عينات مسامير للانشاءات المعدنية من شركة المهندس منسي

العميل : سلام عليكم

المهندس منسي : عليكم السلام ورحمة الله وبركاته

العميل : باش مهندس منسي

المهندس منسي : أهلاً بيك

العميل : طارق اللي كلمت حضرتك من يومين يا ريس عشان إن شاء الله نجيب حاجات من الصين، عشان حضرتك تجيبها لنا، اللي مع د/ يحيى السرجاني

المهندس منسي : آه اتفضل

العميل : معلش لو أزعجتك الصبح بس معلش أنا الوقت

المهندس منسي : ولا يهمك يا غالي

العميل : همه دلوقتي الشركة كانت طالبه مسامير

المهندس منسي : شركة إيه؟

العميل : هي اسمها الشركة الإسماعيلية للإنشاءات المعدنية، شغاله تبع أوراسكوم والمقاولين العرب وعندها شغل كبير يعني، حبوا إن همه يجيبوا المسمار لحسابهم عن طريق حضرتك، أنا قلتلهم الباش مهندس منسي هوه اللي هيخلصل لهم الكلام ده والجماعة ما مانعوش يعني

المهندس منسي : إن شاء الله

العميل : كنا بس همه دلوقتي مدييني كميات مبدئية عايزين يعرفوا تكلفتها عشان يحسبوا بالنسبة للداتا اللي هنا عشان يعرفوا هيجيبوها ولا يجيبوا أكتر ولا يجيبوا أقل ولا.. ولا…

المهندس منسي : هما مش مراسلين

العميل : لأ هما عايزين يجيبوا يا ريس لأن هي هنا في السوق قليلة شويه

المهندس منسي : آه…

العميل : يعني في اليومين اللي إحنا فيهم دولت كل اللي عنده مسمار متبت عليه شويه، خايف من الأسعار اللي بتتغير كل شويه، معايا يا ريس، فهمه أدولي الكميات دلوقتي فالتعامل مثلاً هيبقى من خلالنا هتصل بحضرتك وأديهم وأبلغك وأروح جايب بقى مدير الشركة ومدير المشتريات بتاعهم وآجي لحضرتك المكتب

المهندس منسي : آه…

العميل : خلاص في إمكانية أقول لحضرتك الأنواع وكمياتها؟

المهندس منسي : دلوقتي حضرتك إحنا عايزين على الأقل مسمار لايف إحنا نبعته وهمه يجبولنا أسعاره هناك وبعد كده يردوا علينا، بس هوه يستحسن…

العميل : مافيش مشكلة هوه كده كده هوه المنتج اللي موجود في مصر بييجي من الصين

المهندس منسي : يستحسن لو همه جابلنا بيجيبوه منين، يعني بيجيبوه بسعر كام، إحنا بنشحن بس، بناخد 5% مصاريف شحن، أما لو إحنا هنقعد نبحث ونجري العمولة بتاعتنا هتزيد أكيد

العميل : عادي يا ريس دي كده هتبقى حاجتك إنت وأنا بشتريها منك

المهندس منسي : آه.. فهمت آه

العميل : أنا بصراحة همه سألوني، أنا قلتهم الباش مهندس شغله استيراد معدات، يعني مكن تعبئة وتغليف، بس ما عندوش أي مانع إن هوه يستوردلكم الحاجات بتاعتكم، فطبيعي عمولة حضرتك بسعرها بكل حاجة…

المهندس منسي : حضرتك ابعتلنا بس عينة وإن شاء الله خير ما تقلقش

العميل : بإذن الله، ولو بعتناها يا ريس وإن شاء الله اتوفقنا تتأخر في مجيها ولا مدة شحنها أد إيه؟

المهندس منسي : تاخد 45 يوم

العميل : تمام كده يا بيه حاضر، يبقى أنا هشوف حد من الشركة إن شاء الله وأنزل من الموقع النهاردة وهتصل بحضرتك هقولك أنا جاي يوم كذا

المهندس منسي : ماشي يا باشا

العميل : بس معلش يا ريس سؤال أخير، أنا عارف إن العنوان في باب الشعرية

المهندس منسي : آه

العميل : العنوان بالضبط عشان ما نتوهش عشان ما يبقاش شكلي وحش

المهندس منسي : لا ولا يهمك، هبعتهولك في رسالة حالاً

العميل : ماشي يا باشا بس ما أعرفش الجماعة اتصلوا بيا قالولي الباش مهندس قال ما بنجبش مسامير أو حاجة زي كده

المهندس منسي : مين دول؟

العميل : اللي همه الجماعة بتوع شركة إسماعيلية

المهندس منسي : اتصلوا بيك قالولك ما تجيبش مسامير؟

العميل : لأ مش ما تجيبش، قالوا إن همه بعتوا عينة لحضرتك تقريباً وقلتهم إحنا مستوردين معدات بس

المهندس منسي : لأ همه ممكن يكونوا اتكعبلوا في حد من المبيعات

العميل : تمام.. يعني إحنا على كلامنا يا ريس، أصل أنا اتخضيت لأني..

المهندس منسي : لا.. لا…

العميل : طيب هخليهم يكلموا حضرتك على الواتس اللي معايا ده

المهندس منسي : أيوه

العميل : تمام.. يبقى هخليهم يبعتوا لحضرتك علي الواتس دلوقتي إن شاء الله قبل ما يمشوا

المهندس منسي : ماشي يا غالي

العميل : ماشي يا باشا

المهندس منسي : لو أنا معرفتش أرد هيرد عليهم المهندس حمادة، يفهموه إن همه أوردي متعاملين معايا ومتفقين معايا، عشان هوه ممكن يقولهم برده نفس العملية آه هوه ما بنستوردش دلوقتي وحاجات من دي

العميل : ماشي يا باشا

المهندس منسي : همه ما يعرفوش

العميل : أنا أول ما بلغوني قلت ابعت لحضرتك علي الواتس لأن أنا عارف اتفاق حضرتك سيف أو كلمتك سيف

المهندس منسي : آه.. آه… أصل هوه المهندس منسي غير اللي مع المهندس منسي

العميل : تمام..

المهندس منسي : أكيد.. أكيد… لازم يبقى كده

العميل : لو ما كلموش حضرتك يبقى المهندس عمرو

المهندس منسي : ماشي يا غالي

العميل : تمام كده الله يبارك لك، تسلملي يا ريس

المهندس منسي : تحت الأمر

العميل : مع ألف سلامة