ماكينة تشكيل الاطباق وعلب الزبادي موديل 605 ماركة المهندس منسي

العميل : سلام عليكم

المهندس منسي : عليكم السلام ورحمة الله وبركاته

العميل : إيه يا باشا

المهندس منسي : معاك اتفضل

العميل : المهندس منسي معايا

المهندس منسي : أيوه

العميل : إزي حضرتك، أنا كنت عايز من حضرتك مكنة فاكيوم في الموقع

المهندس منسي : مكنة إيه؟

العميل : مكنة فاكيوم

المهندس منسي : تغليف آه

العميل : آه…هي الخامات موجودة عند حضرتك؟

المهندس منسي : عندنا كل حاجة آه

العميل : طيب المكان فين في القاهرة؟

المهندس منسي : إحنا عندنا حدائق القبة، مدينة نصر، باب الشعرية

العميل : فين في باب الشعرية؟

المهندس منسي : هبعتلك العنوان في رسالة حالاً

العميل : طيب ماشي يا فندم، طب المكنة الصغيرة بتبدأ من كام؟

المهندس منسي : مكنة الفاكيوم

العميل : آه

المهندس منسي : في عندنا مكنة بتعمل، وفي مكنة…. إنت عايزها فاكيوم تشكيل ولا فاكيوم شفط هوا من الكيس؟

العميل : تعبئة لا تعبئة، اللي هي الحاجات الأطباق الشفافة دي

المهندس منسي : الأطباق الشفافة إزاي؟

العميل : تشكيل الأطباق الشفافة اللي هي بتاعت العلب والاطباق والحاجات دي

المهندس منسي : آه.. آه اللي بتصنع الصحون والأطباق والعلب والحاجات دي

العميل : آه وعلب الزبادي

المهندس منسي : آه دي بتعمل يعني 15000 جنيه ده سعر لغاية يوم 1 أكتوبر عشان خاطر إحنا بنحسب ال على 10 دولقتي ومستنيين القرارات الجديدة وكده يعني

العميل : تمام..

المهندس منسي : يعني في عرض لحد 1 أكتوبر

العميل : طب معلش حضرتك إديني فكرة كده عن الخامات وأسعارها أد إيه؟

المهندس منسي : أسعار الخامات عندنا ولا بره؟

العميل : عند حضرتك ما أنا هاخد من حضرتك بقى

المهندس منسي : آه… هوه عندنا شوفلي بس التكنيك بتاع الخامة والكمية وكده يعني… الكمية أد إيه؟؟؟ ولا إنت بتعمل دراسة جدوى عايز تعرف الأسعار

العميل : والله يا باشا أنا الموضوع بالنسبة لي عاجيبني بس ما عنديش خبرة فيه عشان أكون صريح معاك

المهندس منسي : ده موضوع كويس وممتاز، يعني ياما ناس عملوا مصانع منه، ده….

العميل : أنا عندي وقت من الساعة 4 العصر لحد الساعة واحدة بالليل ما بعملش فيه أي حاجة

المهندس منسي : آه… آه… بص صلي على النبي

العميل : عليه الصلاة والسلام

المهندس منسي : بص هوه المشروع ده محتاج جهد بشري أكتر منه جهد مادي، جهد بشري يعني إنك تكون عايز تشتغل

العميل : تمام زي الفل

المهندس منسي : أكتر من إن يكون معاك فلوس وعايز تشغلها

العميل : لأ الجهد البشري موجود

المهندس منسي : فده مشروع صغير جميل وناس كتير عملته ونجحت فيه نجاح باهر

العميل : طب أنا عندي معارف في المطاعم….

المهندس منسي : آه هوه المكنة دي بتعمل شغل لكل البشر اللي في الدنيا، لكل حاجة، تلاقي الحلوانية، ومستحضرات التجميل، والمواد الغذائية، المطاعم، الكافيهات…. بص كل المجالات بتحتاج منها، يعني لو نزلت على الحلوانية وقولتلهم أنا عندي العلبة اللي بتحط فيها الحلويات وحاجات من ديت هيتعاملوا معاك، لو نزلت عند مستحضرات التجميل هيتعاملوا معاك، عند بتوع العدد والأدوات هيتعاملوا معاك، عند الزيوت البترولية هيتعاملوا معاك.. كله.. كله.. بس عليك إنك تجتهد بإنك إنت تلف عليهم

العميل : تمام… طيب حضرتك بس تديني فكرة مبدئية كده أنا مثلاً لو عندي كمية شغل ممكن… لو خدت من حضرتك رول ولا ألواح ولا إيه؟ يعني…

المهندس منسي : لا بتبقى رولات

العميل : رولات… حسب بقى التخانة والكيلو ولا السمك ولا إيه؟

المهندس منسي : حسب السماكة بتاعتها، وحسب الكمية المطلوبة أد إيه وكده يعني

العميل : مافيش حاجة زي كده معروضة عند حضرتك دراسة بالموضوع ده معروضة الإنتاجية بتاعت المكنة كام قطعة في الساعة…

المهندس منسي : في… في.. في خش على هي رقم المكنة عندنا اسمها 605 ماركة المهندس منسي

العميل : تمام… موجود بقى منها ممكن أعملها اسطمبات والحاجات اللي أنا عايزها

المهندس منسي : آه تعملها الاسطمبات اللي إنت عايزها أياً كان الاسطمبة، وأي كان شكل العلبة والمنتج اللي إنت عايز تعمله

