ماكينة تصنيع العصا الخشب و شرنكه البلاستيك عليها من شركة المهندس منسي
العميل : سلام عليكم
المهندس منسي : الله وبركاته
العميل : شركة المهندس منسي
المهندس منسي : أيوه
العميل : لو سمحت بتشتغلوا في خط الإنتاج بتاع العصايا الخشب اللي بيجي من الصين اللي هوه اللي بيعمل العصايا وبيكسيها بلاستيك؟
المهندس منسي : بيعمل العصايا إنهيه؟
العميل : حضرتك عارف عصايا المأشة اللي هي الخشب
المهندس منسي : آه…
العميل : في مكنة كده زنبة بيتحط فيها الخشب تطلع مدورة
المهندس منسي : آه يعني إنت عايز المكنة اللي بتصنع العصايا الخشب
العميل : آه والمكنة التانية اللي بتحط البلاستيك على الخشب
المهندس منسي : لأ المكنة اللي بتحط البلاستيك على الخشب دي بتتحط… إنت عايز تحطها أتوماتيك؟
العميل : أتوماتيك آه
المهندس منسي : لا أنا عندي المكنة اللي بعد ما حطيت العصايا عليها البلاستيك هي تشرنكها لك
العميل : آه بس مش هتطلع بنفس الجودة مش..
المهندس منسي : مين اللي قال كده؟
العميل : أصل مكنة الشرينك دي هتبقى زي اللحم على العضم، هتبقى ماسكة جامد؟
المهندس منسي : طبعاً، أكيد
العميل : تمام…
المهندس منسي : إن ما عملتش كده يبقى ما قضتش الغرض المطلوب يعني، لا تطلع مشفوط منها….
العميل : بص حضرتك الشرينك اللي حضرتك بتتكلم عنه، أنا بتكلم في العصايا اللي هي متر و20
المهندس منسي : آه… العصايا المتر و20 تشرنكها بتطلع من الناحية التانية متشرنكة وزي الفل، وبعدين مش أول مرة بنشتغلها يعني
العميل : يعني حضرتك اشتغلت في الموضوع ده قبل كده؟ حضرتك شرنكتها قبل كده؟
المهندس منسي : آه.. اشتغلناها في الشرنكة ولكن كانوا بيحطوا الخرطوم في البتاع يدوي، أما عملية إن في مكنة بتعملها ديت ما.. يعني دي أول مرة نشوف الموضوع ده
العميل : آه يعني حضرتك قصدك مثلاً كانوا بيحطوا زي كيس وهي تدخل في الشرنكة فتقفل عليها
المهندس منسي : آه.. آه
العميل : يعني مصنع الرول البلاستيك أخليه يعملي كيس على أد العصايا يعني؟
المهندس منسي : آه… بتعمل على أد العصايا، بس إذا كانت العصايا متر وعشرين مثلاً، نقول إن القطر بتاعها مثلاً 3 سم، إنت بتعمله 3.5سم عشان ما تقرفش اللي هوه بيحط العصايا عشان يدخلها بسرعة
العميل : طب المكنة دي تعمل كام عصايا في الساعة مثلاً؟
المهندس منسي : هي بتعمل 10 متر في الدقيقة
العميل : 10 متر في الدقيقة، يعني تعمل 10 عصيان في الدقيقة مثلاً
المهندس منسي : مثلاً..
