ماكينة لحام الاكياس البلاستيك من شركة المهندس منسي
العميل : سلام عليكم
المهندس منسي : الله وبركاته
العميل : لو سمحت أنا شغال في المنتجات بتاعت المخابز
المهندس منسي : شغال في إيه؟
العميل : شغال في العيش الفينو يعني
المهندس منسي : آه
العميل : فأنا شغلي بيروح المطاعم والسوبرماركت والكلام دوت، فأنا بعمل بحط في أكياس بلاستيك وبلحمه
المهندس منسي : آه…
العميل : فدخلت على اللي هوه المنتجات بتاعتكم فأنا في حاجة جديدة فده متاح عندكم المكنة بتاعت لحام الأكياس البلاستيك دي ولا لأ؟
المهندس منسي : آه عندنا آه مكنة اللحام البلاستيك الإنتاجي، اللي هوه إيه؟ اللي هوه تديله الكيس وهوه يلحمه ويرميه الناحية التانية، ما يستناش إن إنت تلحمه.. يعني الناس متعودة على مكن لحام الأكياس اللي هوه إيه تلحم وبعد كده تستنى وبعد كده تشيل، لأ اللي عندنا حاجة تانية، مكنة بسير ترميلها الكيس هي تاخده وتلحمه وترميه الناحية التانية، يعني كل اللي عليك إنك تناولها الكيس
العميل : أحطلها الكيس على الشفه بتاعتها وهو يمشي باللحام بتاعه
المهندس منسي : أيوه
العميل : صح كده
المهندس منسي : أيوه.. لأن الناس بتخلط بين مكن لحام الأكياس اللي هوه العادي المنزلي ومكن لحام الأكياس الإنتاج بتاع المصانع اللي هوه بتاعنا
العميل : طيب دي إنتاجيتها أد إيه في الساعة يا فندم؟
المهندس منسي : 10 متر في الدقيقة
العميل : يعني إيه؟
المهندس منسي : يعني حضرتك بتشوف الكيس بتاعك عرضه كام…
العميل : أنا الكيس بتاعي عرضه 30 سم
المهندس منسي : لأ إنت كده بتقول على الطول، 30 سم ده عرضه مساحة واسعة قوي، نفترض إنه هوه 15 سم مثلاً
العميل : لأ أنا عندي عرضه 30 سم، يا فندم يا باش مهندس، أنا عرض الكيس عندي 30 عشان الكيس 30 × 45
المهندس منسي : إنت متأكد ده مش كيس ده كده شكارة
العميل : هوه 30 × 45 فعلاً عشان أنا عندي العيش بتاع المطاعم ده بيتعبى 5 قطع في الكيس
المهندس منسي : ماشي.. عموماً هوه الكيس نفترض إن هوه 30 بتقسم المتر على عرض الكيس يطلعلك عدد الأكياس اضرب × 10 ، لأنه 10 متر في الدقيقة، اضرب × 10 فهمتني ولا ما فهمتنيش
العميل : آه.. تمام يعني أنا بحطلها الأكياس بتسلمه لشفة السير مع المكنة وهي بتعديه الناحية التانية بعد ما بيتلحم
المهندس منسي : آه تضرب الكيس × 10، وبعد كده تضرب عدد الأكياس اللي طلع تضربها × 60 عشان تعرف العدد في الساعة
العميل : يعني هوه…
المهندس منسي : يعني تعملك في حدود 2000 ـ 3000 كيس في الساعة، بس لاحق عليها بس
العميل : حضرتك بتتكلم 10 متر في الدقيقة
المهندس منسي : آه.. 10 متر في الدقيقة
العميل : آه.. ده كده كتير ….
المهندس منسي : آه كتير لاحق عليها بس
العميل : طب دي سعرها كام يا فندم؟
المهندس منسي : دي سعرها ، يعني 2000 جنيه مصري، وإلحق قبل ما ال يعلى، لأن ال يعلى دلوقتي بالساعة
العميل : تمام… طب دي معاها ضمان ولا؟
المهندس منسي : آه ضمان لمدة سنة ضد عيوب الصناعة و5 سنين توفير قطع الغيار لحساب العميل، هوه إحنا ماركة براند مش تجار، مش روحنا جيبنا شويه مكن وجيينا نسترزق فيهم، إحنا ماركة، يعني إحنا اللي مصممين المكن ومصنعين قطع الغيار بره ومجمعينها وحاجات من دي، ماشي
العميل : طب أنا معلش هتقل على حضرتك شويه
المهندس منسي : آه… بالله عليك استعجلي عشان أنا سايق وعمال اكتب
العميل : لأ مش في السعر، قطع الغيار بقى متوفرة عند حضرتك كتير صح؟
المهندس منسي : آه طبعاً مش إحنا اللي مصنعين المكن
العميل : أسعار قطع الغيار اللي الحاجة اللي بتغيير كتير يعني؟
المهندس منسي : يعني إيه أسعار قطع الغيار، هوه في حاجة بتبوظ، لما تبقى حاجة تبوظ ابقى قول سعرها كام، إنما الماكنة بتاعتنا هيد بيوتي، يعني خدمة شاقة
العميل : تمام.. هوه ….
المهندس منسي : إنت عارف يعني أقولك أسعار قطع الغيار، معناها إن أروح مطلعلك كشف كده في 175 قطعة، المكنة ديت فيها 175 قطعة، أروح مطلعلك وأقولك سعر دي إيه وسعر دي إيه…
العميل : لا مش قصدي يا فندم، أنا قصدي في مثلاً مكن اللحام العادي الأعطال فيه على طول الشريط السلك مش عارف إيه، أنا بتكلم دي اللي بيتغير الشريط…
المهندس منسي : لا .. لا دي مافيهاش سلك دي فيها سخان جهاز تسخين، مافيهاش سلك زي المكنة المنزلي
العميل : بقول لحضرتك مكان حضرتك فين عشان أشوف الكلام ده
المهندس منسي : إحنا عندنا حدائق القبة، مدينة نصر، باب الشعرية، 6 أكتوبر
العميل : مدينة نصر كويس أقرب ليا خلينا في مدينة نصر
المهندس منسي : هبعتلك الداتا بتاعته في رسالة حالاً
العميل : ماشي يا فندم
المهندس منسي : ماشي مع السلامة
