ماكينة اندكشن سيل لبرشمة طبه العبوات موديل 201 ماركة المهندس منسي
العميل : سلام عليكم
المهندس منسي : عليكم السلام ورحمة الله وبركاته
العميل : باش مهندس منسي
المهندس منسي : أيوه
العميل : إزيك يا باش مهندس
المهندس منسي : الحمد لله اتفضل
العميل : الله ينور معاك محمد من الشرقية
المهندس منسي : أهلاً بيك
العميل : أهلاً بحضرتك الله ينور عليك يا باشا على الشغل اللي إنتوا عاملينه ده
المهندس منسي : تعيش يا غالي
العميل : والله الله ينور عليكوا يا باشا
المهندس منسي : وعليك يا باشا
العميل : لو سمحت يا باش مهندس بالنسبة للمكنة اللي هي اللي هي أنديكشن سيل أتوماتيك.. لأ استنى لحظة بعد إذنك، اللي هي مكنة اللحام بتاعت الغطا الألومنيوم يا باشا اللي هي إم تو باك 201 ماركة المهندس منسي تباعكم دي
المهندس منسي : آه
العميل : دي بتلحم الطبة يا باش مهندس على العبوات الصغيرة عادي كل المقاسات واحد؟
المهندس منسي : آه إن شاء الله
العميل : طب بالنسبة للطبة بتاعتها بتلحم الألومنيوم ولا بتلحم التانية اللي هي التانية؟
المهندس منسي : الألومنيا آه
العميل : اللي هي تحت بلاستيك ولا بتبقى ألومنيا بس
المهندس منسي : من تحت بلاستيك لازم يبقى فيها طبقة بلاستيك
العميل : طب في طلب تاني بعد إذن حضرتك معلش لو كده أنا خدت العنوان وممكن أجيلك، في حاجة تاني اللي هي الطبة اللي هي مادة بولي إيثيلين
المهندس منسي : الـ إيه؟؟؟
العميل : اللي هي من فوق ورق كده ومن تحت ألومنيوم
المهندس منسي : آه
العميل : ديت موجودة برده
المهندس منسي : برده عندنا آه
العميل : بكام سعر الطبة ديت يا باشا والمكنة دي بعد إذنك؟
المهندس منسي : المكنة سعرها بيبدأ من 1500 أما بالنسبة للألومنيا دي مقدرش أحدد سعرها غير لما أشوف العبوة وأشوف القطر اللي إنت عايزه والكمية اللي حضرتك عايزها
العميل : القطر الجركن اللي هوه 20 لتر ده يا باشا
المهندس منسي : آه ما هوه جركن إيه بولي إيثيلين؟
العميل : جركن.. جركن
المهندس منسي : ما هوه الجركن ده الخامة بتاعته إيه بولي إيثيلين؟
العميل : آه
المهندس منسي : والقطر كام؟
العميل : والله ما قست والله يا باشا عشان ما أضحكش عليك…
المهندس منسي : هوه عموماً 55 مللي
العميل : آه ممكن
المهندس منسي : الكمية أد إيه؟
العميل : والله هي الكمية بتبدأ من كام عند حضرتك طيب؟
المهندس منسي : من 10000 طبة
العميل : طب الـ 10000 دول بكام يا باشا؟
المهندس منسي : هيبقوا في حدود 2500 جنيه
العميل : يعني الألف بـ 250
المهندس منسي : آه
العميل : طب أنا لو عزت آخد المكنة…
