده شرف ليك إنك بتسأل على مشروع جديد

العميل : بقالي سنتين بسأل عليه، أنا طبعاً عشان بخش أشوف المصانع وكده مش عارف المصانع ما بيدونيش المشروع حقيقي مش عارف ليه…

مهندس منسي : ليه.. ليه.. ليه.. يعني ولا يهمك، إنت تيجي هتشوف موجود، الناس الشرفاء اللي همه زي حضرتك مباحث الكهربا يعني إنت كان ممكن تمد إيدك ولا تعمل مشروع ساعة، ده شهادة تقدير ليك شهادة شرف ليك إنك تعمل حاجة زي كده، تيجي من العين دي قبل العين دي، إحنا حاجاتنا كلها كاملة

العميل : ربنا يبارك في حضرتك، اللي هوه أم 45000 تمشي أقساط ولا نظامها إيه عندكم؟

مهندس منسي : الشغل عندنا كله كاش

العميل : آه… تمام، طب نقابل حضرتك إزاي وكده؟

مهندس منسي : إحنا بداية الشغل عندنا من يوم السبت، أجازتنا الجمعة، شغالين من 11-9

العميل : طب حضرتك بقى بتقولي نصيحة نبدأ بإيه ولا نشتغل إزاي؟

مهندس منسي : والله براحتك بحسب الإمكانيات المادية بتاعت حضرتك

العميل : ما هو قلتلك أنا ناس على أدي صراحة يعني

مهندس منسي : خلاص ابدأ بنص أتوماتيك لغاية ما ربنا ييسر

العميل : تتطلع إنتاج أد إيه في اليوم دي حضرتك؟

مهندس منسي : تتطلعها في الساعة من 800-1200

العميل : يعني نبدأ بدي

مهندس منسي : آه وحسب سرعة اللي قاعد عليها النص أتوماتيك، من 800-1200 كيس على حسب سرعة اللي قاعد عليها

العميل : طب مافيش ممكن نشوفها على الصفحة بتاعتك أو على الموقع بتاعك مش عارفين نوصلها عندك

مهندس منسي : ما هو إنت لازم تيجي نشرحها لك، لأن إحنا عندنا حاجات كتيرة قوي، نقلك دي مكنة التعبئة أهي، بعد ما تعبي تروح داخله على المكن التانية أهي

العميل : آه.. آه.. وليها تنك وليها الحاجات بتاعتها دي صح؟

مهندس منسي : لأ إنت بترمي الخرطوم بتاعها في التنك بتاعك

العميل : آه يعني التانكات عندك برده مش كده؟

مهندس منسي : عادي لو عايز نعملك التانك جايز، لو عايز تعمل التانك عندك مافيش مشكلة

العميل : آه يعني ينفع بلاستيك، ينفع ستالستيل كده

مهندس منسي : آه.. آه طبعاً

العميل : طب مساحة أد إيه تكفي المشروع ده حضرتك؟

مهندس منسي : مساحة المطبخ، عادي تقدر تعملها في المطبخ

العميل : 3 × 3 تقصد

مهندس منسي : آه… بسيطة جداً أصل إنت بتعمل مشروع صغير، ده مشروع صغير جداً كمان، إنما لما ربنا ييسر لك وتتوسع، توسع بقى

العميل : أهم حاجة التوزيع صح

مهندس منسي : آه أهم حاجة التسويق والتوزيع آه

العميل : تمام… والأكياس دي بتيجي منين يا فندم، تقدر تدلني على أماكن وكده؟

مهندس منسي : عندنا آه، عندنا برده

العميل : تمام.. يا فندم شكراً لمعاليك، هسجل الرقم ده أنا حضرتك

مهندس منسي : ماشي يا غالي

العميل : ماشي يا فندم شكراً

مهندس منسي : سلام

العميل : مع السلامة