العميل : طب بكام المكنة دي يا باش مهندس؟
المهندس منسي : 430 ، 4300 جنيه مصري
العميل : طب والمكنة التانية…
المهندس منسي : ده سعر النهاردة عشان…
العميل : أنا هتعامل معاك بالمصري، فهتقلي مصري أد كده هدفع مصري
المهندس منسي : مافيش مشكلة، 430 يعني 4300 جنيه
العميل : دي بضاعة حاضرة ولا لسة هتيجي؟
المهندس منسي : بضاعة حاضرة آه
العميل : طب بالنسبة للتانية اللي هي الزنبة اللي هي بتخش فيها الخشبة تطلع مدورة
المهندس منسي : لا دي مكنة قبل كده أنا كنت صنعتها هنا في مصر، كنت صنعت مكنة هنا في مصر بتحطلها واحدة واحدة، ولكن دلوقتي في حاجات دلوقتي ماكبرودكشن، فدي بقى نقعد مع بعض وندرسها إزاي نعملها
العميل : طب اللي حضرتك عملتها واحدة واحدة دي…
المهندس منسي : إنت بتعملها من خشب البولينا؟
العميل : لا هعملها كافور
المهندس منسي : هتقرص منك
العميل : طب البولينا مش متوفر في مصر بولينا
المهندس منسي : ما تعمل مزرعة بولينا إيه المانع هوه…. تعالى صرف الصحة، على أماكن صرف، الأماكن بتاعت الصرف الصحي تروح بديرها شجر بولينا…
العميل : أنا قبل كده قريت عن شجر البولينا دي اللي هي مش هتطلع قبل 7 سنين
المهندس منسي : 3 بس
العميل : طيب إحنا عايزين ناكل النهاردة يا باش مهندس
المهندس منسي : وبعدين النهاردة ما هوه إنت هتزرعها النهاردة على إيه؟ على ميه مجاري وميه… مش مياه حلوة يعني…
العميل : ماشي في حكومات أو البتاع بتاع الحي في حاجة زي دي، ده ممكن الحي يجي يشلهالك تاني يوم الصبح
المهندس منسي : آه دي بقى الكارثة
العميل : ما حضرتك أكيد في السوق وعارف إنت بتحارب عشان تجيب الجنيه
المهندس منسي : آه.. صح
العميل : لكن حضرتك صنعت واحدة بتعمل قطعة قطعة، يعني عصايا عصايا؟
المهندس منسي : آه.. عملتها قبل كده الكلام ده من حوالي 5-6 سنين
العميل : ما تقدرش إنك إنت تعملنا 2 أو 3 تاني زيها؟
المهندس منسي : عادي نقدر
العميل : دي حوالي كام تكلفتها اللي هي اليدوي الواحد بواحده دي؟
المهندس منسي : أيامها كنت مصنعها كانت مكلفاني حوالي، كنت بيعها يعني بحوالي يعني 25000 جنيه دي كانت بتعمل مثلاً حوالي مثلاً 60 قطعة في الدقيقة مثلاً
العميل : أنا شفت الصيني بتاعها يا باش مهندس
المهندس منسي : آه..
العميل : إنت بدخل خشبة بتطلع من الناحية التانية بتاخد حوالي ثانيتين
المهندس منسي : آه… يعني ممكن…
العميل : هي دي اللي حضرتك بتقول عليها ولا؟
المهندس منسي : أنا ما شفتش الصيني أنا شفت اللي أنا عملتها، كل العملية إن أنا عملت رابوه، الرابوه دي النص دايرة من هنا والنص دايرة من هنا
العميل : تمام
المهندس منسي : واخد بالك أنا هقولك على فكرتها ممكن إنت تصنعها
العميل : لا أنا مش عايز أصنع أنا معنديش خبرة…
المهندس منسي : مش هتفرق… مش هتفرق ..صلي على النبي… صلي على النبي…رحت عامل نص دايرة من هنا بسلاح، وسلاح نص دايرة من هنا، بيلف بسرعة عالية، واخد بالك، بيلف بسرعة عالية، فهوه لوحده أول ما تحطله حتة الخشب هوه بيسحبها ويقعد ياكل ياكل ياكل ياكل بنص دايرة لحد ما يطلعها من الناحية التانية مدورة
العميل : فهمت حضرتك، لو طلبت منك الشرينك ومثلاً من دي ياخده معاك أد إيه مثلاً؟
المهندس منسي : موجودة بضاعة حاضرة
العميل : الشرينك موجود، لكن التانية؟
المهندس منسي : التانية لا دي هنصنعهالك هتاخد مثلاً في حدود 15 يوم كده يعني
العميل : تمام
المهندس منسي : اللي هي مكنة تصنيع يد المأشة
العميل : آه… أنا معايا فيديو للصيني بتاعها
المهندس منسي : ماشي ابعتلي الفيديو على الواتس
العميل : مافيش مشاكل هبعتهولك على الواتس، وكده كده يمكن يوم الحد أو الاتنين أتصل بحضرتك ونيجي نقعد معاك
المهندس منسي : ماشي يا غالي
العميل : ماشي يا باش مهندس، شكراً
المهندس منسي : مع السلامة
العميل : سلام عليكم