المهندس منسي : كل ما زادت الكمية كل ما قل السعر
العميل : طب مثلاً دلوقتي عايز 5000 مثلاً أو عايز 2000 مثلاً
المهندس منسي : ولا حاجة ممكن تيجي تلاقيها بضاعة حاضرة، يعني مثلاً إحنا كنا عاملين شغل وهتلاقي ناس تاخده
العميل : أنا خدت العنوان أنا كتبته هنا شركة المهندس منسي للتغليف أمام مدرسة الثانوية بنات باب الشعرية
المهندس منسي : هبعتلك العنوان تاني في رسالة دلوقتي حالاً
العميل : تمام يا فندم، بالنسبة للمكنة اللي قدامي ديت برده أنا عايز حجم الجركن بس
المهندس منسي : ما هوه عادي مفيش مشكلة في مكنة بـ 1500، وفي مكنة بـ 2850، وفي مكنة بـ 2000، وفي مكنة بـ 1800، ما تقلقش
العميل : أنا عايز الصح اللي تستحمل معايا الشغل، أنا مش عندي شغل كتير، يعني الشغل مثلاً ممكن أشتغل النهاردة عليها 3 ـ 4 ساعات وبعد كده تقعد أسبوع ما تشتغلش
المهندس منسي : كل هيستحمل معاك إن شاء الله إنت بتتكلم في ماركة، مش بتتكلم في مكنة جايبنها من الصين وجايين نبيعها
العميل : لا صين إيه لأ
المهندس منسي : إحنا عندنا خدمة ما بعد البيع، وعندنا صيانة وقطع غيار، إحنا بنصنع لحسابنا في عدد من البلاد
العميل : يا أستاذي يا باش مهندس، الصنع ده مش تصنيع حضرتك؟
المهندس منسي : ما هوه تصنيع حضرتي إزاي، صلي على النبي، الإنسان النهاردة لوحده مش هيقدر يعيش
العميل : لا ما أنا فاهم حضرتك بتستورد…
المهندس منسي : يعني أنا بستورد قطع غيار مثلاً، وصنعت على الأقل صنعت منها 30%، إنما لو صنعت 100% ده أنا محتاج ورش كتير قوي
العميل : لا.. لا… ما هو ده اللي أنا عايزه، أنا مش أجيب من الصين متغلفة وأشتريها تبقى صيني معرفش جواها إيه لأ
المهندس منسي : الله ينور عليك، أول مرة واحد يفهمني
العميل : يا سعادة الباشا، بص سعادتك صلي على النبي يا باش مهندس
المهندس منسي : عليه الصلاة والسلام
العميل : أنا لو معايا أنا دخلت عند حضرتك على الموقع ليه؟؟ ومن إمبارح والنهاردة شغال على الموقع قدامي، على أساس أنا عايز منتج مصري، عشان آخر النهار في أبو للشغلانة أو أبو للمكنة أو أبو للمعدة اللي اتصنعت عارف جواها إيه، إنما أنا النهاردة لو رايح أشتري مكنة لحام مثلاً، أول مكنة….
المهندس منسي : ما ينفعش…
العميل : يقولي صيني، أقوله طب يا عم بتصنع، يقولي يا عم دي صيني ماعرفش فيها حاجة، ده من جوه نحاس، ده من جوه….
المهندس منسي : آه… ما دي مشكلة بتأرق المصريين كلهم
العميل : إنما أنا لما لقيت إن في مصري عنده ذمة شرف واحد زي حضرتك كده
المهندس منسي : الحمد لله
العميل : والشغل ده كده الله ينور، عشان آخر النهار حتى لو في عطل….
