خط تعبئة زيت الطعام من شركة المهندس منسي

العميل : سلام عليكم

مهندس منسي : عليكم السلام ورحمة الله وبركاته

العميل : كل سنة وإنت طيب

مهندس منسي : كل سنة وحضرتك طيب

العميل : شركة المهندس منسي

مهندس منسي : أيوه

العميل : كنت عايز مكانكم فين لو سمحت؟

مهندس منسي : إحنا عندنا حدائق القبة، مدينة نصر، باب الشعرية، 6 أكتوبر

العميل : طب أنا عايز حاجة قريبة من الجيزة بالنسبة لي

مهندس منسي : باب الشعرية

العميل : فين في باب الشعرية؟

مهندس منسي : هبعتلك العنوان حالاً

العميل : طيب كنت عايز أستفسر عندكم خطوط تعبئة زيت الطعام

مهندس منسي : آه إن شاء الله

العميل : أتوماتيك ولا نص أتوماتيك بالضبط اللي موجودة حالياً

مهندس منسي : الـ 2

العميل : دي صناعة إيه محلية ولا مستوردة؟

مهندس منسي : إحنا ماركة.. براند

العميل : يعني حاجة مستوردة مش كده؟

مهندس منسي : لأ إحنا زي توشيبا وزي إل جي وزي الماركات دي، يعني النهاردة همه بيصنعوا قطع الغيار بره، إحنا بنصنع قطع زيهم بالضبط، بيجمعوها في مصر، إحنا بنجمع الحاجة دي في مصر، واخدين مسجلين في مصر وفي العالم إن إحنا ماركة عالمية

العميل : اللي هي إيه بقى اسمها إيه الماركة؟

مهندس منسي : ماركة المهندس منسي

العميل : آه.. آه… يعني المهندس دي البراند بتاعكم يعني؟

مهندس منسي : آه اسمها المهندس منسي، زي مثلاً….

العميل : المهندس إيه؟

مهندس منسي : منسي… زي ما تيجي في النظارات تلاقي ماركة ريبان، ريبان ده اسم شخص، مش اسم علم يعني

العميل : تمام.. تمام.. تمام.. يعني إنت بتجيب قطع الغيار وإنتم بتجمعوا هنا زي مثلاً الشركات دي؟

مهندس منسي : آه… بنصمم الأول قطع الغيار وبعدين بنصممها على الكمبيوتر على برامج هندسية أوتوكات وباورشيف، وبعد ما نصمم نعملها حاجة اسمها سيموليشن يعني نحركها كأنها مكنة قدامنا دلوقتي، كأنها شغالة دلوقتي، لأنه لو في مشكلة ولا حاجة نبدأ نتلاشاها، بحيث إن نحط أفضل ما عندنا، يعني أفضل حاجة موجودة، بعد ما ننعمل التصميمات ديت نبدأ نفكها تاني على الكمبيوتر ونبدأ نبعتها بره….

العميل : زي الماكيت مثلاً عندنا

مهندس منسي : أيوه… نبدأ نبعت الحاجات دي لييارات يعني طبقات بره، تتصنع على المكن هناك الناس عندها تكنولوجيا عالية قوي هناك، فبنصعنها هناك على مكن ثري دايمنشن ومكن ليزر ومكن بلازمه وحاجات من دي

العميل : بتصنعوها في أي دولة بالتحديد؟

مهندس منسي : وات إيفر بقى أياً كانت الدولة، دي مش مشكلة أي حد لأن إحنا الجودة بتاعتنا هي اللي بيتحدد، بعد كده نبدأ نجيب الحاجة دي ونبدأ نجمعها

العميل : تمام… تمام…

مهندس منسي : في الآخر إنت بتتكلم في ماركة مش بتتكلم في تاجر

العميل : آه… آه…

مهندس منسي : التاجر ده يعني راح أي بلد راح جاب حتتين وجيه يتسبب فيهم، يعمل فيهم سبوبة فقاعد يحكي حكاوي عليهم، إنما إحنا ماركة، براند، صناعة

العميل : وبالتالي قطع الغيار عندكم والصيانة وكله

مهندس منسي : ما هو إحنا اللي مصنعنها

العميل : بالضبط

مهندس منسي : إحنا عندنا مخازن لقطع الغيار، عندنا ستوك يكفينا 20 سنة قدام

العميل : اسم سيادتك إيه؟

مهندس منسي : المهندس منسي معاك

العميل : بكلم سيادتك شخصياً يعني

مهندس منسي : آه

العميل : أنا معايا يعني إحنا بنفكر بنعمل…. معلش أنا هعطلك إنتم النهاردة أجازة ولا إيه؟

مهندس منسي : لا شغالين

العميل : يعني ممكن آجي لسيادتك النهاردة؟

مهندس منسي : أنا هبعتلك بقى تليفون المبيعات تتابع معاهم

العميل : يسعدني إن أنا أتقابل مع سيادتك برده

مهندس منسي : الله يخليك صدقني والله الوقت مش سامح

العميل : طيب… طيب… نتكلم مع المبيعات

مهندس منسي : آه

العميل : طب معلش أنا هعطل سيادتك دقيقتين

مهندس منسي : خد راحتك

العميل : الله يخليك ما أتحرمش منك، إحنا بنفكر نعمل مصنع في الأقصر، لا أخفي عليك إحنا كتصنيع ماعندناش خبرة، فإنت تنصحنا نبدأ إزاي كمصنع في مجال الزيوت، لأن أنا بدرس في نقطة يعني قبل ما تكلمني هل أنا لو بدأت إنت عندك مثلاً ممكن بخبرتك في ناس ممكن يدونا الخامة بتاعت الزيت اللي إحنا نعبيها ونسوقها جاهزة؟

