خط تعبئة وتغليف الزيت من شركة المهندس منسي

العميل : سلام عليكم

مهندس منسي : عليكم السلام ورحمة الله وبركاته

العميل : باش مهندس منسي كيف حالك

مهندس منسي : الحمد لله

العميل : أخوك طارق الغانم من السعودية

مهندس منسي : أهلاً بيك

العميل : كيف حالك، أبغى ابعت لك من زمان

مهندس منسي : ولا يهمك يا غالي اتفضل

العميل : الله يبارك فيك، أنا بجلب في النت عندي موضوع من الزيت أستورده من الخارج وأبغى أعمله إعادة تعبئة بالسعودية، فبجلب في الحقيقة أول إعلان لقيته إعلانك ، عاوز أستفسر عن الماكينة هادي إذا كان صحيح الرقم ولا…

مهندس منسي : هوه حضرتك هتعبي في جراكن ولا هتعبي في عبوات؟

العميل : لأ هوه هجيلي خام وأنا هعبي في أزايز

مهندس منسي : آه.. العبوات دي كام لتر؟

العميل : العبوات اللي هتيجي متعبية فيها ولا اللي هتتعبه فيها؟

مهندس منسي : اللي هتتعبه فيها

العميل : والله يفضل إن تكون 500 جرام مثلاً الأفضل

مهندس منسي : نص لتر يعني

العميل : نص لتر ربع لتر،  علي ما أعتقد يعني

مهندس منسي : آه… الإنتاجية بتاعت حضرتك المطلوبة أد إيه؟

العميل : لأن هاده.. هاده يا أستاذ هاده الشي نفس الزيت عايز أجيب زيت سمسم، موجود في السوق الأزايز 200 و250، أنا هاخد وكالة من أحد الدول العربية عن الزيت هادا، وباش مهندس لقيت إن همه عندهم عبوات بلاستيك، ومكنة برشمة، إذا فتحت الكرتون تلاقيه هادا مش مبرشم، مسكر كده يعني من غير برشمة، من غير برشمة جيت هنا برده هترشح

مهندس منسي : آه نتكلم واحدة واحدة، إحنا عندنا مكنة التعبئة وعندنا مكنة البرشمة

العميل : يعني هي هتكون ماكنتين يعني؟

مهندس منسي : آه لو عايزها متبرشمة يبقوا مكنتين، عايز مكنة تعبية بس يعني تعبي بس خلاص مافيش مشكلة

العميل : لا لازم تتبرشم

مهندس منسي : آه… بص يا سيدي نتكلم نقطة نقطة، هي الإنتاجية بتاعتك المطلوبة كام عبوة في اليوم؟

العميل : والله يا باش مهندس أنا لسه بادي ما…. يعني ما أتوقع كام يعني….

مهندس منسي : يعني نقول مثلاً نتكلم أصغر مكنة خالص وأبسط مكنة نص أتوماتيك بتعمل 15000 عبوة في اليوم

العميل : ممتازة

مهندس منسي : آه دي عامله ، دي مكنة نص أتوماتيك هتعبيلك 1500 في الساعة يعني في الـ 10 ساعات 15000 عبوة

العميل : إزاي نص أتوماتيك؟

مهندس منسي : نص أتوماتيك يعني إنت بتحطلها العبوة واخد باك حضرتك، هي بتروح معبياها

العميل : وهادي طريقتها تعبي واحدة وتوقف؟

مهندس منسي : آه ما هي بتعاير على واحدة بس، عايز تخليها… مثلاً إنت حطيت العبوة راحت معبياها، وإنت تروح شايل العبوة وحطيت العبوة التانية، واخد بال حضرتك، راحت معبية التانية، وراحت معبية التالتة… وهكذا

العميل :  تفضل كل عبوة إنت تشيلها وتحطها

مهندس منسي : أيوه

العميل : لازم يدوي كله العامل يشيلها يدوي

مهندس منسي : لا مش يدوي، التنقيل يدوي، إنما المكنة نص أتوماتيك، ما هوه أنا مش عايز أدخلك في أتوماتيك عشان الأتوماتيك عامله 7000 ، وإنت مش محتاج الأتوماتيك في حاجة دلوقتي

العميل : ممتاز…

مهندس منسي : آه.. أنا مش حابب إني أكسب منك أكبر قدر ممكن، أنا حابب إني أنا أخدمك وأساعدك بالمكنة اللي هتفيدك فعلاً….