المهندس منسي : ده إنت بقى لو سمعت اللي أنأح من كده هتنبصت قوي
العميل : يا ريت
المهندس منسي : الحمد لله من فضل من ربنا إحنا لينا فرع هناك بيبيع المكن في قلب الصين
العميل : يا باشا ده شرف لينا والله
المهندس منسي : وخد التانية أهوه، طالعين إن شاء الله عشان خاطر بنسجل سجلنا شركة في هونج كونج أهوت وطالعين نفتحها إن شاء الله يوم 22
العميل : يا باشا ربنا يجعلكم دايماً قدام يا رب على طول
المهندس منسي : وقريب أوكرانيا وإيطاليا إن شاء الله بإذنك يا رب
العميل : يا باشا أنا تحت أمرك لو عايز أي مكان في إيطاليا في هامبورج أنا أخدمك
المهندس منسي : هامبورج في ألمانيا
العميل : ما أنا هامبورج في ألمانيا ما عارف لو عايز حاجة هناك أو في إيطاليا أخواتي هناك في ألمانيا في هامبورج، وفي إيطاليا أخدمك
المهندس منسي : ماشي.. ماشي يا غالي
العميل : ولا يهمك يا سعادة الباشا
المهندس منسي : ماشي يا غالي
العميل : معاك محمد العمدة من الشرقية مركز فقوس
المهندس منسي : آه أنا قابلت ناس في مرة في إيطاليا من الشرقية
العميل : آه كلهم في إيطاليا وهامبورج
المهندس منسي : آه.. آه ما تحرمش منك يا غالي
العميل : فأنا عايز خدمة بس عشان أنا طبعاً في المجال أنا عايز أدور على مشروع أعمله هنا، أي مشروع، حتى أنا فكرت في القصة ديت إن أنا ممكن أرخص إيه، ما احترامي لحضرتك، ممكن أرخص هنا مصنع ترمالين ومطهرات وحاجات من ديت
المهندس منسي : بص يا سيدي، في عدد من المشاريع، ولكن هوه حضرتك بنبص على المنطقة بتاعت حضرتك الأول أو بنبص على الإمكانيات المادية، لو الإمكانيات المادة مساعدة في مشاريع عملاقة ومكسبها أحلى، ولو حضرتك إمكانياتك المادية بسيطة، ممكن نقول مشروع يخدم المنطقة
العميل : بالضبط
المهندس منسي : آه يعني في مشروع عبوات الـ بي في سي بالعربي عادي، ودور عليها اعمل سيرش
العميل : ماشي يا باشا اتفضل
المهندس منسي : فهوه في مشروع اسمه مشروع عبوات الـ بي في سي ده يخدم مين، بيخدم جميع المصانع، مصانع البويات، ومصانع الكيماويات، مصانع مستحضرات التجميل، مصانع غذائية، السمن والزيت…
العميل : العبوة بتبقى عبارة عن إيه يا باشا؟
المهندس منسي : العبوة اللي إحنا بنسميها الإزازة، هي أطلقت عليها كلمة إزازة عشان أول ما تصنعت اتصنعت من الإزاز
العميل : تمام.. تمام…
المهندس منسي : عبوة اللبن مثلاً، عبوة الخل والزيت، عبوة المياه واخد بالك، دي اسمها عبوات، عبوات الأدوية، عبوات مستحضرات التجميل، لما حضرتك لما بتجيبها من الصيدلية مش بتلاقيها في عبوة اللي إحنا بنسميها في إزازة
العميل : تمام يا باشا دي كلها طبعاً بلاستيك
المهندس منسي : آه كل دي بلاستيك
العميل : دي طبعاً بجميع الأحجام والمقاسات؟
المهندس منسي : بالتأكيد
العميل : تمام يا فندم
المهندس منسي : هي المكنة مش مسئولة عن الأحجام ولكن الاسطمبة هي المسئولة عن الأحجام
العميل : تمام يا فندم، معلش أصل أنا زي ما تقول إيه مش في المجال جامد يعني
المهندس منسي : ما هوه الثقافة الصناعية عندنا في البلد ضعيفة قوي
العميل : ما هي دي المشكلة
المهندس منسي : ما تقلقش من النقطة دي
العميل : إحنا كنا…
المهندس منسي : لو رحت ألمانيا ولاحظتهم بيقعدوا تتفرج على أفلام ألماني مش الأفلام الألماني المستوردة اللي إحنا بنستوردها هنا عشان نبوظ ، لا الأفلام الألماني بتاعتهم همه…
العميل : إنت تعبان من البلد يا باش مهندس منسي باين عليك
المهندس منسي : هتلاقي الفيلم لازم يحطلك فيه حته تصنيع، لازم، لازم، لازم يحط حته مصنع..
