اكياس سناكس من شركة المهندس منسي
العميل: سلام عليكم
المهندس منسي: عليكم السلام ورحمة الله وبركاته
العميل:شركة المهندس منسي
المهندس منسي: أيوه
العميل: حضرتك كنت بسأل على طن الورق اللي هوه ورق السناكس في حدود كام لو سمحت؟
المهندس منسي: في حدود للكيلو
العميل: طب كده… طيب ده كده سعر عالي شويه ولا…
المهندس منسي: دي طباعة روتوجرافيك أعلى أنواع الطباعة في العالم، وأجمل أنواع الطباعة، السماكات بتاعتها بتبقى 1200 × 1200 نقطة في البوصة، وده أعلى شبكة في العالم، زي شبكة بتاعت الشاشات كده، إنما لو إحنا بنتكلم في الفلكسو السعر أقل من كده بكتير، بس في الآخر كده ده السعر النهائي للمنتج، يعني إنت جبت منتجك وعملت منتج زي الفل، وفي الآخر تحطه في كيس زي النيلة
العميل: لا طبعاً.. لا طبعاً…
المهندس منسي: في الآخر لازم تحطه في كيس عالي قوي، عالي قوي قوي، يعني النهاردة أعلى الشركات اللي هي الشركات الاستثمارية، ده أعلى منها، تخيل بقى
العميل: آه…
المهندس منسي: همه بيطبعوا روتوجرافيك، بس بيطبعوا روتوجرافيك اللي هوه 1200، أنا بطبعلك روتوجرافيك 1500 على الـ 1200، فحاجة عالية عالية يعني، إنت لما تيجي تشوف جودة الطباعة إنت هتنبسط منها قوي
العميل: طيب…
المهندس منسي: في الآخر الكيس بيفرق إيه عن فلكسو، بيفرق قرشين 3، لما تيجي تفرق قرشين 3 في مقابل إن الكيس بتاعك نزل إنت واقف فرحان بيه كده
العميل: تمام… تمام…
المهندس منسي: صلي على النبي، أنا اتعاملت مرة مع بنك من أزبل أنواع البنوك
العميل: آه…
المهندس منسي: أزبل أنواع البنوك، أنا اتوهمت فيه، اتوهمت في منظره، أنا ساكن في مصر الجديدة، كل ما أعدي عليه أقول الله… الله…. وفي الآخر دخلت واتورطت لقيت نفسي لاصق في أزبل بنك في العالم…
العميل: يعني قصدك إن التغليف هوه …..
المهندس منسي: هوه البياع، هوه ده الليلة، هوه ده راس الحربة
العميل: الله ينور عليك
المهندس منسي: هوه ده اللي هيجبلك الـ 3 جوان في ليلة واحدة، فهمتني إزاي، هوه ده الهاتريك وهوه ده الهاف باك هوه كل حاجة، هوه ده الجون، هوه ده الهدف
العميل: تمام… تمام…
المهندس منسي: حتى لو حطيت في إيه؟؟ أنا مليش دعوة باللي جوه، أنا ليه دعوة بالحاجة اللي أنا بشتغل فيها المظهر الخارجي، كل ما المظهر الخارجي من بره محترم وشكله قيم قوي واخد بالك، كل ما لاقى احترام وقبول الجمهور ولاقى احترام وقبول واستحسان، فإنت حتى تلاقي نفسك بتعامل ضميرك وبتحط منتج جيد جداً جوه، وينزل قبالك منتج واقع وحالته بالبلى الأزرق وشركة كبيرة وعامله هيلمان من بره، في الآخر هوه اللي هبيع وإنت اللي هتقعد تتحسر
العميل: صحيح…
المهندس منسي: وتزعل، وتقول هوه عشان أنا عاملت ضميري، ما هو إنت عاملت ضميرك آه بس في الآخر المظهر برده، ما هي أسباب عامل ضميرك وحط السبب
العميل: آه طبعاً.. طبعاً..
المهندس منسي: فرق الروتوجرافيك اللي هوه أعلى أنواع الطباعة عن الفلكسو إيه، 3 صاغ في الكيلو قرشين صاغ، قرش، في مقابل الكيس لما تبيعه مثلاً بجنيه بـ 2 تيجي بقى في القرش والقرشين والـ 3 تلاقي نفسك مش مركز فيهم، في الآخر تلاقي منتجك بيتهزم، بيقع، المشروع بيفشل، ترجع تاني تتف على الدولة وتتف على الناس كلها
العميل: أكيد طبعاً
المهندس منسي: ما هي غلطات بسيطة لو إحنا عملنا حسابها صدقني الدنيا هتنجح معانا وهتبقى زي الفل
العميل: طيب حضرتك بتعمل بتساعدنا في التصميم بتاع….
المهندس منسي: لا التصميم يستحسن إن حضرتك إنت اللي تعمله، لأن ده مجالك الشخصي، أنا معرفش مودك إيه
العميل: آه طب في حد عندك ممكن….
المهندس منسي: آه في ناس كتيرة قوي، كل مكاتب دعاية والإعلان، عادي بيعملوا… يعني إنت تروح لأي واحد بيطبع أوفست قوله اعملي ديزاين على 35 × 50 عشان
العميل: تمام… تمام…
المهندس منسي: ما تقيدش نفسك بمقاسات، يعني المهم إن الرسومات بتاعتك ما تزيدش عن 50 سم عرض و 35 سم طول
العميل: ده المقاس ….
المهندس منسي: الحدود بتاعتها
العميل: حاضر تمام.. لا هوه أقل من كده إن شاء الله..طيب هوه أنا هكلم حضرتك تاني إن شاء الله بس هشوف موضوع التصميم وهاجي لحضرتك عشان أشوف العينات ونقعد نتكلم مع بعض
المهندس منسي: إنت تيجي تنورنا في أي وقت
العميل: يا فندم ربنا يخليك وفرصة سعيدة يا باشا ربنا يخليك
المهندس منسي: مع السلامة
العميل: اتفضل يا فندم اتفضل