العميل : لا إنت هتساعدني يا باش مهندس لأني هستمر معاك….

مهندس منسي : أنا تحت أمرك

العميل : اللي بيسألنا في المجال هادا ممكن ندلهم عليك، هي صناعة مصرية يا باش مهندس؟

مهندس منسي : بص هوه المصمم والديزاينر مصري، أما تصنيع قطع الغيار بنعمل قطع الغيار مثلاً في تايوان، بنعمل قطع الغيار في الصين، بنعمل قطع الغيار في هونج كونج، ولكن تحت إشرافنا إحنا، يعني إحنا مثلاً ما بنروحش نشتري مكن ونيجي نبيعه، إحنا ماركة براند

العميل : آه…. آه…

مهندس منسي : يعني مثلاً شوفت التليفون السامسونج أو التليفون الآي فون أو اللابتوبات أو الكمبيوترات، هتلاقي إيه، هتلاقي كلها القطع كلها جايه من الصين على تايوان على الحتت ديت ولكن…

العميل : مافي إشكالية يا باش مهندس، مافي إشكال….

مهندس منسي : آه يعني هيه براند

العميل : طيب قطع الغيار عن طريقكم، والصيانة

مهندس منسي : آه الصيانة وخدمة بعد البيع، إحنا عندنا الضمان لمدة سنة ضد عيوب الصناعة….

العميل : إنتوا عندكم في السعودية؟

مهندس منسي : بص يا سيدي وحد الله قول لا إله إلا الله

العميل : لا إله إلا الله

مهندس منسي : المكن بتاعنا دلوقتي بالنسبة لنا عبارة عن يونتس، يعني قطع، والقطع ديت عندنا، فلو حصل لا قدر الله حاجة ودي ما حصلتش لغاية دلوقتي، إحنا مصدرين للسعودية كتير، لو حصل لقدر الله حاجة حضرتك بتصلت كاميرا على المكنة وبنقول آه العيب في الحتة الفلانية ونبعتلك الوحدة وبنقولك إزاي تفكها وإزاي تركبها

العميل : آه إن شاء الله الموضوع سهل يعني

مهندس منسي : جداً سهل جداً

العميل : ممتاز.. ممتاز، طيب باش مهندس بس عشان أنا أفهم القصة وكده، الآن أنا هعمل الـ 1500، هل الـ 1500 هادي متطلبة من العامل إنه يشيل الـ 1500 قارورة ويحطها بنفسه؟

مهندس منسي : آه…

العميل : خلاص معناته لازم معاها عامل يحط القارورة ويشيلها

مهندس منسي : دي نص أتوماتيك، إنما لو أتوماتيك هوه هيحط الـ 1500 وهي تاخدهم تقعد تعبيهم، ولكن أنا مش شايف الأتوماتيك ليها فايدة مع حضرتك غير إن أنا هستفيد إن أنا هبيعلك مكنة بسعر أغلى، إنما أنا بتكلم بما يرضي الله

العميل : ممتاز.. ممتاز…

مهندس منسي : يعني إحنا بالنسبة لنا كمهندسين بنعمل إيه؟؟؟ بندور على الفايدة وبعدين هامش الربح، مش بندور على الربح… فهمتني

العميل : ممتاز.. ممتاز… طيب يا باش مهندس هادي القوارير لما بتتعمل كده، بعدين كيف تتبرشم؟

مهندس منسي : بص يا سيدي، أول حاجة بعد ما عبينيها بتقفل الغطا، بعد كده في مكنة اسمها مكنة لحام طبات اللي هي البرشمة الداخلية، البرشمة الداخلية إزاي؟؟ يعني حضرتك دلوقتي لما تيجي تفتح عبوة تلاقي حتت ألومونيا كده قافله البق بتاعها مضبوط

العميل : آه….

مهندس منسي : شفت إنت حاجة زي كده

العميل : اللي هوه زي المياه الصحة تقصد؟؟

مهندس منسي : أنا معرفش في السعودية نظام المياه إيه، أنا لما اشتريت مياه اشتريتها وشلت البرشامة الخارجية، إنما ما شوفتش البرشامة الداخلية عليها

العميل : آه البرشامة الداخلية….

