ميكسر خلط المنظفات السائلة من شركة المهندس منسي
العميل : السلام عليكم
مهندس منسي : عليكم السلام ورحمة الله وبركاته
العميل : شركة المهندس منسي
مهندس منسي : أيوه
العميل : حضرتك كنت عايز أسأل على خط إنتاج المنظفات
مهندس منسي : آه
العميل : كنت عايز أعرف السعر كام النص أتوماتيك والأتوماتيك
مهندس منسي : يعني إنت عايز تعمل منظفات؟
العميل : آه
مهندس منسي : طب إيه بقى نوعية المنظفات اللي إنت هتشتغل فيها؟
العميل : صابون، بريل، فنيك، ….
مهندس منسي : آه، سايلة يعني
العميل : آه سايل
مهندس منسي : يبقى في مكنتين، مكنة خلط، ومكنة تعبئة
العميل : آه.. يعتبر خط واحد يعني
مهندس منسي : آه
العميل : تمام… دي بقى سعرها إيه؟ أتوماتيك ولا إيه؟
مهندس منسي : في منها أتوماتيك وفي منها نص أتوماتيك
العميل : وطب دي تعمل الصابون اللي هوه زي الكاميه والحاجات ديت؟
مهندس منسي : لأ ده خط تاني، المنظفات دي خطوط كتيرة قوي
العميل : آه.. آه…
مهندس منسي : أما الـ 3 اللي إنت ذكرتهم في الأول اللي همه الصابون السايل والبريل وده هوه ده مكنتين 2 بس
العميل : آه.. آه… أيوه يا باشا معاك بعد إذنك معلش آسف
مهندس منسي : ولا يهمك
العميل : يعني ديت ليها خط والحاجات التانية الصابون والكلام ده ليه خط تاني؟
مهندس منسي : أيوه
العميل : آه… طيب يعني بيعمل كل المنتجات السايلة؟
مهندس منسي : آه
العميل : طيب حضرتك ده سعره كام النص أتوماتيك؟
مهندس منسي : بيبقى طاقات بقى، في طاقة 50 كيلو، وفي طاقة 100 كيلو في الساعة، وفي طاقة 200 كيلو في الساعة، وفي 300 في الساعة، وفي نص طن، وفي طن، فإنت بتقولي أنا عايز الطاقة الإنتاجية المطلوبة هتبقى كذا
العميل : آه… لو هنقول مثلاً طاقة 50 كيلو في الساعة كبداية
مهندس منسي : لأ 50 كيلو دي مفيش، أول حاجة 100 كيلو، 50 كيلو دول تعملهم في بستلة يدوي
العميل : إنت بتتريق بقى
مهندس منسي : لأ حقيقي، 50 كيلو يدوي في بستلة 20 كيلو وتروح مقلبهم بس
العميل : آه… يعني 100 كيلو ده بيتخلط والأساس بتتحط في الخط نفسه والفرش وكل حاجة، اللي هوه التعبئة
مهندس منسي : آه
العميل : يعني هي خط بتحط منها بتلقم كله مع بعضه بيطلعلك منتج في الآخر
مهندس منسي : مضبوط آه
العميل : تمام.. تمام.. طيب حضرتك بقى أسعارها كام طيب النص أتوماتيك والأتوماتيك بالنسبة للـ 100 كيلو؟
مهندس منسي : دقيقة واحدة، الـ 100 كيلو ديت ما أنصحكش إنك تشتغل فيه أتوماتيك، حاجة بسيطة يعني
العميل : إيه؟؟
مهندس منسي : يعني 100 كيلو في الساعة تشتغل فيه أتوماتيك؟؟!!! مش المفروض يعني 100 كيلو في الساعة تشتغل فيهم خط أتوماتيك
العميل : لو حضرتك تقولي لسه جديد برده وهتعمل منتج جديد ولسه عبال ما يتسوق فالواحد مش عايز يبدأ بحاجة كبيرة قوي عشان لو ما حصلش نصيب
مهندس منسي : آه.. ما هو أنا بقولك الـ 100 كيلو ده أنصح بيه دايماً بالنص أتوماتيك مش الأتوماتيك، ده 100 كيلو، ده إنت لو عبتهم هيتعبوا معاك على طول
العميل : آه.. آه.. نص أتوماتيك، سعرها كام؟
مهندس منسي : سعر الميكسر يعني؟
العميل : آه النص أتوماتيك الـ 100 كيلو سعره كام؟
مهندس منسي : هيبقى عامل في حدود مثلاً 500 ـ 700 ، كده
العميل : اشمعنى بال يعني؟
مهندس منسي : لا هوه أنا بسمي بال عشان خاطر ثبات في السعر بس
العميل : يعني بتاخد بال
مهندس منسي : لا إحنا بناخد بالمصري، إنما لما بنسمي بنسمي بس بال، بقولك بال وباخد منك بالجنيه المصري
العميل : طيب لو هنقول حجم أتوماتيك أكبر من الـ 100 كيلو، نقول بقى 150 ولا 200؟
مهندس منسي : لأ الأتوماتيك بقى بيبدأ من 5 طن في الساعة ولا حاجة، لو إنتاجك 5 طن في الساعة المكنة الأتوماتيك أصلها بتعمل 7000
العميل : آه.. آه..