العميل : نعم.. نعم.. كلام مضبوط، طب بالنسبة للمشروع التاني يا باشا؟
المهندس منسي : المشروع التاني بقى في حاجة حديثة في مصر اسمها ورق التغليف الحديث، يعني الطباعة بالروتوجرافيك واخد بالك
العميل : آه…
المهندس منسي : ده مشروع رائد لأنه كله دلوقتي ابتدى يتجه للطباعة الحديثة، لو لاحظت في الآونة الأخيرة دلوقتي هتلاقي أغلب الناس أو الغالبية العظمى أو أغلب الشركات بتعمل طباعة كده عالية وراقية كده، عشان يهربوا من التزوير أو يهربوا من ضرب المنتج
العميل : تمام…
المهندس منسي : فدي برده لسه مشروع رائد يعني من المشاريع اللي لسه ما كترتش في مصر
العميل : آه… طب تكلفة المشروع ده تتكلف كام يا باش مهندس
المهندس منسي : عندي المشاريع دي، دي شمس وطالعه للكل
العميل : يا باشا.. هوه حضرتك ساكن فين يا باش مهندس؟
المهندس منسي : أنا ساكن في مصر الجديدة
العميل : فين في مصر الجديدة؟
المهندس منسي : ورا رئاسة الحي، الحي الأول
العميل : آه أنا خريج عندك الأزهر عند مدينة نصر عند ناصية الاستاد كده
المهندس منسي : آه كنت باجي عندكم ….
العميل : وسكنت في المطرية اللي متفرع منها محمد حسنين، وسكنت في المقاولين العربي عند كوبري الفنجري كده
المهندس منسي : كنا بنيجي عندكم أيام الجامعة
العميل : فين يا باشا؟
المهندس منسي : كنا بنيجي ما هو أنا هندسة القاهرة
العميل : آه… آه
المهندس منسي : واخد بالك كنا بنيجي عندكم في الجامعة ليا صحابي من البلد هناك وكده يعني والبلد إيه أصلاً أساساً من ميت مسعود تبع مركز ميت غمر
العميل : يا نهار أبيض يا باشا، يا باشا كده خلاص، ده إحنا كده حبايب، حبايبي كلهم هناك والله، عايلة كلهم حبايبنا هناك ونسابيبنا جنبيكم
المهندس منسي : الله يبارلك يا رب
العميل : لا يا باشا إحنا كده الحمد لله رب العالمين إحنا برده ربنا كرمنا بيك برده
المهندس منسي : لا تحت أمرك في أي حاجة
العميل : أنا برده يا باشا مش هينفع الكلام علي الواتس أنا لازم آجي لحضرتك الأول وأشوف الدنيا فيها إيه
المهندس منسي : إن شاء الله
العميل : وعايز أقعد مع حضرتك كده وتدلني على المشروع الصح عشان مش عايز أخبط زي ما إنت فاهم، أشوف المشروع أنا عمال بعمل كده دراسة أشوف المكن بكام والمواتير بكام…
المهندس منسي : هوه حضرتك قريب من ديارب نجم؟
العميل : أنا ليا فيها المهندس أحمد باز مقيم هناك حبيبي
المهندس منسي : ديارب شغالين في الزيت والسكر بكثافة
العميل : آه جنبينا في الزيت والخل والمطهرات بأنواعها
المهندس منسي : أيوه.. الزيت والخل والمطهرات، بلد اسمها ديارب نجم عندكم
العميل : ديارب نجم ده مركز، إحنا مركز فاقوس، إحنا هنا بص القفافيص بعد كده الصالحية الجديدة إحنا فاقوس بعد فاقوس ديارب وأبو كبير وخش بقى…
المهندس منسي : لو إنت قدرت بالنسبة لمصنع العبوات لو قدرت تعمل مصنع في قلب ديارب نجم تبقى نجحت
العميل : والله
المهندس منسي : أقولك، في حاجة، مصنع العبوات، العبوات النهاردة لما تيجي تحط 10 آلاف عبوة تحطهم في عربية نقل كبيرة، فهوه عشان يروح يجيبهم من مصر مثلاً ولا يجيبهم من ميت غمر فتكلفه نقل كتير قوي
العميل : تمام..
