عبوات مستطيلة شفافة من شركة المهندس منسي

العميل: سلام عليكم

المهندس منسي: عليكم السلام ورحمة الله وبركاته

العميل: شركة المهندس منسي

المهندس منسي: أيوه

العميل: من فضلك أنا بسأل على عبوات مستطيلة شفافة، يا ترى موجودة عندك

المهندس منسي: هوه إنت عايز كمية أد إيه

العميل: أنا عايز كمية كبيرة

المهندس منسي: يعني…

العميل: كمية كبيرة يعني من 10 آلاف وطالع، مش تحت الـ 10 آلاف

المهندس منسي: هوه إحنا ما عندناش بضاعة، يعني مثلاً معندناش عبوات بتبقى موجودة لأمة لا إله إلا الله، عشان نحافظ على خصوصية العميل فبنعمل إيه، بنصنع العبوات بناء على طلب العميل، وبناء على الشكل المقدم منه

العميل: آه..

المهندس منسي: يعني حضرتك بتجيبلنا الاسطمبة، بتجيبلنا الشكل وإحنا بنصنعك الاسطمبة وبناء عليها بنصنع

العميل: يعني أنا أجيب العبوة اللي أنا عايزها وحضرتك بتعملها اسطمبة…

المهندس منسي: عبوة أو رسمة

العميل: عبوة أو رسمة بالمواصفات اللي أنا عايزها كلها

المهندس منسي: عبوة أو رسمة أو صورة وات إيفر

العميل: تمام… وحضرتك تعملهالي، تحسبهالي الكمية اللي أنا عايزها، وشفافة، أنا محتاجها أهم حاجة عندي تكون شفافة الإمكانية دي موجودة؟

المهندس منسي: آه موجودة آه …  تتعمل شفافة مفيش مشكلة

العميل: طب و إحنا بنتكلم..  ابعت الصور واتس آب أبعت لحضرتك شكل العبوة اللي أنا محتاجها ونقول تكلفتها كام أو هتكلفنا كام أو كده؟

المهندس منسي: ما هوه التكلفة ديت إنت تقدر تحسبها بنفسك، إحنا بنبيع الجرام فاضي بـ 3.5 صاغ، هتمسك بقى أي عبوة وتوزنها وتعرف وزنها وهي فاضية كام وتضربها في 3.5 صاغ

العميل: آه.. هوه إحنا العبوة مضروبة × 3.5 صاغ فقط لا غير بس كده

المهندس منسي: هتشوف عبوتك كام وهتشوف كل حاجة

العميل: طب حضرتك بتسلمني العبوة في إمكانية عند حضرتك تلزقلي عليها استيكر أو حاجة زي كده، ولا إنت بس بتطلعها…

المهندس منسي: بنديلك مكنة بتلصق الاستيكر، بتلصقلك 2000 استيكر في الساعة

العميل: والله

المهندس منسي: آه…

العميل: والمكنة دي سعرها يبقى إيه…

المهندس منسي: نشوف بس العبوة بعد ما تلخص هيبقى وضعيتها إيه، ونبدأ نقولك المكنة دي اللي هتنفذ

العميل: آه.. اللي هتنفذها، تمام.. طيب خلاص أنا هسجل.. اسم حضرتك إيه يا فندم؟

المهندس منسي: المهندس منسي

العميل: مهندس منسي شخصياً، تمام يا فندم، أنا سجلت تليفون حضرتك وهتواصل معاك على التليفون، وأبعت لحضرتك صورة العبوة والله المستعان بإذن الله، التنفيذ ياخد من حضرتك وقت أد إيه يا فندم؟

المهندس منسي: حوالي.. يعني على طول ما تقلقش يعني، إحنا نشوف بس شكل العبوة وإن شاء الله متقلقش يعني، يبقى بسرعة  … شكل العبوة… بالنسبة للتخانة بتاعت العبوة أو السماكة نقدر نتحكم فيها، هي دي الميزة بتاعتك إنك إنت دي اسطمبتك…

العميل: آه.. آه.. صح

المهندس منسي: بتقدر تقولي إيه العبوة أنا عايزها خفيفة، إنما لو مش اسطمبتك لو رايح تشتري جاهز تقدر تقوله خفيفة، هيقولك هوه ده اللي موجود

العميل: مضبوط صح

المهندس منسي: استنى لما آجي أصنع أبقى أصنعلك معايا..

العميل: صحيح..

المهندس منسي: إنما هنا بقى دي اسطمبتك بتتحكم فيها كيفما تشاء، عايزها خفيفة، عايزها وسط، عايزها تقيلة، عايز أحفر اسمي عليها، أنا عايز أعمل الشكل اللي مش عارف إيه… براحتك

العميل: ونرسم عليها، ما شاء الله، يعني كل الإمكانيات متاحة

المهندس منسي: آه براحتك اسمطبتك براحتك

المهندس منسي: هوه بقولك إحنا بنعمل على خصوصية العميل … كل عميل يبقى له حاجة مميزة ليه محدش يقدر يعتدي عليها … مش عارف إزاي أبيع عبوات لده وأبيع عبوات للتاني نفس العبوة دي بتاعت ده، مش عارف صعب عليا أعملها

العميل: ماشي.. تمام.. خلاص وهوه كذلك، ماشي يا فندم متشكر جداً لحضرتك، أنا هتواصل معاك عن قريب إن شاء الله، متشكر جداً يا فندم، مع السلامة