مهندس منسي : في أنواع من البرشمة، في برشمة داخلية وفي برشمة خارجية، برشمة داخلية ديت عشان خاطر تضمن إن العميل هوه أول واحد يفتح الإزازة دي، رقم واحد، رقم 2 إنها مش هتسربلك أي هوا جوه معناها الزيت اللي جوه مش هيزرنخ

العميل : آه فهمت كده مثل أزايز العصاير

مهندس منسي : أيوه… في أزايز العصاير…

العميل : تفك الغطا تلقى الألومنيوم تقوم تسحبه كده

مهندس منسي : أيوه… دول همه بيعملوها ليه؟؟؟ همه بيعملوها عشان خاطر ما ممكن يبرشمها من الخارج عشان يضمن إن العميل هوه أول واحد يفتحها، ولكن هوه بيعمل الداخلية ديت عشان خاطر تسريب الغاز، الأكسجين الأسيد، يعني إيه؟ يعني الأكسجين بيتسرب من الغطا بيخش جوا، فإحنا لما بنيجي نحط طبقة الألومنيا ديت أول حاجة العميل بيضمن إن هوه أول واحد يفتحها، تاني حاجة إن هي بتقفل أي مصدر تسريب للهوا يخش جوا المنتج

العميل : ممتاز.. ممتاز…

مهندس منسي : يحافظلك على المنتج كأنه المنتج طازج أول واحد هيستخدمه هوه العميل اللي حابب تقدمله الزيت دوت

العميل : ممتاز.. ممتاز، نقطة يا باش مهندس

مهندس منسي : نعم

العميل : الحته هادي بتاعت الأتوماتيك والنص أتوماتيك، هادي لما تيجي تسويق المنتج، ما يقولك الأفضل إن يكون أتوماتيك بحيث إنه الأتوماتيك يكون سهل و كده؟

مهندس منسي : بص يا سيدي عملية التعبية لا تؤثر في شكل العبوة الخارجي نفسها

العميل : آه…

مهندس منسي : يعني دولقتي حضرتك عبيت المنتج نص أتوماتيك، يعني حطيتلها الإزازة بإيدك وشلتها بإيدك، إنت ما شلتش الزيت بإيدك وعبيته، إنت شلته بالمكنة وحطيته، فهنا ما فيش تأثير على العبوة ولا على شكل العبوة الخارجي…

العميل : مو قصدي على الشكل…

مهندس منسي : إنما تعبي أتوماتيك ولا تعبي نص أتوماتيك ولا له أي تأثير

العميل : لا أنا مو قصدي على الشكل يا باش مهندس، قصدي إن العامل نفسه ممكن ما يغطي العبوة

مهندس منسي : ما يغطيهاش إزاي؟؟؟

العميل : يعني يهمل ممكن يشيل ما يغطي كل واحدة على طول، يعني أنا متخيل دي على طول يحط الغطا لازم

مهندس منسي : آه ما هوه المفروض إن هوه بعد ما عباها راح مديها للجنبه اللي جنبه غطاها، ده دوره، دوره إن يغطي، فأهمل في دوره تشيله خالص

العميل : ممتاز.. ممتاز…

مهندس منسي : طالما إن هوه أهمل في نقطته يبقى هتقعده ليه؟؟ فرحان بيه

العميل : ممتاز.. ممتاز… طب بالنسبة للبرشمة إيش اللي عندك إنت؟

مهندس منسي : مكنة اسمها مكنة لحام طبات إندكشن سيل اللي هي بتلحم القصديره على بق العبوة، دي برشمة اسمها برشمة إيه برشمة داخلية، في برشمة تانية كمان اسمها برشمة خارجية

العميل : ممتاز.. ممتاز…

مهندس منسي : يعني إنت عايز تقدم مرحلتين 2 عشان تقول للعميل إن أنا بحافظ على منتجي مرتين 2 مرة خارجية ومرة داخلية

العميل : يا سلام.. يا سلام…

مهندس منسي : البرشمة الخارجية ديت اسمها مكنة تغليف شرينك حراري، ديت اللي هي بتغلفك خارجياً، لما تيجي حضرتك تجيب عبوة مياه كده مش بتلاقيه في حتة بلاستيك كده في الغطا