مهندس منسي : أنا ناجح في مجال الصناعة، أما في مجال التوريد ده أنا معرفش عنه حاجة، ما أعرفش أي حاجة عن الناس اللي هيوردولك الزيوت، أما تسألني عبوة الزيت أقولك آه أقدر أصنعهالك، الليبول أقدر أصنعولك، كل حاجة في عالم الصناعة، يعني أتقنت مهنتي ما شتتش نفسي

العميل : برافو عليك.. تمام… تمام، أنا بتكلم كناحية كمعلومة بدون أي….

مهندس منسي : إحنا موردين لزيوت كتير قوي، ياااااااااه

العميل : آه.. أنا بتكلم على أساس إنك بتشتغل في المجال وبتحتك يعني بالمصانع، بس هي دي النقطة مش أكتر من كده إنك تكملي معلومة مشكوراً مش بدون أي التزام عليك ولا أي حاجة يعني

مهندس منسي : لا عادي مافيهاش مشكلة، شركات توريد الزيوت والمستوردين بتوع الزيوت النهاردة أكتر من الهم على القلب، كتير جداً

العميل : يعني إنت برده ممكن تساعدنا في الموضوع ده، تقولي مثلاً ممكن تقولي روح لفلان كده يعني

مهندس منسي : صدقني ما بحتفظش بتليفون أي واحد فيهم

العميل : حتى لو أسماء مش مشكلة

مهندس منسي : ما هو أعرفهم هعملهم إيه؟؟ هوه بييجي عميل بياخد الحاجة سلام عليكم سلام ورحمة الله وبركاته، لا أنا شغال في مجالات كتيرة، شغال في المواد الغذائية، شغال في الزيوت، شغال في مستحضرات التجميل، شغال في العطور، شغال في الأدوية، شغال في حاجات كتيرة، فمش مجال هقعد أحفظ أساميهم

العميل : خلاص.. خلاص ماشي مافيش مشكلة، يعني شغال في الحاجات ديت يعني بتعبيها يعني بتاعتك إنت

مهندس منسي : لأ ما بعبيهاش، أنا بورد للناس

العميل : المكن ده

مهندس منسي : أنا يادوب يا رب يا مسهل نقدر نلحق نتقن ونجود شغلنا عشان نقدر نوصل للناس ديت نقدملهم حاجة نظيفة

العميل : تمام.. تمام… ربنا يديك الصحة، وأنا مش عايز أعطلك أكتر من كده، لو أنا عايز أتواصل مع حد بحيث نيجي نشوف مثلاً التجهيزات، التكلفة أد إيه، طبعاً إنت في عندك ناس بتركب وتضبط الحاجة على الشغل يعني

مهندس منسي : آه وتعملك شرايط فيديو وتعملك كل حاجة، بنحاول بقدر الإمكان نديك حاجة تقدر تشتغل بيها

العميل : تمام.. تمام….

مهندس منسي : بنحاول كمان بقدر الإمكان كشركة محترمة خدمة ما بعد البيع

العميل : تمام.. تمام.. إنتم بتعملوا زي مثلاً توشيبا يعني ده حيز ممتاز في خدمة ما بعد البيع كويس جداً الراجل ده بصراحة، أنا اتعاملت معاه في حاجات يعني على فكرة أنا أساساً عندي شركة استيراد وتصدير يعني، يعني أنا بصدر حاجات حاجة كده آت ذا جنيرال يعني مش حاجة محددة، فممكن لما نقعد مع سيادتك برده أكيد طبعاً صدرت يعني؟

مهندس منسي : أكيد آه صدرنا كتير قوي

العميل : طيب الحمد لله

مهندس منسي : بنصدر من هنا، وبنصدر من هونج كونج

العميل : تمام.. تمام… آه مباشرة على طول المعدات يعني

مهندس منسي : آه…

العميل : طيب ماشي يا باش مهندس أنا متشكر جداً، ولو عايز أتواصل مع حد ممكن أنزل باب الشعرية، هي الماكينات موجودة في معرض باب الشعرية ولا موجودة فين؟

مهندس منسي : موجود بعض المكن هناك آه

العميل : يعني خط زي بتاع تعبئة الزيوت ده ممكن يكون موجود في باب الشعرية؟

مهندس منسي : ممكن آه، هبعتلك أنا دلوقتي تليفون المبيعات كلمهم وإن شاء الله خير ما تقلقش

العميل : ما أتحرمش منك ومتشكر قوي على سعة صدرك معايا يعني

مهندس منسي : ولا يهمك يا غالي

العميل : شكراً يا باش مهندس، وكل سنة وإنت طيب

مهندس منسي : وإنت بالصحة والسلامة

العميل : شكراً اتفضل مع السلامة