ماكينة فاكيوم تشكيل المنتجات من شركة المهندس منسي

العميل : سلام عليكم إيه يا باش مهندس

المهندس منسي : أيوه مين

العميل : أنا إسلام من الشرقية كنت كلمت حضرتك على ماكينة الفاكيوم

المهندس منسي : آه

العميل : حضرتك كنت عايز أعرف هي المكنة 3 فاز ولا 2 فاز

المهندس منسي : لا كل المكن بتاعنا 2 فاز، إلا إذا كنت عايز المكنة 3 فاز بنعملهالك

العميل : بس أنا كنت عارف إن المكنة الـ 2 فاز بيبقى جهدها ضعيف

المهندس منسي : مش بيبقى جهدها ضعيف، هي العملية بتبقى مقياس قوة، مقياس قوة إزاي؟ يعني دلوقتي إحنا محتاجين دلوقتي ماتور 5 حصان

العميل : تمام

المهندس منسي : فإنت إمكانياتك دلوقتي ما تستوعبشي أكتر من 2 فاز، فبنروح جايبين ماتور 2 حصان ونروح مركبينه، طب لو جيبنا ماتور 3 فاز، مش هنجيب 5 حصان هنجيب 3 حصان

العميل : تمام

المهندس منسي : يعني إنت بتتكلم هنا في 220 فولت، فرق الجهد هنا 220 فولت، أما فرق الجهد هنا 360، هوه للأسف يعني إحنا مهندسين فاهمين بنعمل إيه، فللأسف اللي موجودين في السوق تجار فبيعجنوا أي كلام في أي كلام، فهوه ده الصح إحنا مثلاً دلوقتي إنت بتتكلم مثلاً.. خليك إنت بقى على 2 فاز ولا 3 فاز إنت عايز تشتغل 24 فولت، مش هينفع؟ هينفع طبعاً، مواتير فيها قوة 5 حصان وفيها قوة 3 حصان وكل حاجة، بس

العميل : طيب، يعني مفيش جهد ضعيف…

المهندس منسي : هي كل العملية بس إن هوه في 3 فاز بيريح الماتور شويه، الـ 2 فاز بيجهد الماتور سنه، بس مافيش أكتر من كده، وحاجات كلها عبيطة يعني ماتستهالش كل ده

العميل : آه..

المهندس منسي : إنما لو عايزها 3 فاز إحنا معندناش مشكلة، هي كل العملية… هوه الماتور الـ 2 فاز أغلى من الماتور الـ 3 فاز

العميل : آه..

المهندس منسي : يعني الماتور السنجل فيز 220 أغلى من الماتور التريبل فيز 360

العميل : تمام

المهندس منسي : طب ما هوه في تريبل فيز اللي هوه 3 فاز 220 برده

العميل : آه…

المهندس منسي : في 220 واخد بالك 3 فاز وفي 110 3فاز، بس همه عشان مش عارفين همه فهموها إزاي 2 فاز و3 فاز حتى الكلمة نفسها غلط، مفيش حاجة اسمها 2 فاز اسمها سينجل فيز يعني فرده واحدة كهرباء، واخد بالك

العميل : أيوه.. أيوه

المهندس منسي : أما تريبل فيز ديت يعني 3 فرد كهربا، وفي 3 فرد كهرباء 220، وفي 3 فرد كهرباء 110، وفي 3 فرد كهرباء 24، أنا لو دخلتك في عالم الهندسة والصناعة مش هتخلص النهاردة

العميل : أيوه.. أيوه.. طب أنا المكان اللي أنا هشتغل فيه هيبقى 2 فاز، 3 فاز عندي هتبقى مشكلة كبيرة، لازم أجيب عداد تجاري…

المهندس منسي : عادي… إحنا بالنسبة لنا دي ميزة عندنا، إن إحنا بنقدر نوفرلك الكهرباء اللي إنت عايزها، ولو ما عندكش كهرباء خالص وعايز تشتغل على مواتير ديزل برده بنشغلك، طب لو معندكش كهرباء وعندك طاقة شمسية، برده هشغلك

العميل : مفيش مشكلة يعني

المهندس منسي : الحاجات دي بالنسبة لنا إحنا مشاكلها محلولة لأن إحنا دارسين وفاهمين بنعمل إيه

أنا فاهم إن حضرتك اللي عارف، يعني بستشير حضرتك يعني مش واخدنها تجارة

العميل : آه.. خلاص ماشي يا فندم شكراً وأنا بدرس الموضوع حالياً وبأمر الله يعني هبقى أكلم حضرتك تاني

المهندس منسي : إن شاء الله

العميل : حضرتك شغالين بعد العيد

المهندس منسي : آه شغالين من يوم السبت

العميل : بس طبعاً ممكن آجي وأشوفها وهي شغاله والكلام ده كله

المهندس منسي : إن شاء الله

العميل : ماشي يا باش مهندس شكراً.. مع ألف سلامة