العميل : أيوه.. أيوه… هادي

مهندس منسي : دي اسمها بقى برشمة خارجية

العميل : ممتاز.. ممتاز… طب هادي يا باش مهندس أول شي كام سعرها؟

مهندس منسي : مكنة البرشمة الداخلية سعرها ، ومكنة البرشمة الخارجية سعرها 350

العميل : طيب والمادة اللي تنحط معاها إيش؟

مهندس منسي : اللي هي البرشمة الداخلية بتاعت القصدير

العميل : أيوه

مهندس منسي : آه دي عندنا برده، عندنا الطبات، هتبعتلنا العبوة هنطلعلك مقاسها وهنطلعلك النوع اللي يصلح معاها

العميل : ممتاز.. ممتاز… إنت.. إنت.. يعني أنا لازم أبعتلك العبوة عشان تبعتلي العبوة صح؟

مهندس منسي : آه وبعدين بعد كده حضرتك بقى ما تغيرش العبوة

العميل : طب، أكيد…

مهندس منسي : لنفترض إن حضرتك أخدت مني المكن وقلت الخامات أنا هجيبها من هنا في السعودية، هقولك لأ ده إنت واخد المكن من عندي ما ينفعش، لا عادي اشتري من أي حتة براحتك

العميل : ممتاز.. ممتاز… يا باش مهندس

مهندس منسي : الله يبارلك

العميل : طيب الله يعطيك العافية يا باش مهندس الأحجام البرمجة هادي الزيت ما في إشكالية أنا عندي البساطه

مهندس منسي : أبسط مما تتخيل، يعني دائماً وأبداً اتعودنا كلمة ماركة المهندس منسي ديت اتعودنا على بساطة التشغيل، حاولنا بقدر الإمكان نبسط العملية في التشغيل، لأنه إحنا في العالم العربي عارفين إن الناس الثقافة الصناعية بتاعتهم ضعيفة جداً جداً جداً

العميل : بارك الله فيك.. بارك الله فيك، أشوف تليفون المكتب في إسكندرية ولا…

لا هوه المكتب حالياً في القاهرة، إحنا عدد من الفروع في القاهرة والجيزة والقليوبية، إنما فرع إسكندرية لسه يا دوب هننشأه

العميل : إنت في القاهرة عندك

مهندس منسي : آه في القاهرة آه

العميل : طيب يا باش مهندس، عموماً هي فرصة طيبة…

مهندس منسي : إنت عارف حضرتك لو تقدر تقطع من وقتك يوم مثلاً أو يومين وتيجي تزورنا في مصر صدقني هترجع بفوائد، النبي عليه الصلاة والسلام قال إيه، إن في السفر 7 فوائد

العميل : آه عليه الصلاة والسلام…

مهندس منسي : واخد بالك

العميل : لا أصل مصر هادي يومين ما يكفي، أكيد الواحد لازم ياخدله أسبوع..

مهندس منسي : نفترض يعني على أساس جاي رحلة بزنس، ما أوقات بسافر أمريكا يومين 2 وهوه السفر 4 أيام، يومين رايح ويومين جاي وأنا بروح يومين 2 وآجي

العميل :  صح

مهندس منسي :  أصل زيارات البزنس غير زيارات السياحة

العميل : صح.. صح..

مهندس منسي : زيارات السياحة الواحد يقعد يوم ينام وبعد كده يقوم ويقعدله مثلاً 15 يوم في إسكندرية، إنما زيارات البزنس تبقى رايح صد رد

العميل : لا صادق أنا ليه فترة والله يا باش مهندس خدنا شقة في المعادي وعلى المحارة بس لسه موضوع التشطيب، وما نجدر نغيب عن مصر سنة، يعني إذا غبنا عن مصر، فأنا بيني وبينك بالصدفة بجلب في الموضوع هادا فلجيت رقمك ففرصة طيبة إن شاء الله، الباش مهندس منسي أظن؟

مهندس منسي : آه المهندس منسي آه

العميل : ماشي حبيبي يا باش مهندس الله يحفظك، أخوك طارق الغانم من جدة

مهندس منسي : أهلاً بيك.. أهلاً بيك

العميل : حبيبي خلاص إن شاء الله نتواصل حبيبي

مهندس منسي : إن شاء الله

العميل : يعطيك العافية، شكراً يا باش مهندس، في أمان الله

مهندس منسي : مع السلامة