مهندس منسي : وفي بقى مكنة أتوماتيك بتنزل الحاجات ديت، الصابون السايل والبريل والحاجات ديت بتنزلها في أكياس، دي عامله أتوماتيك كاملة عامله
العميل : آه.. آه… يعني كل حاجة ليها خط
مهندس منسي : آه
العميل : طيب المكنة بتعمل إيه نص يدوي أو نص أتوماتيك إزاي؟
مهندس منسي : بتعمل إيه ديت صعب إن أنا أوصفهالك كده أون لاين، دي بقى تيجي تشرفنا بالزيارة وبعدين نفرجك بقى، إنما إزاي بقى هعرفك بتعمل إزاي بقى؟؟!!! يعني مش هينفع، لازم تيجي تشرفني بالزيارة وبعدين أفرجك
العميل : طب حضرتك حتة التعبئة والبرشمة بتاعت الإزازة ديت المكنة طبعاً بتعمل الكلام ده؟
مهندس منسي : آه
العميل : آه.. طيب ماشي، طب إنت إيه رأي حضرتك في المشروع ده
مهندس منسي : أنا كتسويق ما أعرفش، أنا أعرف بس صناعة
العميل : ما هو أنا فاهم، في منتجات معروفة وكده، هل المشروع زي ده مطلوب؟
مهندس منسي : ما هو أنا بقولك ما أعرفش في التسويق، مش تبعي، أنا تبعي المكن والخامات، إنما تسألني في التسويق ما بعرفش، ما هو أنا لو عرفت في كل حاجة هبقى الإنسان السوبر
العميل : ما هو واضح من صوت حضرتك إنك إنسان سوبر فعلاً
مهندس منسي : الله يبارك لك
العميل : طيب حضرتك طبعاً دي بتحتاج كيميائيين دول اللي بيعملوا الخلطات والحاجات دول
مهندس منسي : آه.. آه…
العميل : ماشي يا فندم ما اتشرفتش باسم حضرتك؟
مهندس منسي : المهندس منسي
العميل : أهلاً مهندس منسي، أهلاً بيك، حضرتك بقى صاحب الشركة؟
مهندس منسي : إن شاء الله
العميل : ماشي يا باش مهندس، على العموم أنا هتصل بحضرتك تاني وهاخد العنوان وهقابل حضرتك إن شاء الله آجي لحضرتك
مهندس منسي : ماشي يا غالي
العميل : لو ممكن آخد العنوان دلوقتي؟
مهندس منسي : إحنا عندنا حدائق القبة، مدينة نصر، باب الشعرية، 6 أكتوبر
العميل : حضرتك هتبقى موجود في أنهي فرع
مهندس منسي : ما هو أنا خلاص بقى، إنت هتروح بقى تتعامل مع بتوع المبيعات
العميل : آه… يعني مش هتعامل مع حضرتك
مهندس منسي : لا هتتعامل معاهم بقى، أنا لو اتعاملت مع كل واحد ده دماغي تتطق
العميل : ربنا يديك الصحة، خلاص.. طب عنوان مدينة نصر فينه؟
مهندس منسي : هبعتلك العنوان في رسالة حالاً
العميل : خلاص ماشي حضرتك، والشغل كل يوم من كام لكام؟
مهندس منسي : من 11-9 ماعدا يوم الجمعة أجازة
العميل : طيب خلاص ماشي يا فندم، أروح أنا على العنوان اللي حضرتك هتبعته وأقابل المهندسين هناك يعني
مهندس منسي : إن شاء الله
العميل : إن شاء الله، ماشي يا باش مهندس متشكر
مهندس منسي : ماشي يا غالي مع السلامة