المهندس منسي : يعني مصاريف النقل تجيبلك حق المصنع في 6 أشهر
العميل : طب مشروع العبوات ده يتكلف في حدود كام؟
المهندس منسي : في حدود مثلاً 70 ـ 75 ألف
العميل : المشروع ده
المهندس منسي : آه… دي بداية، ويبقى عندك مشروع ومصنع يشتغل
العميل : بس ده المنتج بيور يا باشا؟
المهندس منسي : آه بيور طبعاً
العميل : ونظامه حلو وشغله حلو
المهندس منسي : آه
العميل : وهوه اللي بيشتغله في يوم ياخدوه بتوع ديارب، أنا مش مشكلة أنا عندي عربيتي نص نقل برده بص موضوع المصنع بتاع العبوات ده لو كده نضبط الدنيا مع بعضينا
المهندس منسي : ماشي يا باشا
العميل : طب التراخيص له تراخيص ولا حاجة ولا عادي
المهندس منسي : آه ليه رخصة بس رخصة بتطلع ما تقلقش
العميل : أنا عامة عندي أرض برده في الصالحية مش مشكلة لو هتتعمل فيها هناك عادي، طب والكهربا يا باشا بتاعته، في مواتير بتشتغل حاجة كبيرة؟
المهندس منسي : آه في طبعاً في مواتير وكل حاجة
العميل : يعني مواتير 3 فاز ولا 2 فاز
المهندس منسي : كله 3 فاز للأسف، إنما في ناس بيحتاجوا بيطلبوا 2 فاز فبيزيد السعر شويه، فيستحسن 3 فاز
العميل : 3 فاز، 3 فاز دي مشكلة
المهندس منسي : ليه ولا مشكلة ولا حاجة، لو عايز أعملهولك 2 فاز أعملهولك 2 فاز، هوه الأفضل 3 بس افرض مافيش هنعمل إيه؟؟ أنا شغلتها…
العميل : إنت قصدك عشان 3 فاز يتحمل معانا الشغل
المهندس منسي : آه.. آه إنما…. لا عادي ما إحنا شغلناها 2 فاز قبل كده، أنا شغلتها مرة ديزل
العميل : ديزل؟؟؟
المهندس منسي : آه يعني مرة شغلتها ديزل من غير كهربا خالص، المصنع كله
العميل : تمام… بس استهلاك بقى
المهندس منسي : لأ هي مش استهلاك وقود لو حسبتها على سعر الكهربا بتاع الثورة الجميل دلوقتي هتلاقي الديزل أرخص، بس الغلبة بتاعتها بس في كل شويه تقعد تمول… تمول.. تمول… كل شويه الجاز يخلص تحطه، فبتبقى عملية مرهقة شوية، إنما دولقتي الجينريتور أرخص من الكهربا بتاعت الحكومة
العميل : آه.. آه لا يا باشا المشروع ده لازم أهتم بيه وأشوف الدنيا فيها إيه
المهندس منسي : تحت الأمر يا باشا
العميل : أنا بدور على مشروع من النوع ده على فكرة يعني
المهندس منسي : إن شاء الله
العميل : يعني هوه ده الموجود برده يا باشا
المهندس منسي : في مشروعات كتير ، يعني في بالنسبة للمشاريع المتوسطة والمشاريع الصغيرة في مشاريع كتير، ده مشروع من المشاريع الصغيرة، في بقى مشاريع متوسطة وفي مشاريع فوق المتوسط، أنواع المشاريع كتير كتير شيل على أد ما تقدر يعني
العميل : أنا عايز مشاريع تمشي معانا في النهاردة في اليوم بتاعنا ده وحاجة تشتغل مش حاجة تقف وأدلل عليها
المهندس منسي : هوه أنا بقول لحضرتك هوه العب بتاعكم لو إنت ليك حد في ديارب نجم أو المنطقة بتاعتكم إنت كمان ممكن تعمل المصنع وجنبيه كمان مصنع التعبئة والتغليف، تعمل تعبئة وتغليف للزيت والخل، يعني ما تعتمدش على إنك تبيع، يعني ممكن تعمل المصنع ده لنفسك
العميل : تمام
