مشروع تعبئة الزيوت من شركة المهندس منسي
العميل : مساء الخير
المهندس منسي : مساء الخير يا فندم
العميل : إزيك يا باش مهندس
المهندس منسي : الحمد لله مين؟
العميل : لو سمحت أنا لقيت رقمك الواتس على النت، تبع مصنع الزيوت والكلام ده
المهندس منسي : آه
العميل : أنا كنت عايز أستشير حضرتك في موضوع كده، تكلفة المصنع تتكلف كام مثلاً؟
المهندس منسي : ما هو بيبقى حسب الطاقة الإنتاجية اللي حضرتك عايزها، مثلاً إنت هتحتاج طاقة إنتاجية أد إيه؟
العميل : أنا ما أعرفش أنا حاجة جديدة عليا، أنا عايز أعمل حاجة كويسة يعني
المهندس منسي : في نص أتوماتيك وفي أتوماتيك كامل، في حضرتك مثلاً هتعبي في أزايز أد إيه…. في حاجات كتيرة لازم إن إحنا نتكلم الاول
العميل : يعني مبدئياً كده المصنع يتكلف كام فلوس؟
المهندس منسي : بص حضرتك
العميل : أنا عندي المكان وكله
المهندس منسي : بص حضرتك كل العملية إن كل اللي فيها إن حضرتك تقولي أنا عايز طاقة إنتاجية أد كذا، وعايز نص أتوماتيك ولا أتوماتيك، ويستحسن لو شرفتنا بالزيارة
العميل : طب الأتوماتيك كامل سعره كام؟
المهندس منسي : بتبدأ من حوالي 7000
العميل : المكنة الواحدة؟
المهندس منسي : آه
العميل : تمام… المصنع ممكن يحتاج كام مكنة؟
المهندس منسي : مكنة واحدة
العميل : للمصنع كامل؟
المهندس منسي : آه
العميل : تمام.. وإيه تاني بقى يا باش مهندس جنب المكن ده بيبقى إيه تاني مثلاً
المهندس منسي : يبقى بقى مكنة ليبول
العميل : أيوه
المهندس منسي : يبقى مكنة ليبول… هاتلي بس شكل العبوة اللي إنت عايز تعمل زيها نبص عليها…
العميل : أنا عايز أعمل حاجة جديدة برده، يعني عبوة جديدة شكل جديد مثلاً بحيث الناس تحب شكلها برده، أنا شغال في الخشب أساساً على فكرة مستورد أخشاب، فالحاجات ديت جديدة عليا على فكرة عشان كده بسألك
المهندس منسي : آه… ربنا ييسر لك الحال
العميل : الله يخليك يا باش مهندس، أنا عندي المكان وعندي كله يعني
المهندس منسي : آه… طب هوه بس حدد الطاقة الإنتاجية لأنه لازم نعرف الطاقة الإنتاجية أد إيه؟
العميل : طب إنت برده فدني قولي إيه الطاقة الإنتاجية أنا مش فاهمها برده؟
المهندس منسي : آه طاقة إنتاجية يعني بص إنت المحتمل تنتج أد إيه في اليوم؟؟ يعني إنت عايز تعمل كام إزازة في اليوم؟؟
العميل : إيه بقى اللي يبقى كويس عشان ما أخسرش منه؟؟ ما هو بقى أنا هستفيد منك في كده برده
المهندس منسي : حضرتك المتعارف إن الحاجات دي مش أنا اللي بقولها، إنت بتقولي أنا الطاقة الإنتاجية المحتملة في اليوم كذا
العميل : يعني 10000 إزازة مثلاً
المهندس منسي : آه 10000 إزازة دول في الساعة مثلاً
العميل : في ساعة واحدة
المهندس منسي : آه.. إنت عايز 10000 في اليوم
العميل : في اليوم مثلاً
المهندس منسي : آه ممكن تعملها مكنة نص أتوماتيك
العميل : هوه ممكن أعمل أكتر من كده؟
المهندس منسي : آه الأتوماتيك تعملك في الساعة في حدود 6000 لتر في الساعة
العميل : تشتغل كام ساعة دي يا باش مهندس؟ تشتغل اليوم كله ممكن؟
المهندس منسي : 24 ساعة، كل مكن المهندس منسي خدمة شاقة
العميل : تمام… تمام… والزيت أنا اللي بكرره والمكنة هي.. أنا مش عارف
المهندس منسي : لأ إنت بتجيب الزيت وبتعبيه بس، كل اللي في السوق اللي بيعملوا زيت كلهم بيجيبوا الزيت ويعبوا بس، لأنه إنت لما تروح تبني عمارة مش هتروح تعمل مصنع طوب ومصنع زلط ومصنع حديد… لازم كل واحد له دوره الطبيعي في الحياة
العميل : تمام..
المهندس منسي : إنت في البداية بتعبي الزيت بس مش أكتر من كده، وبعد ما تعبي الزيت تبدأ تمتحن الشغلانة، تبدأ تعمل إيه؟؟؟ تقول أنا هبدأ بقى أعمل وحدة تكرير صغيرة، هجيب مش عارف إي؟؟؟ كده يعني
العميل : تمام يا باش مهندس، طب المكسب بيبقى كام % كده؟
المهندس منسي : لأ ده أنا مهندس مش محاسب؟
العميل : آه…يعني أكيد مرت عليك الحاجات ديت
المهندس منسي : لو مرت عليا مرت عليا في الزيت والمكرونات والدقيق والسكر وكل… والسوائل والملح.. كل ده بقى هقعد أحفظها؟؟؟ ده أنا أبقى موسوعة مش مهندس
العميل : ربنا يزيدك يا باش مهندس، طب إنت مقرك فين؟
المهندس منسي : إحنا عندنا حدائق القبة، مدينة نصر، باب الشعرية، 6 أكتوبر
العميل : مافيش في إسكندرية؟
المهندس منسي : والله قريب إن شاء الله في برج العرب
العميل : طب أنا لو حبيت أزور حضرتك أجيلك 6 أكتوبر بقى
المهندس منسي : ماشي هبعتلك الداتا بتاعت 6 أكتوبر
العميل : تمام أنا هتابع يا باش مهندس، ربنا يخليك، مع السلامة