العميل : طب الاسطمبة بتتعمل فين يا باش مهندس معلش؟

المهندس منسي : برده عندنا

العميل : إنما لو عايز اسطمبة…

المهندس منسي : إحنا ماسكين الموضوع من إيه تو زد

العميل : طب زي الفل

المهندس منسي : أما مثلاً افرض إنك هتجيب خاماتك من بره، إنت عايز تجيب خامات من بره مش هتجيبها من عندنا هنقولك لأ لازم تجيبها من عندنا، لأ طبعاً

العميل : لا طبعاً لأني برده أنا ليا مصلحة فيها وحضرتك ليك المصلحة

المهندس منسي : آه…

العميل : لأ كلامك صح سليم يعني، تمام… طب هوه حضرتك المفروض لو هعمل الاسطمبة كذا عين، هي مقاسها كام × كام؟

المهندس منسي : مقاس إيه المكنة؟

العميل : آه

المهندس منسي : 40 × 60

العميل : يعني ممكن تعمل معايا مثلاً 8 قطع في الاسطمبة الواحدة

المهندس منسي : آه

العميل : تتكلف أد إيه الاسطمبة تقريباً؟

المهندس منسي : تعملها في حدود 4000 ـ 3000 كده يعني

العميل : بتبقى التشكيل حديد وكده ولا…

المهندس منسي : بتبقى ألومنيا أو في خامة إحنا اخترعناها جابت معانا نتائج كويسة قوي

العميل : تمام… تمام… يعني أنا ممكن أقول دراسة مبدئياً الموضوع ده عشان أبدأ أشتغل فيه كام 20000 مثلاً؟

المهندس منسي : آه ممكن آه، وبعدين إنت ممكن تبدأ تجهز عينات تجيب عينات وتبدأ تلف بيها على الناس وتجهز شغل يعني، وتاخد منهم عرابين

العميل : تمام.. تمام… ده الكلام ده بعد ما أجيب المكنة وأشغلها طبعاً

المهندس منسي : والله وات إيفر، ممكن تشتغل… ممكن آه تشتغل من دلوقتي وتبدأ تلف على كل واحد، يعني الناس همه اللي هيشغلوك ما تقلقش يعني

العميل : طب بالنسبة للرول اللي يعمل العلبة بتاعت الزبادي برده موجود

المهندس منسي : آه

العميل : بيبقى مثلاً له كمية معينة معروفة، مثلاً ممكن المتر يعمل أد كده، أو يعمل كذا علبة

المهندس منسي : ما هوه إنت بتوزن العلبة، بص إنت تمسك العلبة وتوزنها على ميزان جواهرجي وتضرب اللي يطلع في 1.15

العميل : اللي هوه الهالك

المهندس منسي : أيوه الهالك بتاعها 15% يطلعك وزن العبوة قبل الهالك

العميل : تمام…

المهندس منسي : الناتج دوت تضربه × …. سعر العميل ولا سعرك إنت؟

العميل : عادي بقى مش هتفرق

المهندس منسي : تضربه في 2 قرشين صاغ سعرك إنت، ولما بتيجي تبيع للعميل بتبيعوا بـ 3 إنت وكمياتك معاه، ما هو ممكن واحد يطلب منك كميات عالية هتلاقي بـ 3، طب افرض واحد طلب منك كميات قليلة؟؟؟ هتديلوا بـ 3، يبقى بحسب بقى تحسب مواصلاتك وانتقالاتك والاسطمبة وحاجات كتيرة قوي بتتحسب يعني

العميل : تمام…. ماشي يا فندم، طب رقمها كام معلش المكنة

المهندس منسي : 605

العميل : طيب ماشي، حضرتك…

المهندس منسي : بس لازم تكتب جنبيها المهندس منسي، لو كتبت 605 هيطلعلك أمة لا إله إلا الله

العميل : أنا هكتب.. ما أنا عارف الموقع، أنا لسه فاتح الموقع عندكم وشايف الصور ما شاء الله يعني

المهندس منسي : عشان تخش على الماكينة على طول بدل ما تقعد يتوهوك العيال بتوع… الناس التعبانين دول، لأ تخش عليها على طول، اكتب 605 المهندس منسي، هتبص تلاقي نفسك على طول دخلت عندها

العميل : المكنة ليها صيانة وضمان؟

المهندس منسي : يا راجل إنت بتتكلم في ماركة، هوه إنت بتتكلم في تاجر، إحنا مش تجار إحنا مهندسين مصنعين، يعني إيه؟؟؟ يعني إحنا بنصنع قطع الغيار بره وبنجمعها، يعني إحنا اللي عاملين الديزاين، اللي عامل الديزاين مهندس دارس في ألمانيا

العميل : تمام…

المهندس منسي : واخد بالك، إحنا اللي عاملين الديزاين، يعني كل العملية قطع غيار بنركبها على بعضها، يعني إحنا مش تجار روحنا جيبنا شوية مكن من وات إيفر أي بلد وجينا نبيعهم، لأ.. إحنا مهندسين نحترف ونجود مهنتنا، مش بنحترف ونجود كلامنا

العميل : ربنا يزيدك يا باش مهندس

المهندس منسي : ماشي يا غالي

العميل : ولا يهمك يا باشا

المهندس منسي : ماشي يا حبيبي

العميل : خلاص يا باشا أنا هدخل على المكنة كده وإن شاء الله لو في خير هكلم حضرتك تاني علي الواتس ونشوف التفاصيل

المهندس منسي : ماشي يا باشا

العميل : وآجي لحضرتك

المهندس منسي : ماشي يا ذوق

العميل : ألف شكر لحضرتك

المهندس منسي : مع السلامة

العميل : شكراً