المهندس منسي : يعني كمان ممكن تعمل المصنع ده لنفسك، وممكن تعبي كمان منظفات، آه يبقى إنت النهاردة عندك مصنع للعبوات ومصنع للمنظفات يبقى إنت عندك فوقة، فوقة إزاي؟؟ فايق في حاجة إنك إنت النهاردة بتصنع العبوة مش بتروح تشتريها
العميل : تمام…
المهندس منسي : فإنت النهاردة لو بعت العبوات بس الدنيا حلوة، يعني بلاش تكسب في واحد منهم، يعني إنت عملت إيه، يعني إنت عملت مصنع مثلاً منظفات، ومصنع عبوات يخدم مصنع المنظفات
العميل : تمام
المهندس منسي : فإنت في الأول عشان تثبت اسمك ممكن تكسب بمصنع واحد والمصنع التاني بتعمله خدمة، فهمتني
العميل : صح كده
المهندس منسي : بتخدم نفسك أولاً وبتخدم اللي حواليك ثانياً وتشتغل يبقى النهاردة هتشتغل ولا مش هتشتغل لا ده تفوق بعدين إنت ممكن النهاردة لو هتبيع مثلاً تتطلع الإزازة بتاعتك ببلاش
العميل : الله ينور عليك
المهندس منسي : لإن المصنع بتاعك هيبقى عندك مصنعين مصنع العبوات ومصنع المنظفات، إنت المفروض تكسب من العبوات مثلاً في العبوة مثلاً 20 قرش، والمفروض تكسب من المنظفات مثلاً 25 قرش، بلاش تكسب في واحدة فيهم وخش كده شوف هتعمل إيه؟؟؟ المنافس بتاعك هيتوه مش هيقدر
العميل : صح.. صح.. صح.. بالضبط الله يبارلك يا باشا ويجعلك يا رب قدام دايماً، إن شاء الله يا باشا مش هينفع الكلام علي الواتس
المهندس منسي : تيجي تنورني في أي وقت
العميل : الله يخليك، لو سمحت بقى ابعتلي العنوان
المهندس منسي : هوه آه هبعتهولك تاني في رسالة حالاً
العميل : أمام مدرسة الثانوية بنات باب الشعرية شارع المنسي خلف رئاسة حي باب الشعرية، صح كده؟
المهندس منسي : مضبوط آه مضبوط
العميل : ولا في حاجة تاني غير كده؟
المهندس منسي : لا في بقى عندنا حدائق القبة، مدينة نصر، وفي العبور، وفي 6 أكتوبر
العميل : في سوق العبور؟
المهندس منسي : لأ مش في سوق العبور، في مجمع الأمم
العميل : في مدينة العبور
المهندس منسي : آه…
العميل : ديت أقربلي كتير دي جنب بلبيس دي
المهندس منسي : آه بس أنا ما بروحش هناك إلا نادر قوي
العميل : بس كل الإمكانيات موجودة هناك فيه
المهندس منسي : إن شاء الله
العميل : حضرتك ممكن نتقابل هناك طيب
المهندس منسي : يبقى صعب لأن أنا بروح بالصدفة…
العميل : حضرتك بتبقى في المقر الرئيسي اللي هوه باب الشعرية
المهندس منسي : آه…
العميل : باب الشعرية كل يوم ها؟
المهندس منسي : آه يومياً ماعدا يوم السبت بكون في الفرع بتاع مدينة نصر
العميل : فين في مدينة نصر، فين من عباس العقاد؟
المهندس منسي : في مكرم عبيد قدام عمر أفندي
العميل : آه… عارفه، يعني إنت معادك الجمعة عطلة طبعاً، والسبت في مدينة نصر، نروحلك باب الشعرية في المقر الرئيسي أحسن
المهندس منسي : تيجي تنورني في أي وقت
العميل : الله يخليك يا باشا، والله ده شرف لينا معرفة حضرتك، وأنا معلش يعني على الإطالة، بس طبعاً أنا بكلم أخويا الكبير يعني
المهندس منسي : لا تحت أمرك ده شرف ليا
العميل : شاكرين لأفضالك واتفضل يا فندم
المهندس منسي : مع السلامة
العميل : ماشي يا حبيبي سلام عليكم سلام عليكم
